دانيالىق Novo Nordisk كومپانياسى قۇرىلعاننان بەرى قانت ديابەتىن, سەمىزدىكتى جانە باسقا سوزىلمالى اۋرۋلاردى ەمدەۋگە ارنالعان ينسۋلين جانە «وزەمپيك», «ۆيكتوزا» سياقتى بىرقاتار ءدارى-دارمەكتى شىعارۋعا مامانداندىرىلعان.
مەموراندۋمعا قول قويۋ راسىمىندە مينيستر قانت ديابەتىنە قوسا, نەگىزگى الەۋمەتتىك ماڭىزى بار ينفەكتسيالىق ەمەس اۋرۋلاردىڭ الدىن الۋ مەن باسقارۋدى جەتىلدىرۋ, سونداي-اق قازاقستاننىڭ فارماتسەۆتيكالىق سالاسىن ودان ءارى دامىتۋدا وسى ارىپتەستىكتىڭ ماڭىزدىلىعىن اتاپ ءوتتى.
«بۇگىنگى مەموراندۋم اياسىندا قول جەتكىزىلگەن ۋاعدالاستىقتار ءبىزدىڭ دەنساۋلىق ساقتاۋ سالاسىنداعى ەكىجاقتى ىنتىماقتاستىعىمىزعا قوسىمشا سەرپىن بەرەدى دەپ ۇمىتتەنەمىن», دەدى ا.عينيات.
ءوز كەزەگىندە تمد دامۋشى ەلدەرى ءوڭىرىنىڭ, «نوۆو-نورديسك قازاقستان» جشس باس مەنەدجەرى الي بەنگي جوسپارلانعان ءىس-شارالاردى تولىق جانە ساپالى جۇزەگە اسىرۋدا جان-جاقتى قولداۋ كورسەتۋگە دايىن ەكەنىن ءبىلدىردى.
مەموراندۋمعا سايكەس تاراپتار ەكىجاقتى ىنتىماقتاستىقتى بىرنەشە باعىتتا دامىتۋدى كوزدەپ وتىر. اتاپ ايتقاندا: دارىلىك زاتتاردىڭ وتاندىق ءوندىرىسىن قولداۋ جانە دامىتۋ; ديابەت جانە سەمىزدىك سالاسىندا ۇزدىكسىز مەديتسينالىق ءبىلىم بەرۋ بويىنشا جوبالاردى ىسكە اسىرۋ ارقىلى ساپالى مەديتسينالىق كومەك كورسەتۋدى جەتىلدىرۋ ماقساتىندا كادرلىق الەۋەتتى نىعايتۋ; عىلىمي جانە زەرتتەۋ الەۋەتىن ارتتىرۋ; يننوۆاتسيالىق ادىستەرگە ەرتەرەك قول جەتكىزۋ ارقىلى قانت ديابەتى جانە سەمىزدىكپەن اۋىراتىن ناۋقاستار ءۇشىن ەمدەۋ ساپاسىن ارتتىرۋ.
مىسالى, Novo Nordisk كومپانياسى سەمىزدىكتىڭ الدىن الۋ جانە ەمدەۋ ماسەلەلەرىمەن اينالىساتىن قازاقستاندىق ماماندارعا «Global obesity clinics programme» باعدارلاماسى بويىنشا وقۋعا مۇمكىندىك بەرەدى. سونداي-اق كومپانيا قازاقستاندىق فارماتسەۆتيكالىق كاسىپورىنداردىڭ ادام ءينسۋلينى پرەپاراتتارىن ءوندىرۋدى ودان ءارى جولعا قويۋى ءۇشىن بەلسەندى فارماتسەۆتيكالىق سۋبستانتسيانى ءبىزدىڭ نارىققا جەتكىزۋدى جۇزەگە اسىرۋ مۇمكىندىگىن زەردەلەۋدى جوسپارلاپ وتىر.
دۇنيەجۇزىلىك ديابەت فەدەراتسياسىنىڭ (IDF) دەرەكتەرى بويىنشا 2021 جىلى قانت ديابەتىنىڭ جاھاندىق تارالۋى 10,5%-دى (573 ملن ادام) قۇرادى جانە 2030 جىلعا قاراي 11,3%-عا, 2045 جىلعا قاراي 12,2%-عا (783 ملن ادام) دەيىن ۇلعايۋ بولجانىپ وتىر.
قازاقستاندا «قازاقستان رەسپۋبليكاسى ءۇشىن ديابەتتىڭ اۋىرتپالىعى» زەرتتەۋىنە سايكەس, وسى اۋرۋمەن اۋىراتىن ناۋقاستاردىڭ سانى 383 مىڭدى قۇرايدى جانە تۇراقتى تۇردە وسۋدە.
