تاياۋدا ەل پرەمەر-ءمينيسترى لاۋازىمى سايىسىنىڭ كەزەكتى تۋرى وتكەن. ۇشتىكتىڭ تالاسىنان فينالعا ريشي سۋناك – 137 داۋىسپەن, ليز تراسس – 113 داۋىسپەن وتكەن ەدى. دەگەنمەن اعىلشىن بۇقارالىق اقپارات قۇرالدارى كونسەرۆاتيۆشىلەر پارتياسى دەپۋتاتتارىنىڭ قىزۋ قولداۋىنا يە بولعان سۋناقتىڭ شەشۋشى سايلاۋدا تابىسقا جەتە الماۋى مۇمكىن ەكەنىن ايتادى.
وسى اپتانىڭ باسىندا ۇلىبريتانيا پرەمەر-مينيسترلىگىنە ۇمىتكەرلەر اراسىندا العاشقى تەلەدەبات ءوتتى. ەكىجاقتى پىكىرتالاستا ۋكرايناداعى قاقتىعىس, ءومىر ءسۇرۋ ساپاسى, سالىق جانە قورشاعان ورتا ماسەلەلەرى تالقىلاندى. كونسەرۆاتيۆشىلەر پارتيا مۇشەلەرىنىڭ YouGov ساۋالداماسىنا سايكەس, پىكىرتالاس كەزىندە ۇلىبريتانيانىڭ سىرتقى ىستەر ءمينيسترى ليز تراسس بۇرىنعى قازىناشىلىق كانتسلەرى ريشي سۋناكقا قاراعاندا باسىم تۇسكەن. وعان پارتيانىڭ 507 مۇشەسى قاتىسىپ, رەسپوندەنتتەردىڭ شامامەن 50 پايىزى تراسستىڭ بەلسەندى بولعانىن العا تارتتى. قازىناشىلىق كانتسلەرى سۋناكتى قولداعانداردىڭ كورسەتكىشى – 39 پايىزدى قۇراپ وتىر.
Bloomberg ارناسىنىڭ پايىمداۋىنشا, YouGov ساۋالداماسى سۋناكتىڭ ءالى دە ءوز پارتياسىنىڭ قولداۋىن قاجەت ەتەدى. سوڭعى تاڭداۋدى كونسەرۆاتيۆشىلەر پارتياسىنىڭ 175 مىڭ مۇشەسى جاسايدى. بۇعان دەيىنگى ساۋالدامالاردا ريشي مىرزا جەڭىلىپ كەلگەن-ءدى. كەيىنگى ساۋالدامادا رەسپوندەنتتەر تراسستى سۋناكپەن سالىستىرمالى تۇردە قاراپايىم حالىقپەن كوبىرەك قارىم-قاتىناس جاسايتىن, ادامداردا سەنىم ۇيالاتاتىن ساياساتكەر رەتىندە اتاپ وتكەن ەكەن.
تولىق اتى-ءجونى مەري ەليزابەت تراسس 1975 جىلى وكسفوردتا دۇنيەگە كەلگەن. قازىرگى تاڭدا ۇلىبريتانيانىڭ سىرتقى ىستەر ءمينيسترى. تراسس سايلاۋدا جەڭىسكە جەتسە, ۇلىبريتانيانىڭ جاڭا پرەمەر-ءمينيسترى قىزمەتىنە تاعايىندالادى. ول وكسفورد ۋنيۆەرسيتەتىن فيلوسوفيا, ساياسات جانە ەكونوميكا ماماندىعى بويىنشا بىتىرگەن.
تراسس 2010 جىلى ۇلىبريتانيانىڭ بۇرىنعى پرەمەر-ءمينيسترى دەۆيد كەمەرون كونسەرۆاتيۆشىلەر پارتياسىنىڭ «ا-تىزىمىنە» ەنگىزىلگەننەن كەيىن وڭتۇستىك-باتىس نورفولكتەن دەپۋتات بولىپ سايلاندى. ليز حانىم 2012 جىلى كەمەرون ۇكىمەتىندەگى مينيسترلەر كابينەتىنە ءبىلىم ءمينيسترى رەتىندە ەندى.
كەيىنگى جىلدارى قۇرىلعان ۇكىمەتتەردە ءارتۇرلى لاۋازىمدارعا تاعايىندالعان تراسس 2021 جىلدىڭ قىركۇيەگىنەن بەرى ۇلىبريتانيانىڭ سىرتقى ىستەر ءمينيسترى قىزمەتىن اتقارىپ كەلەدى.
بۇعان دەيىن تراسس حالىقارالىق ساۋدا ءمينيسترى رەتىندە اتقارعان قىزمەتى ارقىلى كوپشىلىككە تانىلعان ەدى. الايدا جەرگىلىكتى حالىقتىڭ ءبىر بولىگى تراسستى حالىقارالىق ساۋدا مينيسترلىگىن «ينستاگرام مينيسترلىگىنە» اينالدىردى دەپ سىنادى. Instagram پاراقشاسىن بەلسەندى تۇردە جۇرگىزەتىن تراسس كەيدە فەرمالاردا, اۋە كەمەلەرى مەن تانكتەردىڭ رولىندە, كەيدە الەم استانالارىنا باراتىن مىقتى ايەل وبرازى بەينەسىن قالىپتاستىرعان.
كەيىنگى كەزدە ۋكرايناعا قىزۋ قولداۋ كورسەتۋى ارقىلى «تۇماندى البيوندا» اتى شىقتى. حالىق تراسستىڭ فوتوسۋرەتتەرىندە اشىق قىزىل, كوك نەمەسە سارعىش ءتۇستى كيىم كيىپ, ۇلىبريتانيا تۋىنىڭ سيمۆولىنا ەرەكشە نازار اۋدارۋىن مارگارەت تەتچەرگە ەلىكتەۋى دەپ باعالايدى.
