ەكىنشى ىرىكتەۋ كەزەڭىنىڭ العاشقى ماتچىنان كەيىن قازاقستاندىق كوماندالاردىڭ اراسىندا كەلەسى كەزەڭگە وتۋگە تەك «توبىلدىڭ» عانا مۇمكىندىگى جوعارى ەدى. سەبەبى ءوز الاڭىندا گيبرالتاردىڭ «لينكولن رەد يمپس» كلۋبىنان 2:0 ەسەبىمەن باسىم تۇسكەن قوستانايلىق ۇجىم سىرت الاڭداعى ماتچتا تەڭ ويناسا دا جەتكىلىكتى بولاتىن. ال قالعان ءۇش كوماندامىزدى تەك ءىرى ەسەپتەگى جەڭىس قانا كەلەسى كەزەڭگە الىپ شىعاتىن ەدى.
ەلوردادا وتكەن «قىزىلجار» مەن «وسيەك» اراسىنداعى العاشقى ماتچتا قوناقتار 90 مينۋت بويى الاڭدا ۇستەمدىك تانىتىپ, 2:1 ەسەبىمەن جەڭىسكە جەتكەن-ءدى. پەتروپاۆلدىقتار ماتچ بويى جارىتىپ شابۋىل ۇيىمداستىرا الماي, ارەڭ دەگەندە اۆتوگولدىڭ ارقاسىندا ەسەپ ايىرماسىن قىسقارتتى. اراعا اپتا سالىپ, حورۆاتياداعى 20 مىڭعا جۋىق جانكۇيەر سىياتىن «گرادسكي ۆرت» ستاديونىندا وتكەن قارىمتا كەزدەسۋدىڭ ءبىرىنشى تايمى ادەتتەگىدەي «وسيەكتىڭ» باسىمدىعىمەن ءوتتى. بىراق الاڭ يەلەرى دوپ ۇستاۋ, قاقپاعا سوققى باعىتتاۋ بويىنشا قانشا ۇستەمدىك تانىتقانىمەن, «قىزىلجار» قاقپاسىنان ساڭىلاۋ تابا المادى.
ال ەكىنشى تايمدا «قىزىلجار» فۋتبولشىلارى ماتچتى تۇبەگەيلى باسقا ارناعا بۇرىپ جىبەردى. ءۇزىلىس ۋاقىتىندا پەتروپاۆلدىق كوماندانىڭ باس باپكەرى ءالي اليەۆتىڭ شاكىرتتەرىنە نە ايتقانى بەلگىسىز, ايتەۋىر ويىنشىلاردا جەڭىسكە دەگەن ەرەكشە جىگەر بايقالدى. ناتيجەسىندە, كەزدەسۋدىڭ 61-مينۋتىندا «قىزىلجاردىڭ» گرۋزيالىق شابۋىلشىسى گيورگي يۆانيادزە گول سوعىپ, كومانداسىن ەسەپتە العا شىعاردى. ءسويتىپ, ەكى ويىننىڭ قورىتىندىسى بويىنشا تارازى باسى تەڭەسكەن سوڭ, كوپشىلىك وۆەرتايم كورۋگە دايىندالىپ جاتقان ەدى. الايدا 71-مينۋتتا «قىزىلجار» فۋتبولشىلارى «وسيەك» قاقپاسىنا ەكىنشى گولىن سوعىپ, ماتچتىڭ نۇكتەسىن قويدى. بۇل جولى يۆۋارلىق جارتىلاي قورعاۋشى مۇسا كونە مەرگەندىك تانىتتى – 0:2. «وسيەك» فۋتبولشىلارى ماتچتىڭ قالعان ۋاقىتىندا ەموتسياعا بەرىلىپ, كوپ جەردە بىلگەنىنەن جاڭىلىپ جاتتى. ءسويتىپ, ەكىنشى تايمدا «قىزىلجار» قاقپاسىنا بىردە-ءبىر ءدال سوققى باعىتتاي المايدى.
وسىلايشا, سىرت الاڭدا حورۆاتيانىڭ داڭقتى كومانداسىن 2:0 ەسەبىمەن تىزە بۇكتىرىپ, قازاقستاندىق كوماندالار اراسىندا سەنساتسيا جاساعان «قىزىلجار» كونفەرەنتسيا ليگاسىنىڭ ءۇشىنشى اينالىمىنا جولداما الدى. جەرلەستەرىمىز بۇل كەزەڭدە قازاقستاندىق جانكۇيەرلەرگە جاقسى تانىس بولعان كيپردىڭ اپوەل كومانداسىمەن كەزدەسەدى. كيپرلىك ۇجىم ەكىنشى اينالىمدا بولگاريانىڭ «بوتەۆ» كلۋبىن ەكى ويىندا 2:0 ەسەبىمەن قاپى قالدىرعان بولاتىن.
