«ا» توبىندا باق سىناپ جاتقان الماتىلىق كلۋب بۇل تۋردا «اقسۋدى» قابىلداپ, اسا تارتىستى وتكەن ويىندا 3:2 ەسەبىمەن جەڭىسكە جەتتى. توپتاعى ەكىنشى ويىندا «ورداباسى» سىرت الاڭدا «اتىراۋدىڭ» قاقپاسىنا ءتورت گول سالدى – 4:1. تۋردىڭ باستى سەنساتسياسىن «ۆ» توبىنداعى «قايسار» كلۋبى تىركەدى. پرەمەر-ليگانىڭ ءۇش كومانداسىنا قارسى ويناپ جاتقان قىزىلوردالىقتار ءۇش تۋردا دا قارسىلاستارىنان باسىم ءتۇستى. ءۇشىنشى تۋردا «قاسقىرلار» اقتاۋعا ساپار شەگىپ, جەرگىلىكتى «كاسپي» كلۋبىن 2:1 ەسەبىمەن تىزە بۇكتىردى. «اقجايىق» ءوز الاڭىندا «قىزىلجاردى» قاپى قالدىردى – 1:0.
«س» توبىنداعى «توبىل» كونفەرەنتسيا ليگاسىنداعى ويىندارىنا بايلانىستى «ماقتارالمەن» بولعان ويىندا جاستار قۇرامىن شىعارىپ, ءوز الاڭىندا وتكەن ماتچتا ءىرى ەسەپپەن جەڭىلىپ قالدى – 1:4. ال توپتاعى ەكىنشى ويىنداعى «اقتوبە» مەن «تاراز» اراسىنداعى ماتچتا ەسەپ اشىلمادى – 0:0. «د» توبىنداعى كۆارتەتتىڭ ەكى ويىنىندا دا جەڭىمپاز كوماندا انىقتالمادى. تۇركىستاندا «تۇرانمەن» كەزدەسكەن ەلوردانىڭ «استاناسى» 1:1 ەسەبىمەن ۇپاي بولىسۋگە ءماجبۇر بولسا, «جەتىسۋ» ءوز الاڭىندا «شاحتەرمەن» تەڭ وينادى – 0:0.
