«ازيا بالالارى» ويىندارى العاش رەت 1996 جىلى قازىرگى وليمپيا ويىندارىنىڭ باستاۋ العانىنا 100 جىل تولۋىنا وراي ساحا (ياكۋتيا) رەسپۋبليكاسىنىڭ پرەزيدەنتى ميحايل نيكولاەۆتىڭ باستاماسىمەن وتكىزىلگەن بولاتىن. سول جىلدان باستاپ حالىقارالىق سپورت ويىندارى ءداستۇرلى تۇردە ءار ءتورت جىلدا ءبىر رەت ۇيىمداستىرىلاتىن بولىپ بەكىتىلدى. بۇگىنگە دەيىن اتالعان بايراقتى باسەكەدە سارى قۇرلىقتاعى 30-دان استام ەلدىڭ جاس سپورتشىلارى ءارتۇرلى سپورت تۇرىنەن باق سىناپ كەلەدى. ويىندار 2019 جىلدان بەرى جازبەن قاتار, قىس مەزگىلىندە دە وتكىزىلىپ ءجۇر. ءبىر ايتا كەتەرلىگى, قازاقستان, موڭعوليا جانە قىرعىز رەسپۋبليكاسىنىڭ سپورتشىلارى «ازيا بالالارى» ويىندارىنىڭ تۇراقتى قاتىسۋشىسىنا اينالعان.
سپورتتى دامىتۋ ديرەكتسياسىنىڭ مالىمەتى بويىنشا, ۆلاديۆوستوكتاعى باسەكەدە ەل نامىسىن تاەكۆوندودان – التى, دزيۋدودان 15 سپورتشىمىز قورعايدى. جالپى, بيىلعى جارىستا ازيانىڭ 12 ەلىنەن كەلگەن 1 355 ورەن سپورتتىڭ 19 تۇرىنەن 273 مەدال جيىنتىعىن ساراپقا سالادى. «ازيا بالالارى» ويىندارى 8 تامىزدا مارەسىنە جەتەدى.
