توپتىق كەزەڭنىڭ ءۇشىنشى تۋرىندا جولىققان كوماندالار ءتورتىنشى تۋردا دا ءبىر-بىرىمەن كەزدەسىپ, ماڭىزدى ۇپايلاردى ساراپقا سالدى. الدىمەن, «ا» توبىنداعى ويىندارعا توقتالار بولساق, الماتىنىڭ «قايراتى» وتكەن تۋردا ءوز الاڭىندا پاۆلوداردىڭ «اقسۋىن» قابىلداپ, 3:2 ەسەبىمەن جەڭىسكە جەتكەن. ءبىر اپتادان كەيىنگى قارىمتا كەزدەسۋدە 1:1 ەسەبى تىركەلدى. توپتاعى ەكىنشى ويىندا دا وسىعان ۇقساس جاعداي تىركەلدى. ءۇشىنشى تۋردا «اتىراۋدى» قوناقتا 4:1 ەسەبىمەن ويسىراتا جەڭگەن شىمكەنتتىڭ «ورداباسى» كلۋبى ءوز الاڭىنداعى ءتورتىنشى تۋردىڭ ماتچىندا «اتىراۋدان» 1:2 ەسەبىمەن جەڭىلىپ, ءبىر اپتا بۇرىنعى باسىمدىعىن ساقتاي المادى.
ءتورت تۋردان كەيىن تۋرنير كەستەسىندە «قايرات» 10 ۇپايمەن كوش باستاپ كەلەدى. ەكىنشى جانە ءۇشىنشى ورىنداعى «ورداباسى» مەن «اتىراۋ» ەنشىسىندە 6 ۇپاي بار. ال «اقسۋ» ءبىر ۇپايمەن كوش سوڭىندا قالىپ قويدى.
«ۆ» توبىندا العاشقى ءۇش تۋردان كەيىن 100 پايىزدىق ناتيجەمەن ءبىرىنشى ورىندا كەلە جاتقان قىزىلوردانىڭ «قايسارى» ءتورتىنشى تۋردا بىلگەنىنەن جاڭىلىپ, «كاسپيدەن» جەڭىلىپ قالدى. قىزىلورداداعى عاني مۇراتباەۆ اتىنداعى ستاديوندا وتكەن ءتورتىنشى تۋردىڭ ماتچىندا اقتاۋلىقتار 2:1 ەسەبىمەن باسىم ءتۇستى. وسىدان ءبىر اپتا بۇرىن اقتاۋدا وتكەن ماتچتا قىزىلوردالىقتار ءدال وسىنداي ەسەپپەن جەڭىسكە جەتكەن بولاتىن.
ال جۋىردا عانا كونفەرەنتسيا ليگاسىنىڭ ەكىنشى ىرىكتەۋ كەزەڭىندە حورۆاتيانىڭ «وسيەك» كلۋبىن جارىس جولىنان شىعارىپ جىبەرگەن «قىزىلجار» كۋبوك ويىنىندا ورالدىڭ «اقجايىعىنان» جەڭىلىپ قالدى. «استانا ارەنا» ستاديونىندا وتكەن كەزدەسۋدە پەتروپاۆلدىقتار قاقپاسىنا جاۋاپسىز ەكى گول وتكىزىپ الدى. اپتا بۇرىنعى ورالداعى ماتچتا الاڭ يەلەرىنىڭ جەڭىسىمەن اياقتالعان ەدى – 1:0. ءتورت تۋردا ءبىر-اق ۇپاي جيناعان «قىزىلجاردىڭ» ەندى قازاقستان كۋبوگىنىڭ پلەي-وفف كەزەڭىنە شىعۋ مۇمكىندىگى اسا تومەن دەۋىمىز كەرەك. «ۆ» توبىنىڭ تۋرنير كەستەسىندە 9 ۇپايى بار «قايسار» مەن «اقجايىق» العاشقى ەكى ورىندى ءوزارا ءبولىسىپ تۇر. ال «كاسپيدىڭ» ەنشىسىندە ازىرگە 4 ۇپاي بار.
كۋبوك جولىنداعى توپتىق كەزەڭگە قاتىسىپ جاتقان 16 كوماندانىڭ ىشىندە ءبىرىنشى بولىپ تۇركىستان وبلىسىنىڭ «ماقتاارال» ۇجىمى جارىستىڭ پلەي-وفف كەزەڭىنە جولداما الدى. «س» توبىندا باق سىناپ جاتقان پرەمەر-ليگا دەبيۋتانتى كەيىنگى ەكى تۋردا دا بىلتىرعى ەل چەمپيوندارى – «توبىلدان» باسىم ءتۇستى. ەۋروكۋبوكتاعى ويىندارىنا بايلانىستى ەكى ماتچقا دا جاستار قۇرامىن شىعارعان «توبىل» ءوز الاڭىندا 1:4, سىرت الاڭدا 0:1 ەسەبىمەن قارسىلاستارىنا جول بەردى.