« ۇلىبريتانيانىڭ سىرتقى ىستەر مينيسترلىگى قىزمەتىندەگى ەكىنشى ايەل» رەتىندە بەلگىلى تراسس ەڭبەك جولىندا جاعىمدى وقيعالارمەن كوپشىلىك ەسىندە قالعان. ول ەڭ الدىمەن كونسەرۆاتيۆشىلەر پارتياسىندا سالىقتاردى ازايتۋ جانە قورعانىس شىعىندارىن ۇلعايتۋ تۋرالى كوزقاراسى قوعامدا قىزۋ قولداۋعا يە بولدى. يراندا ۇزاق ۋاقىت بويى ۇستالعان ەكى اعىلشىن ازاماتىنىڭ بوساتىلۋىن قامتاماسىز ەتتى.
ۋكرايناداعى سوعىس كەزىندە رەسمي كيەۆكە كورسەتكەن قولداۋى جانە ماسكەۋگە قارسى سانكتسيا جاريالاۋداعى بەلسەندى ءرولى دە ليز تراسس تۋرالى وڭ پىكىردىڭ قالىپتاسۋىنا ىقپال ەتتى. الدا-جالدا تراسس سايلاۋدا جەڭىسكە جەتسە, انگليا پرەمەر-ءمينيسترى اتانعان ءۇشىنشى ايەل بولماق. بىراق ساراپشىلار ونىڭ پارتيا مۇشەلەرى اراسىنداعى تانىمالدىعى جوعارى بولعانىمەن, الەمدەگى ينفلياتسيا ماسەلەسى مەن ۋكرايناداعى سوعىس كەزىندە ۇلىبريتانيانى باسقارۋعا قاۋقارى جەتپەيدى دەپ سانايدى.
ريشي سۋناكتىڭ ساياسي ارەناداعى ەڭبەك ءوتىلى بەرتىندە باستالدى. ول 2015 جىلى ۇلىبريتانيا پارلامەنتىنىڭ دەپۋتاتتىعىنا سايلاندى. 2019 جىلى قارجى ءمينيسترى لاۋازىمىنا تاعايىندالىپ, بيىلعى 5 شىلدەگە دەيىن وسى قىزمەتتى اتقاردى. سول كۇنى ارىپتەسى, دەنساۋلىق ساقتاۋ ءمينيسترى ساجيد دجاۆيد پرەمەر-مينيستر بوريس دجونسونمەن كەلىسپەيتىنىن انىق ايتقاننان كەيىن سۋناك تا قىزمەتتەن كەتەتىنىن جاريالادى.
سۋناك پەن ءدجاۆيدتىڭ قىزمەتىنەن كەتۋى دجونسوننىڭ پرەمەر-مينيستر قىزمەتىنە نۇكتە قويدى. ريشي سۋناك كارانتين كەزەڭىندە حالىقتىڭ جاپپاي جۇمىسسىز قالۋ ماسەلەسىن شەشۋدە ۇسىنعان ەكونوميكالىق قولداۋى كوپشىلىكتىڭ ىقىلاسىنا يە بولدى. دەگەنمەن سالىقتىڭ تومەن دەڭگەيىن جاقتايتىنىن ايتقان سۋناك پاندەميادان كەيىن ەكونوميكانى قالپىنا كەلتىرۋدى جەدەلدەتۋ ءۇشىن جاساعان ارەكەتى 1950 جىلداردان بەرى ۇلىبريتانياداعى ەڭ ۇلكەن سالىق اۋىرتپالىعىنا جول اشتى.
ايتسە دە, سۋناكتى تۇرعىندار جاپپاي قولداي قويۋى ەكىتالاي. ول پاندەميا ءورشىپ تۇرعاندا پرەمەر-مينيستر بوريس دجونسونمەن بىرگە مەرەكەلىك شاراعا قاتىسىپ, كوروناۆيرۋستىق شەكتەۋ شارالارىن بۇزعانى ءۇشىن ايىپپۇل تولەگەن ەدى. سونداي-اق سۋناقتىڭ ۋكراينا-رەسەي قاقتىعىسىنا قاتىستى ماسەلەدە دە مۇددەسىن كوزدەۋى حالىققا ۇناي قويعان جوق. ريشي سۋناك پەن ونىڭ ايەلى Infosys IT كومپانياسىنا يەلىك ەتەدى. اتالعان كومپانيا ءساۋىر ايىندا رەسەيدەن شىعاتىنىن جاريالادى.
ۋكرايناداعى ارنايى وپەراتسيا باستالعاننان كەيىن لوندون ماسكەۋگە قارسى سانكتسيالار ەنگىزگەن. بىراق سۋناك ءبىراز ۋاقىت رەسەي نارىعىندا تابىس تابۋدى جالعاستىرىپ, ۇلىبريتانيانىڭ باسقا كومپانيالارىن رەسەيگە ينۆەستيتسيا سالۋدان باس تارتۋعا شاقىرعان. ريشي مىرزانىڭ وسى ارەكەتى ۇكىمەت باسشىسى لاۋازىمىنا تاعايىندالۋىنا كەدەرگى بولۋى مۇمكىن.
قورىتا ايتقاندا, ءدال قازىر «تۇماندى البيوندا» جاڭا پرەمەر-مينيستر لاۋازىمى كىمگە بۇيىراتىنى قىزىق بولىپ تۇر. «داۋنينگ-ستريتتە» الداعى ۋاقىتتا كىم وتىراتىنى 5 قىركۇيەكتە انىقتالادى.
