تاياۋدا شاعىن قالانىڭ ورتالىعىندا ۇلكەن ەكران پايدا بولدى. تۇرمىستىق قالدىقتى قوقىس جاشىگىنىڭ ماڭايىنا قالاي بولسا-سولاي لاقتىرا سالاتىن تۇرعىنداردىڭ ابەس ارەكەتى ءدال سول ۋاقىتتا وسى الىپ ەكراندا كورىنىس تاۋىپ, اشكەرە بولادى. ءار اۋلاداعى قوقىس الاڭىنىڭ تۇسىنا ارنايى كامەرالار ورناتىلعان. بۇل بەينەقۇرىلعىلار قوقىس جاشىگىنىڭ ماڭايىندا بولىپ جاتقان قيمىل-قوزعالىستىڭ ءبارىن تاسپاعا ءتۇسىرىپ تۇرادى.
قالانى لاستاۋشىلاردى اشكەرەلەگىش ەكران جەرگىلىكتى اكىمدىكتىڭ قارجىسىنا ورناتىلىپتى. ال قورشاعان ورتاعا جاناشىر ەكوبەلسەندىلەر ءار كامەراداعى ۆيدەونى جيناپ, شاعىن بەينەتۇسىرىلىم جاساپ شىعارادى دا, الگى ەكران ارقىلى جالپى جۇرتقا جاريا ەتەدى. وسىلايشا, «قوقىس قاھارماندارى» بۇكىل قالا جۇرتشىلىعىنا ماسقارا بولادى.
الايدا كەيبىر تۇرعىندار ماسەلەنىڭ مۇنىمەن شەشىلە قوياتىنىنا كۇدىكپەن قارايدى. ويتكەنى كوممۋنالدىق قىزمەت كەنشىلەر شاحارىنداعى تۇرمىستىق قالدىقتاردى سىرتقا اپتاسىنا ءبىر-اق رەت شىعارادى. سالدارىنان قوقىس كونتەينەرلەرىنىڭ ماڭىندا اياق باساتىن جەر قالماي قالادى. «قوقىس جاشىكتەرى اۋزى-مۇرنىنان اقتارىلىپ تولىپ تۇرسا, ۇيدەن شىققان تۇرمىستىق قالدىقتى جاشىكتىڭ جانىنا تاستاماعاندا, قايدا تاستايمىز؟ تەك قايتادان ۇيگە الىپ كىرۋ عانا قالادى. ءبىز اقشاسىن تولەپ وتىرمىز عوي», دەيدى جۇرت.
ال اشكەرە ەكرانىنا ءتۇسىپ قالعان بەس-التى تۇرعىن تاياۋدا عانا اكىمشىلىك جاۋاپكەرشىلىككە تارتىلىپ, 24 مىڭ تەڭگەدەن ايىپپۇل ارقالاعان.
قوستاناي وبلىسى,
رۋدنىي قالاسى
