وبلىستىق ءبىلىم باسقارماسى باسشىسىنىڭ مىندەتىن اتقارۋشى ايناگۇل دۇيسەكەنوۆانىڭ ايتۋىنشا, پرەزيدەنت تاپسىرماسىنا سايكەس بولىنگەن ءبىلىم گرانتىندا كاسىپتىك, تەحنيكالىق, گۋمانيتارلىق باعىتتاعى ءتۇرلى ماماندىقتار قامتىلعان. بيىل اتىراۋ ءوڭىرىنىڭ تۇلەكتەرى ءۇشىن 4 مىڭ گرانت ءبولىندى. ونىڭ 3 200-ءىن تەحنيكالىق, ال 800-ءىن پەداگوگيكالىق ماماندىقتى تاڭداعان تۇلەكتەرگە بەرۋ كوزدەلىپ وتىر.
– بۇل ماماندىقتاردىڭ ءوڭىر ءۇشىن ماڭىزى زور. سول سەبەپتەن, تۇلەكتەرگە بەرىلەتىن گرانتتىڭ ارتىقشىلىعى بار. سەبەبى گرانت العاندارعا كەيىننەن ەڭبەك ءوتىلى تۇرىندە قايتارۋ جاۋاپكەرشىلىگى قاراستىرىلماعان. تۇلەكتەرگە شاكىرتاقى الىپ, قازاقستاننىڭ ەڭ ۇزدىك جوعارى وقۋ ورىندارىندا ءبىلىم الۋىنا تولىقتاي مۇمكىندىك بەرىلگەن, – دەيدى ا.دۇيسەكەنوۆا.
ال وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆتىڭ دەرەگىنە قاراعاندا, وڭىردە 6 747 مەديتسينا قىزمەتكەرى جۇمىس ىستەيدى. ونىڭ ىشىندە 1 515 دارىگەر, 5 232 ورتا بۋىن مەديتسينا قىزمەتكەرى تۇرعىندارعا مەديتسينالىق كومەك كورسەتىپ ءجۇر.
– مۇنايلى ءوڭىردىڭ مەديتسينا سالاسىندا ءالى دە 201 دارىگەر جەتىسپەيدى. اۋرۋحانالار مەن ەمحانالاردا, وزگە ەمدەۋ ورىندارىندا رەانيماتولوگ, اكۋشەر-گينەكولوگ, ينفەكتسيونيست, جالپى تاجىريبە دارىگەرى, پەدياتر سەكىلدى جوعارى ءبىلىمدى كادرلاردىڭ ورنى بوس تۇر. اۋىلدارداعى مەديتسينا مەكەمەلەرىنە 40 دارىگەر قاجەت, – دەيدى ا.بايدۋاليەۆ.
ونىڭ ايتۋىنشا, جوعارى مەديتسينالىق وقۋ ورنىن بىتىرگەن اتىراۋ وبلىسىنىڭ تۇلەكتەرىن بىلىكتى دارىگەر رەتىندە ءبىلىمىن ودان ءارى رەزيدەنتۋرادا جالعاستىرۋىنا جاعداي جاسالىپ وتىر. جىل سايىن وسى ماقساتقا 70-تەن اسا گرانت بولىنەدى. ماسەلەن, 2021 جىلعى جەلتوقساندا اتىراۋدا م.وسپانوۆ اتىنداعى باتىس قازاقستان مەديتسينالىق ۋنيۆەرسيتەتىنىڭ فيليالى اشىلدى. قازىر باسقا وڭىرلەردەن كەلگەن 35 رەزيدەنت وبلىستاعى مەديتسينالىق مەكەمەلەردە جۇمىس ىستەپ ءجۇر.
– مەملەكەت مەديتسينا قىزمەتكەرلەرىنە جان-جاقتى قولداۋ كورسەتىپ, دەنساۋلىق ساقتاۋ سالاسىن دامىتۋعا باسا نازار اۋدارىپ كەلەدى. ويتكەنى ۇلت ساۋلىعى – جاڭا ادىلەتتى قازاقستاندى قۇرۋ جولىنداعى مەملەكەتتىك ساياساتتىڭ اسا ماڭىزدى باعىتى. وڭىردەگى كادر جەتىسپەۋشىلىگىن جويۋ ماقساتىندا بىرقاتار جۇمىس قولعا الىندى. ماسەلەن, س.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتى اتىراۋلىق تۇلەكتەر ءۇشىن فارماتسيا فاكۋلتەتىنە 30 گرانت ءبولدى. بۇل – مەكتەپ ءبىتىرۋشى تۇلەكتەرگە ۇلكەن مۇمكىندىك. وبلىستىق اكىمدىك تاراپىنان اتىراۋ جوعارى مەديتسينالىق كوللەدجىندە ءبىلىم الۋ ءۇشىن جىل سايىن 70-تەن استام گرانت بولىنەدى, – دەدى ا.بايدۋاليەۆ.
سونداي-اق دارىگەرلەر مەن مەدبيكە سەكىلدى مەديتسينا قىزمەتكەرلەرىنىڭ بىلىكتىلىگىن ارتتىرۋدىڭ ناقتى جوسپارى جاسالعان. جوسپارعا سايكەس 20 باعىت بويىنشا 80 تاقىرىپ بەكىتىلىپ, اكۋشەر-گينەكولوگ, انەستەزيولوگ-رەانيماتولوگ, نەوناتولوگ, بالالار حيرۋرگى, ونكولوگ جانە باسقا ماماندىق يەلەرى وبلىستىڭ مەديتسينا مەكەمەلەرىندە, ۇلتتىق عىلىمي-زەرتتەۋ ينستيتۋتتارىندا, يزرايل مەن گەرمانيا رەسپۋبليكاسىندا ءبىلىمىن جەتىلدىرەدى.
اتىراۋ وبلىسى
