قازاقستان دزيۋدو فەدەراتسياسىنىڭ مالىمەتى بويىنشا, ءتورت كۇنگە جالعاساتىن سارى قۇرلىق دوداسىندا تاتامي شەبەرلەرى جەكەلەي جانە ارالاس-كوماندالىق جارىس بويىنشا ءوزارا مىقتىنى انىقتايدى. حالىقارالىق دزيۋدو فەدەراتسياسىنىڭ (IJF) كۇنتىزبەسىنە سايكەس وتكىزىلەتىن جارىسقا ازيانىڭ 30 ەلىنەن 400-گە جۋىق دزيۋدوشى قاتىسادى دەپ جوسپارلانعان.
«قازاقستان دزيۋدودان الەمدىك باسەكەلەردى وتكىزۋ بويىنشا مول تاجىريبەگە يە. وسى ۋاقىتقا دەيىن حالىقارالىق دزيۋدو فەدەراتسياسى ەلىمىزگە الەمدىك ليتسەنزيالىق گران-پري جارىستارىنان بولەك, ەرەسەكتەر اراسىنداعى الەم چەمپيوناتى (2015, نۇر-سۇلتان) مەن جاسوسپىرىمدەر اراسىنداعى الەم بىرىنشىلىگىن (2019, الماتى) وتكىزۋدى سەنىپ تاپسىرعان. 2017 جىلدان بەرى ازيا دزيۋدو وداعىنىڭ كۇنتىزبەسىنە سايكەس, جىلدا ەلىمىزدە جاسوسپىرىمدەر, جاستار جانە ەرەسەكتەر اراسىندا ءداستۇرلى تۇردە ەكى رەت ازيا كۋبوگى باسەكەسى وتكىزىلىپ كەلە جاتىر. ەندى, مىنە, بيىل ازيا چەمپيوناتىن وتكىزۋ قۇقىعىنا يە بولدىق. بۇل – سپورتشىلارىمىز ءۇشىن عانا ەمەس, سونداي-اق وتاندىق دزيۋدو سپورتى جانكۇيەرلەرى ءۇشىن دە تاماشا جاڭالىق. مۇنداي ءىرى جارىستاردى ەلىمىزدە وتكىزۋ ارقىلى سپورتشىلارىمىزدىڭ تاجىريبەسىن شىڭداپ قانا قويماي, الەمدىك ارەنادا سپورت دەرجاۆاسى رەتىندە قالىپتاسقان ءيميدجىمىزدى نىعايتا تۇسەمىز. ەلوردا تاتاميىنە ازيا ۇزدىكتەرى باس قوسىپ, جاڭا ەسىمدەر شىعادى دەپ ۇمىتتەنەمىز. كۋميرلەرىنە قاراپ بوي تۇزەپ كەلە جاتقان جاس بۋىن ءۇشىن دە بۇل قۋانىشتى جاڭالىق ءارى كەرەمەت مۇمكىندىك دەپ ويلايمىن», دەيدى قازاقستان دزيۋدو فەدەراتسياسى پرەزيدەنتىنىڭ مىندەتىن اتقارۋشى اسحات جىتكەەۆ.
ۇلتتىق قۇراما باپكەرلەرىنىڭ شەشىمىمەن ەلىمىزدە وتەتىن سارى قۇرلىق باسەكەسىندە قازاقستاننىڭ ەرلەر جانە ايەلدەر قۇراماسى ساپىنان نەگىزگى جانە قوسالقى قۇرام سپورتشىلارى قاتىسادى. ۇلتتىق قۇراما ساپىنداعى دزيۋدوشىلار ءۇشىن قۇرلىقتىق باسەكە جىلدىڭ باستى دوداسى – 6-13 قازان ارالىعىندا وزبەكستان استاناسى – تاشكەنتتە ۇيىمداستىرىلاتىن الەم چەمپيوناتىنا دايىندىق جۇمىسى بولسا, قۇراما قاتارىنا ەندى عانا قوسىلعان جاس دزيۋدوشىلار ءۇشىن ەلورداداعى ازيا چەمپيوناتى سياقتى ءىرى جارىستىڭ اتموسفەراسىن سەزىنىپ, تاجىريبە جيناۋعا مۇمكىندىك بەرمەك.
ايتا كەتەرلىگى, IJF ەرەجەسى بويىنشا, ازيا چەمپيوناتىنىڭ جەڭىمپازدارى مەن جۇلدەگەرلەرىنە وليمپيادالىق رەيتينگتە ۇپاي ساندارى قوسىلادى. اتاپ ايتقاندا, جەڭىمپاز سپورتشى 700 ۇپاي ەنشىلەسە, 2-ورىن يەگەرىنە – 490, ال 3-ورىن العان سپورتشىعا 350 ۇپاي بەرىلەدى.
