بۇگىن چەحيانىڭ پروستەەۆ قالاسىندا جالاۋى جەلبىرەگەن 14 جاسقا دەيىنگى (2022 ITF World Junior Tennis Finals) تەننيسشىلەر اراسىنداعى كوماندالىق الەم چەمپيوناتىندا قازاقستان جاسوسپىرىمدەر قۇراماسىنان بولەك, ىرىكتەۋ كەزەڭىندە ۇزدىك ويىنىمەن كوزگە تۇسكەن تاعى 16 كوماندا سپورتشىلارى ونەر كورسەتەدى.
تەننيس جانكۇيەرلەرىنىڭ ەسىندە بولسا, وسى جىلدىڭ ءساۋىر ايىندا جەرلەستەرىمىز ءۇندىستاندا وتكەن ازيا جانە تىنىق مۇحيتى ايماعىنىڭ ىرىكتەۋ كەزەڭىنە قاتىسىپ, تاريحي جولداماعا قول جەتكىزگەن ەدى. ىرىكتەۋ سايىستارىنىڭ باستاپقى باسەكەلەرىندە وتانداستارىمىز يندونەزيا, شري-لانكا جانە پاكىستان قۇرامالارىن 3:0 ەسەبىمەن تىزە بۇكتىرىپ, شيرەك فينالعا شىقتى. ال شيرەك فينالدا گونكونگ تەننيسشىلەرىمەن شەبەرلىك بايقاسىپ, بۇل باسەكەدە قارسىلاستارىنان 2:0 ەسەبىمەن ايلاسىن اسىردى. الايدا جارتىلاي فينالدا وتانداستارىمىز ساتسىزدىككە ۇشىراپ, وڭتۇستىك كورەيا قۇراماسىنان ءۇش ويىننىڭ ەكەۋىندە جەڭىلىپ قالدى – 1:2. دەگەنمەن ءۇشىنشى ورىن ءۇشىن وتكەن كەزدەسۋدە قازاقستاننىڭ جاسوسپىرىمدەر قۇراماسى تايلاند سپورتشىلارىنان 2:0 ەسەبىمەن باسىم ءتۇسىپ, الەم چەمپيوناتىنىڭ جولداماسىن يەلەنگەن بولاتىن.
وسىدان بىرەر كۇن بۇرىن تەننيستەن قازاقستان جاسوسپىرىمدەر قۇراماسىنىڭ كاپيتانى سەرگەي كۆاك چەحياداعى الەمدىك دودادا ەل نامىسىن قورعايتىن تەننيسشىلەردىڭ ەسىمىن جاريالادى. ولار: زاڭعار نۇرلان ۇلى, دامير جالعاسباي جانە دانيەل تازابەكوۆ.
وسى ورايدا الەم چەمپيوناتىندا ونەر كورسەتەتىن جاس قاھارماندارىمىزدى جەكە-جەكە تانىستىرىپ وتكەندى ءجون ساناپ وتىرمىز. قازاقستان تەننيس فەدەراتسياسىنىڭ ءباسپاسوز قىزمەتى ۇسىنعان مالىمەت بويىنشا, 2008 جىلى دۇنيەگە كەلگەن زاڭعار نۇرلان ۇلى ءتورت جاسىنان تەننيستىڭ قىر-سىرىنا قانىعا باستاعان. الماتى تەننيس مەكتەبىنىڭ تۇلەگى سانالاتىن زاڭعار ەلىشىلىك جارىستاردا تۇركىستان وبلىسى اتىنان سىنعا تۇسەدى. العاشقى باپكەرى – قايرات كوشەروۆ. قازىرگى تاڭدا ول براتيسلاۆاداعى دومينيكا تسيبۋلكوۆا اكادەمياسىندا جاتتىعادى. بويى – 175 سم, سالماعى – 63 كگ. وڭقاي, بەكزەندتى قوس قولمەن ورىندايدى. حارد پەن توپىراق توسەنىشىندە ويناعاندى جاقسى كورەدى.
دامير جالعاسباي دا تەننيسپەن ءتورت جاسىنان باستاپ اينالىسادى. الماتىداعى تسسكا كورتتارىندا يۋري كارلوۆتان ءتالىم العان دامير بۇگىندە الەكسەي فيلاتوۆتىڭ باسشىلىعىمەن Team Kazakhstan اكادەمياسىندا شەبەرلىگىن شىڭداپ ءجۇر. بويى – 190 سم, سالماعى – 68 كگ. وڭقاي, بەكحەندتى قوس قولمەن ورىندايدى. سۇيىكتى توسەنىشى – حارد. ايتا كەتەيىك, جالعاسباي وتكەن اپتادا گەرمانيانىڭ ۆايبلينگەن قالاسىندا ۇيىمداستىرىلعان 14 جاسقا دەيىنگى بالالار اراسىنداعى Tennis Europe ساناتىنا جاتاتىن ەكىنشى دارەجەلى ءتۋرنيردىڭ فينالىنا دەيىن جەتىپ, باس جۇلدە ءۇشىن وتكەن باسەكەدە جارىستىڭ ءبىرىنشى راكەتكاسى رەسەيلىك ساۆا رىباكيننەن ءۇش سەتتە – 7:6 (7:4), 4:6, 1:6 ەسەبىمەن جەڭىلىپ قالعان بولاتىن.
ال چەحيادا ەل نامىسىن قورعايتىن ءۇشىنشى تەننيسشىمىز دانيەل تازابەكوۆ جوعارىداعى ەكى سپورتشىعا قاراعاندا كارەراسىن ەكى جىل كەش باستاعان. ەلورداداعى ۇلتتىق تەننيس ورتالىعىندا ۆلاديمير وگانياننىڭ قول استىندا جاتتىققان دانيەل بۇل كۇندەرى سەربيا استاناسى – بەلگرادتاعى «ستاري كوشۋتنياك» تەننيس كەشەنىندە ۆەلكو بارياكتاروۆيچتىڭ قول استىندا جاتتىعىپ ءجۇر. بويى – 175 سم, سالماعى – 62 كگ. سولاقاي, بەكحەندتى قوس قولمەن ورىندايدى. توپىراق توسەنىشىندە ويناعاندى قولاي كورەدى.
الەم بىرىنشىلىگى 6 تامىزعا دەيىن جالعاسادى.
