توبەلەستىڭ ۆيدەوسى الەۋمەتتىك جەلىدە تاراپ جاتىر.
الماتى قالالىق پوليتسيا دەپارتامەنتىنىڭ مالىمەتىنشە, 26 شىلدەدە تۇنگى ساعات ءبىر شاماسىندا الماتى حالىقارالىق اۋەجايى اۋماعىنداعى تۋريستىك پوليتسيا بەكەتىنىڭ قۇرامىنداعى پوليتسيا قىزمەتكەرلەرىنە ەر ادام كەلىپ, كولىك تۇراعىندا توبەلەس بولىپ جاتقانىن ايتقان.
«اقپارات راستالدى, انىقتالعانىنداي ىشىمدىك ىشكەن ءۇش ەر ادام توبەلەس شىعاردى. ولار پوليتسيا قىزمەتكەرلەرىنىڭ تالابىنا اگرەسسيامەن جاۋاپ بەردى. توبەلەسۋشىلەردىڭ ءبىرى, بۇرىن سوتتالعان 1994 جىلى تۋعان ۋ. ەسىمدى ازامات سىرانىڭ شىنى بوتەلكەسىن سىندىرىپ, پوليتسەيگە قاراي جۇگىرىپ, ونى سوققىعا جىقپاق بولدى. اۋىر قىلمىستىڭ جولىن كەسكەن ءتارتىپ ساقشىسى قىزمەتتىك قارۋىنان اسپانعا ەسكەرتۋ وق اتتى», دەپ حابارلادى قالالىق پوليتسيادان.
ناتيجەسىندە توبەلەسكە قاتىسۋشىلار ۇستالدى. ولار - الماتى جانە تۇركىستان وبلىستارىنىڭ تۇرعىندارى. ەكەۋى - ادام توناعانى جانە بوتەننىڭ مۇلكىن ۇرلاعانى ءۇشىن بۇرىن سوتتى بولعان.
«ولاردىڭ ارەكەتى قك-ءنىڭ 293-بابى 2-بولىگى – بۇزاقىلىقپەن سارالانىپ, قاماۋعا الىندى. اتالعان دەرەك بويىنشا سوتقا دەيىنگى تەرگەۋ باستالدى», دەپ اتاپ ءوتتى ۆەدومستۆودان.
سونىمەن قاتار قىزمەتتىك قارۋدى قولدانۋ دەرەگى بويىنشا تەكسەرۋ تاعايىندالدى.
