جاقىندا تۇركىستان قالاسىندا وقو اكىمى جانىنداعى «ىرىس الدى ─ ىنتىماق» قوعامدىق فورۋمى مەن وبلىستىق قازاقستان حالقى اسسامبلەياسىنىڭ بىرلەسكەن جيىنى ۇيىمداستىرىلدى. بۇل باسقوسۋ «تۇراقتىلىق تۇعىرى ─ تاتۋلىق» دەپ اتالدى. قوجا احمەت ياساۋي اتىنداعى قازاق-تۇرىك ۋنيۆەرسيتەتى مادەنيەت ورتالىعىنىڭ ۇلكەن ءماجىلىس زالى ۇلىستىڭ ۇيىتقىسى اتانعان وڭتۇستىكتىڭ بارلىق اۋداندارى مەن قالالارىنان جينالعان جۇرتشىلىققا لىق تولدى. ولاردىڭ ىشىندە قازاقتان باستاپ وزبەك, ورىس, تۇرىك, تاجىك, كورەي, تاتار, نەمىس, ۋكراين, گرۋزين, ازەربايجان, گرەك, كۇرد, تاعى باسقا دا كوپتەگەن ۇلتتاردىڭ وكىلدەرى بار.
مادەنيەت ورتالىعىنداعى جيىن باستالعانعا دەيىن بىرنەشە ساعات بويى اۋداندار مەن قالالاردان بارعان دەلەگاتسيالار تۇركىستان شاھارىنداعى جاڭادان ىسكە قوسىلعان قۇرىلىس نىساندارىن تاماشالاعان بولاتىن. اسىرەسە, ازىرەت سۇلتان كەسەنەسىنىڭ قارسى بەتىندەگى بۇرىنعى قيقى-جيقى قۇجىرالاردىڭ ورنىنا ەڭسەلەنە بوي كوتەرگەن زاماناۋي كورمەلەر زالى, قولونەر ءۇيى, زياراتشىلار مەيمانحاناسى سياقتى عيماراتتار كەرەمەت ۇنادى. رۋحاني ورتالىقتاردىڭ كونەلەرى قاتارىندا سانالاتىن شاھاردىڭ كوركەيۋى قاي قازاقستاندىقتىڭ دا ماقتانىش سەزىمىن تۋىنداتارى ءسوزسىز. سونىمەن, بىرلەسكەن جيىن دا باستالدى. وبلىس اكىمى اسقار مىرزاحمەتوۆ «تۇراقتىلىق تۇعىرى – تاتۋلىق» اتتى بايانداماسىندا ەلباسىنىڭ: «بەيبىتشىلىك پەن كەلىسىمدى نىعايتۋ – «قازاقستان-2050» ستراتەگياسىن جۇزەگە اسىرۋدىڭ باستى كريتەريى» دەگەن قاعيداتىنان باستاپ, وبلىستا اتقارىلىپ جاتقان ىزگى ىستەر, سونداي-اق, ىنتىماق پەن بىرلىكتى, تاتۋلىقتى, سايىپ كەلگەندە, تاۋەلسىزدىكتى كۇن سايىن نىعايتۋ جونىندەگى مىندەتتەرگە كەڭىنەن توقتالدى.
جيىنعا قاتىسۋشىلار, جارىسسوزگە شىققاندار «ىرىس الدى – ىنتىماق» قوعامدىق فورۋمىنىڭ وبلىستىق اسسامبلەيامەن, وزگە دە ۇيىمدارمەن بىرگە جۇزەلەگەن جاقسى ىستەرى تۋرالى اعىنان جارىلا ايتتى. «ىرىس الدى – ىنتىماق» قوعامدىق فورۋمى وبلىس باسشىسىنىڭ باستاماسىمەن 2009 جىلعى 22 ناۋرىزدا – ۇلىستىڭ ۇلى كۇنىندە, وسى تۇركىستاندا تۇساۋىن كەسكەن ەدى. بەس جىلدىڭ ىشىندە قىرۋار جۇمىستار اتقارىلدى. قازىعۇرت تاۋىنىڭ باۋرايىندا, مارتوبەدە, ورداباسى تاۋىندا, جەتىسايدا, تولە بي اۋدانىندا, اقسۋ-جاباعىلى قورىعى ماڭىندا, سونداي-اق, وبلىس ورتالىعىندا بىرنەشە رەت ۇزىن سانى جيىرمادان اسا جالپى جيىن ۇيىمداستىرىلىپ, ولاردا الۋان ءتۇرلى تاقىرىپتار تالقىلاندى.
قازىر بارلىق اۋداندار مەن قالالاردا, كوپتەگەن اۋىلدار مەن مەكتەپتەرگە دەيىن «ىرىس الدى – ىنتىماق» فورۋمدارى جۇمىس ىستەيدى. فورۋمنىڭ بەس جىلدىعىنا ارنالعان تۇركىستان جيىنىندا استانادان كەلگەن سەناتور يكرام ادىربەكوۆ, ۇلتتىق عىلىم اكادەمياسىنىڭ پرەزيدەنتى مۇرات جۇرىنوۆ اسا باعالى پىكىرلەرىن ورتاعا سالدى. ۇلتارالىق دوستىقتىڭ باعاسىن ءبىلۋ, قازاق حالقىنىڭ مەيماندوستىعى مەن كەڭپەيىلدىلىگىن قادىرلەپ, بۇگىنگى جاس ۇرپاققا, اسىرەسە, وزگە ۇلت وكىلدەرىنىڭ جاستارىنا ۇعىندىرۋ جونىندەگى ۇسىنىستارى جۇرتشىلىققا ۇنادى. باسقا دا ءسوز العان ءتۇرلى ۇلت وكىلدەرى قوعام قايراتكەرلەرىنىڭ ويلارىن ىقىلاسپەن قولدادى.
فورۋم مەن جەرگىلىكتى اسسامبلەيانىڭ بىرلەسكەن باسقوسۋىندا ماعان دا ءسوز بەرىلدى. مەن پرەزيدەنتىمىزدىڭ: «قازاقتى قاسيەتتى قاراشاڭىراققا بالاساق, ەلىمىزدەگى بارشا ەتنوستار – سول شاڭىراققا شانشىلعان ۋىقتار», دەگەن ءسوزىن قاتتى قاستەرلەيمىن. شىركىن, قازاعىمنىڭ كەڭدىگىنە ەشقانداي كەرەمەتتى تەڭگەرە المايمىن. ءبىز قازاق حالقىنىڭ توزىمدىلىگىن, اقجۇرەكتىلىگىن قاشان دا قادىرلەي بىلۋگە ءتيىسپىز. وڭتۇستىكتىڭ قاي ۇلتىنىڭ زيالىلارى دا مۇنى تەرەڭ تۇسىنەدى دەپ ويلايمىن. شاڭىراعىمىز بيىك, ۋىقتارى بەرىك بولا بەرسىن.
اكاباي حۋدايكۋلوۆ,
وڭتۇستىك قازاقستان وبلىستىق قازاقستان حالقى اسسامبلەياسى توراعاسىنىڭ ورىنباسارى, وبلىستىق تاجىك ەتنومادەني بىرلەستىگىنىڭ توراعاسى, ماقتارال اۋدانىنىڭ قۇرمەتتى ازاماتى.