اپوەل بۇگىنگە دەيىن قازاقستاندىق كوماندالارمەن ەۋرودودا ويىندارىندا ءتورت مارتە كەزدەسكەن. «استانامەن» ءبىر رەت چەمپيوندار ليگاسىنىڭ, ءبىر مارتە ەۋروپا ليگاسىنىڭ پلەي-وفف كەزەڭىندە كەزدەسسە, كەيىننەن ەۋروپا ليگاسىنىڭ توپتىق كەزەڭىندە ءبىر توپتا ونەر كورسەتتى. العاشقى ەكى پلەي-وفف ساتىسىندا «استانانىڭ» مەرەيى ۇستەم بولسا, توپتىق كەزەڭدە ەكى كلۋب تا ءبىر-ءبىر ويىندا جەڭىسكە جەتكەن بولاتىن. ال 2020 جىلى ەۋروپا ليگاسىنىڭ ەكىنشى اينالىمىندا شىمكەنتكە كەلگەن اپوەل «قايساردى» 1:4 ەسەبىمەن تىزە بۇكتىردى.
«قىزىلجار» مەن اپوەل اراسىنداعى ءۇشىنشى اينالىمنىڭ العاشقى كەزدەسۋى 4 تامىز كۇنى كيپردە, قارىمتا ماتچ 11 تامىز كۇنى ەلوردادا وتەدى.
كونفەرەنتسيا ليگاسىنىڭ ەكىنشى ىرىكتەۋ كەزەڭىنىڭ ماتچتارىنان كەيىن «توبىلدىڭ» دا ءۇشىنشى اينالىمداعى قارسىلاسى بەلگىلى بولدى. بۇل كەزەڭدە ەل چەمپيوندارى بوسنيا جانە گەرتسەگوۆينانىڭ «زرينسكي» كلۋبىمەن كەزدەسەدى. بوسنيالىق كلۋب ەكىنشى اينالىمدا البانيانىڭ «تيرانا» كومانداسىن ەكى ويىننىڭ قورىتىندىسى بويىنشا 4:2 (1:0, 3:2) ەسەبىمەن ۇتتى.
«زرينسكي» كلۋبىنىڭ ىرگەتاسى وسىدان 117 جىل بۇرىن قالانسا دا, بيىل ىشكى چەمپيوناتتاعى نەبارى جەتىنشى چەمپيوندىعىنا قول جەتكىزدى. سونداي-اق كوماندا 2013 جىلدان بەرى ەۋروكۋبوك ويىندارىنىڭ تۇراقتى قاتىسۋشىسىنا اينالعانىمەن, ءالى كۇنگە دەيىن توپتىق كەزەڭگە شىعا الماي كەلەدى. ءبىر قىزىعى, «توبىل» مەن «زرينسكي» ەۋروكۋبوك ويىندارىندا بيىل العاش رەت كەزدەسىپ تۇرعان جوق. بۇعان دەيىن ەكى كلۋب 2010 جىلعى ەۋروپا ليگاسىنىڭ ەكىنشى اينالىمىندا جاسىل الاڭدا جولىعىپ, «زرينسكي» ەكى ماتچتا دا 2:1 ەسەبىمەن جەڭىسكە جەتكەن بولاتىن. ەندى, مىنە, «توبىلعا» 12 جىل بۇرىنعى ەسەنى قايتاراتىن تاماشا مۇمكىندىك تۋىپ تۇر.
ەكى ۇجىم اراسىنداعى العاشقى ويىن 4 تامىز كۇنى بوسنيادا, قارىمتا كەزدەسۋ 11 تامىزدا قوستانايدا وتەدى دەپ جوسپارلانعان.
وكىنىشكە قاراي, قازاقستاننىڭ ەۋروكۋبوكتارداعى ەڭ داڭقتى ەكى ۇجىمى – «استانا» مەن «قايرات» بيىلعى ىرىكتەۋدە وزدەرىمەن دەڭگەيلەس كوماندانى جەڭە الماي, جانكۇيەرلەرىن جەرگە قاراتتى. سىرت الاڭداعى العاشقى ويىندا پولشانىڭ «راكۋۆ» كومانداسىنان 5:0 ەسەبىمەن جەڭىلگەن «استانا» ءوز الاڭىندا دا قارسىلاستارىنا 0:1 ەسەبىمەن جول بەردى. ال بىلتىر عانا وسى ليگانىڭ توپتىق كەزەڭىندە ونەر كورسەتكەن «قايرات» ەكى ماتچتا دا ماجارستاننىڭ «كيشۆاردا» كلۋبىنان 1:0 ەسەبىمەن جەڭىلىپ, كونفەرەنتسيا ليگاسىنىڭ ىرىكتەۋ كەزەڭىنەن شىعىپ قالدى.