ال «تاراز» بەن «اقتوبە» قاتارىنان ەكى تۋردا تەڭ ويناپ, ماڭىزدى ۇپايلارىنان قاعىلدى. تارازداعى ماتچ 0:0 ەسەبىمەن تەڭ اياقتالسا, اقتوبەدەگى ويىندا 1:1 ەسەبى تىركەلدى. تۋرنير كەستەسىندە «ماقتاارال» 9 ۇپايمەن ءبىرىنشى ورىندى يەلەنىپ تۇر. «تاراز» 8 ۇپايمەن ەكىنشى ورىنعا جايعاسقان. «توبىلدىڭ» ەنشىسىندە – 3, «اقتوبەدە» 2 ۇپاي بار.
«د» توبىنداعى تورتتىكتە ازىرشە «استانا» مەن «شاحتەردىڭ» جاعدايى شامالاس. ەلوردالىقتار وتكەن تۋردا تۇركىستاننان استاناعا ءبىر ۇپايمەن (1:1) ورالعان بولاتىن. ءبىر اپتادان كەيىنگى قارىمتا ماتچتا «استانا» «تۇراندى» 2:1 ەسەبىمەن تىزە بۇكتىرىپ, ماڭىزدى ءۇش ۇپايىنا قول جەتكىزدى. تالدىقورعاندا «جەتىسۋدىڭ» وسال تۇسىن تابا الماعان «شاحتەر» (0:0) ءتورتىنشى تۋردا ءبىرىنشى ليگانىڭ كلۋبىن 4:2 ەسەبىمەن قاپى قالدىردى.
تۋرنير كەستەسىندە «استانا» 8 ۇپايمەن ءبىرىنشى ورىنعا جايعاسقان. ال ءبىر ۇپاي كەم جيناعان «كەنشىلەر» كومانداسى ەلوردالىقتاردى وكشەلەپ كەلەدى. ءبىر ويىندا جەڭىسكە جەتىپ, بىرەۋىندە تەڭ تۇسكەن «تۇران» فۋتبولشىلارى 4 ۇپايمەن ءۇشىنشى ساتىعا, «جەتىسۋ» 2 ۇپايمەن ءتورتىنشى ورىنعا تۇراقتاعان.
ءتورتىنشى تۋر ويىندارىنىڭ ستاتيستيكاسىنا توقتالار بولساق, ەلىمىزدىڭ جەتى قالاسىندا وتكەن سەگىز ماتچقا («قىزىلجار» ءوز الاڭىنداعى ماتچتاردى ەلوردادا وتكىزىپ ءجۇر) جالپى سانى – 25 761 جانكۇيەر كەلدى. ەڭ كوپ كورەرمەن (12 861) «اقتوبە» – «تاراز» ماتچىن تاماشالاسا, ەڭ از جانكۇيەر «قىزىلجار» مەن «اقجايىق» ويىنىنا باردى (500 كورەرمەن).
8 ماتچتى تاماشالاۋعا كەلگەن 25 761 كورەرمەن ءتورتىنشى تۋردا 22 گولدىڭ كۋاسى بولسا, ونىڭ ەكەۋى پەنالتيدەن سوعىلدى. سونىمەن قاتار بۇل تۋردىڭ جىلدام گولىن «اقسۋ» ويىنشىسى دامير مارات پەن «استانانىڭ» جارتىلاي قورعاۋشىسى پەدرو ەۋجەنيو 2-مينۋتتا سالدى. ال ەڭ سوڭعى گولدى «ماقتارالدىڭ» فۋتبولشىسى جان الي پايرۋز 90+1-مينۋتتا قاقپا تورىنا ەنگىزدى.
بۇل تۋردا ەكى فۋتبولشى قىزىل قاعاز الىپ, الاڭنان قۋىلدى. ءبىرى – «قايراتتىڭ» قاقپاشىسى ۆاديم ۋليانوۆ (83-مينۋتتا) بولسا, ەكىنشىسى – «قايساردىڭ» قورعاۋشىسى وليۆەيرا جواو پەدرو (90+2-مينۋتتا). 38 فۋتبولشى تورەشى تاراپىنان سارى قاعازبەن جازالاندى. ەڭ قىزىعى, «اقتوبە» – «تاراز» ماتچىندا بىردە-ءبىر ويىنشىعا سارى جانە قىزىل قاعاز كورسەتىلگەن جوق.
5-7 تامىز كۇندەرى وتەتىن بەسىنشى تۋردا «اقجايىق» – «قايسار», «تۇران» – «شاحتەر», «اقتوبە» – «ماقتاارال», «اتىراۋ» – «اقسۋ», «توبىل» – «تاراز», «استانا» – «جەتىسۋ», «قىزىلجار» – «كاسپي» جانە «ورداباسى» – «قايرات» كوماندالارى كەزدەسەدى. ال سوڭعى التىنشى تۋر ويىندارى 13-14 تامىزعا جوسپارلانعان.
