«تومپايىپ كوزگە قوراش كورىنەتىنى بولماسا ەش اۋىرعان جوق. بۇرىن ءتۇرلى سەبەپتەرمەن وپەراتسيا جاساتا الماي ءجۇردىم. جاقىندا تانىستاردان ىسىكتى مىندەتتى الەۋمەتتىك مەديتسينالىق ساقتاندىرۋ ەسەبىنەن تەگىن جاساتۋعا بولاتىنىن ەستىپ, اۋرۋحاناعا باردىم», دەيدى زەينەتكەر.
پاتسيەنتكە امبۋلاتوريا دەڭگەيىندە جوسپارلى وپەراتسيا جاسالدى. وپەراتسيا جاسالاتىن جەردى جانسىزداندىرۋ ارقىلى جاسالعان شاعىن حيرۋرگيالىق مانيپۋلياتسيا بار بولعانى 20 مينۋتقا سوزىلعان. قازىر وپەراتسيا ورنىندا بىلىنەر-بىلىنبەس تىرتىق قالدى.
امبۋلاتورلىق حيرۋرگيا ورتالىعىنىڭ جەتەكشىسى مارات مەناياقوۆ وپەراتسيا جاساۋ ءۇشىن بەلگىلى ءبىر اناليزدەر مەن تەكسەرۋ ناتيجەلەرى تالاپ ەتىلەتىنىن ايتادى. قاجەتتى ساراپتامالاردان كەيىن پاتسيەنتكە بىردەن وپەراتسيا جاسالادى. ياعني ول ءۇشىن اۋرۋحاناعا جاتىپ ەمدەلۋدىڭ قاجەتى جوق.
«پاتسيەنتتىڭ موينىنداعى ىسىكتەن بيوپسيا الىندى. ناتيجەسىندە, ونىڭ مايدان تۇزىلگەن ليپوما ەكەنى انىقتالدى. جالپى, مۇنداي ىسىكتەرگە وپەراتسيا جاسالعاننان كەيىن پاتسيەنت بىرنەشە ساعاتتان سوڭ ۇيىنە قايتادى. سودان سوڭ ەكى كۇندە ءبىر رەت جاراسىن تاڭدىرۋعا كەلىپ تۇرادى. تىگىستىڭ ءجىبى 10-12 كۇننەن كەيىن الىنادى», دەيدى حيرۋرگ.
الايدا ماماندار ونىڭ ءارتۇرلى فاكتورلار سالدارىنان قاتەرلى ىسىككە اينالىپ كەتۋى ابدەن مۇمكىن ەكەنىن جوققا شىعارمايدى. سوندىقتان مۇنداي ىسىكتەردى دەر كەزىندە الىپ تاستاعان ءجون.
ال №1 قالالىق كلينيكالىق اۋرۋحانا جانىنداعى امبۋلاتورلىق حيرۋرگيا ورتالىعىندا اشىلعالى بەرى وتكەن ايدا وسىعان ۇقساس 20 شاقتى شاعىن وپەراتسيا جاسالدى. حيرۋرگيالىق كومەك مىندەتتى الەۋمەتتىك مەديتسينالىق ساقتاندىرۋ شەڭبەرىندە جانە اقىلى نەگىزدە كورسەتىلەدى. حيرۋرگتەر ليپوما, اتەروما, گيگروما سىندى تاعى دا باسقا قاۋىپسىز ىسىك تۇرلەرىنە, شاپتاعى جانە كىندىك تۇسىنداعى جارىقتارعا وپەراتسيا جاسايدى, ۆاريكوزدى ەمدەيدى.
«امبۋلاتورلىق حيرۋرگيا ورتالىقتارى كوپشىلىككە وتە ىڭعايلى. پاتسيەنت مۇنداي ورتالىقتاردا وپەراتسيا جاساتۋ ءۇشىن اسا كوپ اناليز تاپسىرمايدى. ونىڭ ۇستىنە, ساقتاندىرىلعان ازاماتتار ءتيىستى ساراپتامالاردى تىركەلگەن ەمحانا ارقىلى تاپسىرىپ, ينسترۋمەنتالدىق زەرتتەۋلەردەن دە ءمامس شەڭبەرىندە وتە الادى», دەيدى مەديتسينالىق ساقتاندىرۋ قورىنىڭ الماتى قالالىق فيليالى ديرەكتورى تىلەۋحان ابىلداەۆ.
الماتى
