الەم چەمپيوناتىنداعى ەكىنشى التىندى ەل قورجىنىنا جارىستىڭ سوڭعى كۇنىندە 92 كيلوعا دەيىنگى سالماق دارەجەسىندە بەلدەسكەن كاميل كۋرۋگليەۆ سالدى. فينالدا ول ماجارستاندىق مۋسۋ ارسۋنكاەۆتى 11:0 ەسەبىمەن ويسىراتا جەڭىپ, تۇعىردىڭ ەڭ بيىك ساتىسىنان كورىندى.
ايتا كەتۋ كەرەك, كاميل – بالۋاندار اۋلەتىنىڭ وكىلى. ول – كەزىندە قازاقستان ۇلتتىق قۇراماسىنىڭ ساپىندا ءبىرتالاي حالىقارالىق جارىستا ونەر كورسەتىپ, الەم چەمپيوناتىنىڭ قولا مەدالىن جەڭىپ العان, ازيا ويىندارىنىڭ بىرنەشە دۇركىن جۇلدەگەرى بولعان بالۋان ماگومەد كۋرۋگليەۆتىڭ ۇلى.
قازاقستان قۇراماسى ساپىنان يتالياداعى باسەكەنىڭ العاشقى التىنىن 55 كيلو سالماقتا كۇرەسكەن ەركىن كۇرەس شەبەرى دارىن اسكەربەك جەڭىپ العان بولاتىن. سونىمەن قاتار جارىستىڭ العاشقى كۇنىندە گرەك-ريم كۇرەسىنىڭ ەكى وكىلى – ارسەن جۇما (48 كگ) مەن يۋسۋف اشراپوۆ (60 كگ) جانە قىزدار كۇرەسىنەن الينا ەرتوستىك (73 كگ) قولا جۇلدە ولجالاعان ەدى.
