نەللي 1957 جىلدىڭ 29 شىلدەسىندە دۇنيەگە كەلدى. ول تاجىكستاننىڭ سولتۇستىك بەتكەيىندە ورنالاسقان سوگدي وبلىسىنىڭ شۋراب اۋىلىندا تۋعانىمەن, سپورتشى رەتىندە قازاقستاندا قالىپتاستى. بولاشاق جۇلدىزدىڭ بالاۋسا شاعىندا اتا-اناسى شىمكەنتكە قونىس اۋدارعان. سول جاقتا كيم جەرگىلىكتى جاتتىقتىرۋشى ۆلاديمير ءبايديننىڭ قول استىندا سپورتتىق گيمناستيكانىڭ قىر-سىرىنا قانىعىپ, ۋاقىت وزا بيىك بەلەستەردى باعىندىردى.
جەتپىسىنشى جىلدارى سپورتتىڭ بۇل تۇرىندە كىلەڭ جۇلدىزدار ءبىر-بىرىمەن سايىسقا ءتۇسىپ, اسا ءىرى حالىقارالىق جارىستاردىڭ جۇلدەلەرىن ءوزارا ساراپقا سالىپ ءجۇردى. سولاردىڭ اراسىنان ليۋدميلا تۋريششەۆا, ولگا كوربۋت, ەلەنا مۋحينا, ەلۆيرا ساادي (كسرو), ناديا كومەنەچي, تەودورا ۋنگۋريانۋ (رۋمىنيا), كارولا دومبەك, اننەلورا تسينكە, انگەليكا حەلمان (گدر), مارتا ەگەرۆاري (ماجارستان) جانە تاعى باسقالاردى بولە-جارا اتاپ وتسەك, ەش ايىبى جوق. سولاردىڭ قاتارىندا ءبىزدىڭ نەللي دە بولدى.
قازاقستاندىق گيمناسشى وداق كولەمىندەگى جارىستاردا وزعان سوڭ, حالىقارالىق دودالاردا باق سىناي باستادى. 1974-1980 جىلدارى ول الەم چەمپيوناتىندا 11 رەت (5 التىن+4 كۇمىس+2 قولا) جەڭىس تۇعىرىنا كوتەرىلدى. ەۋروپا بىرىنشىلىگىندە توعىز مارتە (2+3+4) ولجاعا كەنەلدى. 1976 جىلى مونرەالدا الاۋى تۇتانعان وليمپيا ويىندارىندا نەللي كيم ەركىن جاتتىعۋ مەن قولدى تىرەپ جاسالاتىن جاتتىعۋدا ەڭ جوعارى 10 ۇپايدى يەلەنىپ, باس جۇلدەنى ولجالادى. سونىڭ الدىندا عانا ءدال سونداي كورسەتكىشكە كومەنەچي دە قول جەتكىزگەن ەدى. وسىلايشا, ولاردىڭ ەسىمدەرى اسا جوعارى باعاعا يەلىك ەتكەن تۇڭعىش گيمناسشىلار رەتىندە تاريحتا قالدى. بۇل تارتىستا ول ليۋدميلا تۋريششەۆا, كارولا دومبەك جانە ناديا كومەنەچيدى ارتتا قالدىردى. سونداي-اق جەرلەسىمىز كوماندالىق باسەكەدە التىن الىپ, كوپسايىستا كۇمىسپەن كۇپتەلدى.
1980 جىلى ماسكەۋ وليمپياداسىندا كيم ەكى رەت تەڭدەسسىز دەپ تانىلدى. ەركىن جاتتىعۋدا ول ناديا كومەنەچيمەن بىردەي ناتيجە كورسەتسە, ماكسي گناۋك پەن ناتاليا شاپوشنيكوۆا ءۇشىنشى ورىندى يەلەندى. كوماندالىق سايىستا وتە كۇشتى باسەكەلەستىك ءوربىدى. قۇرامىندا كومەنەچيدەن بولەك, ەميليا ەبەرلە, روديكا دۋنكا, مەليتا ريۋن, كريستينا گريگوراش جانە دۋميتريتسا تۋرنەر سىندى مىقتىلارى بار رۋمىنيالىقتار وتە كۇشتى قارسىلىق كورسەتتى. قولا مەدالدى قاناعات تۇتقان گدر-دىڭ دا باستاپقىداعى قارقىنى قاتتى بولدى. دەسەك تە, بۇل باسەكەدە كسرو گيمناسشىلارى الدارىنا جان سالمادى. التىننان القا تاققاندار اراسىندا ەلەنا داۆىدوۆا, ناتاليا شاپوشنيكوۆا, ماريا فيلاتوۆا, ستەلل زاحاروۆا جانە ەلەنا نايمۋشينامەن بىرگە ءبىزدىڭ نەللي كيم دە بار ەدى.
ۇلكەن سپورتتان قول ۇزگەننەن كەيىن وتانداسىمىز وڭتۇستىك كورەيا, يتاليا جانە بەلارۋس قۇرامالارىن جاتتىقتىردى. باسقا دا مەملەكەتتەردە باپكەرلىك قىزمەت اتقاردى. الەمدەگى ەڭ بەلدى تورەشىلەردىڭ ءبىرى رەتىندە كوپتەگەن ءدۇبىرلى دودادا قازىلىق ەتتى. 2004 جىلى كيم حالىقارالىق گيمناستيكا فەدەراتسياسى تەحنيكالىق كوميتەتىنىڭ ءتورايىمى بولىپ سايلاندى.
بۇل كۇندەرى نەللي كيم اقش-تىڭ ميننەاپوليس قالاسىندا تۇرىپ جاتىر.
