كەزدەسۋگە جامبىل وبلىسىنىڭ اكىمى نۇرجان نۇرجىگىتوۆ, وبلىستىق ءماسليحات پەن جەرگىلىكتى اتقارۋشى ورگان وكىلدەرى, اۋدان اكىمدەرى قاتىستى.
ت.دۇيسەنوۆا قازىرگى ەڭبەك نارىعىندا بولىپ جاتقان وزگەرىستەر تۋرالى ايتتى. ۇلتتىق ستاتيستيكا بيۋروسىنىڭ اقپاراتىنا سايكەس, جامبىل وبلىسىندا جالدامالى جۇمىسشىلاردىڭ سانى 1,2 مىڭعا كوبەيگەن. ال ءوزىن ءوزى جۇمىسپەن قامتىعاندار سانى 2,3 مىڭ ادامعا ازايعان. جۇمىسسىزدىق دەڭگەيى – 5,1%, جاستار اراسىنداعى جۇمىسسىزدىق دەڭگەيى – 3,1%.
جامبىل وبلىسىندا 15-28 جاس ارالىعىنداعى جاستاردىڭ سانى – 221 مىڭ. بۇل – وبلىس حالقىنىڭ 19%-ى. وسىعان وراي مينيستر جاستاردى جۇمىسپەن قامتۋدىڭ ماڭىزىنا توقتالدى.
«جامبىل وبلىسىنداعى جاستاردىڭ سانى 2030 جىلعا قاراي 64 مىڭ ادامعا كوبەيىپ, 286 مىڭعا جەتەدى. ال 2040 جىلعا قاراي بۇل كورسەتكىش تاعى 100 مىڭعا ارتادى. ەكونوميكالىق بەلسەندى جاستاردىڭ سانى 2030 جىلعا قاراي 149 مىڭعا دەيىن كوبەيىپ, ەڭبەك نارىعىنا كۇش تۇسىرەتىنى انىق. مەكتەپتەگى بىلىممەن قالعان جاستاردىڭ ۇلەسى – 18%, ال جوعارى ءبىلىمى بار جاستاردىڭ ۇلەسى – 39%. وڭىردە جۇمىسپەن قامتىلعان 157 مىڭ جاستىڭ 101 مىڭى – جالدامالى جۇمىسشىلار», دەدى ت.دۇيسەنوۆا.
مينيستر بيىلعى 6 ايدا وبلىستا 27 مىڭنان اسا ادامنىڭ جۇمىسقا ورنالاسقانىن اتاپ ءوتتى. ونىڭ باسىم كوپشىلىگى – 17 مىڭنان اسا ازامات جۇمىسپەن قامتۋ ورتالىقتارى ارقىلى جۇمىسقا تۇرعان.
«ۇلتتىق جوبالار اياسىندا اشىلىپ جاتقان تۇراقتى جۇمىس ورىندارىنىڭ كورسەتكىشى تومەن. جامبىل, جۋالى, تۇرار رىسقۇلوۆ, مويىنقۇم اۋداندارىندا بۇل جۇمىس مۇلدە جۇرگىزىلمەگەن. سارىسۋ اۋدانىندا 9 ادام عانا ۇلتتىق جوبالار اياسىندا جۇمىسپەن قامتىلعان.
مونيتورينگ جۇرگىزۋ تارتىبىنە ساي, جۇمىسقا تۇرعان ازاماتتار مىندەتتى زەينەتاقى جارنالارىمەن, جەكە تابىس سالىعىنىڭ بار-جوعىمەن راستالادى. جامبىل وبلىسىندا بۇل كورسەتكىش 48% بولىپ وتىر. وبلىس دەڭگەيىندە ەڭ تومەنگى كورسەتكىش جامبىل جانە سارىسۋ اۋداندارىندا تىركەلگەن», دەدى مينيستر.
ت.دۇيسەنوۆا جامبىل وبلىسىنىڭ وڭىرلىك كارتاسىندا كوزدەلگەن 4 576 تۇراقتى جۇمىس ورنىنىڭ بيىلعى جارتى جىلدا 433-ءنىڭ عانا اشىلعانىن اتاپ ءوتتى. ال وسى وڭىرلىك كارتادا كوزدەلگەن 235 ۇلتتىق جوبانىڭ 123-ءى عانا ەلەكتروندى ەڭبەك بيرجاسىنا ەنگىزىلگەن.
«ەلەكتروندى ەڭبەك بيرجاسىنا ەنگىزىلگەن ۇلتتىق جوبالار اياسىندا جاريالانعان جۇمىس ورىندارىنىڭ تالداۋ ناتيجەلەرى: جامبىل وبلىسى بويىنشا جاريالانعان 1 999 ورىننىڭ 520-سىنا بەلگىلى ءبىر بىلىكتىلىك تالاپتارى قويىلعان, ال 1 479-ىنا تالاپ جوق. وسى جۇمىس ورىندارىنا جىبەرۋگە بولاتىن جۇمىسسىزداردىڭ دا ساپاسىن قارادىق. جامبىل وبلىسىندا جۇمىسسىز رەتىندە تىركەلگەن 4 816 جۇمىسسىز ادامنىڭ 2 526-نىڭ بىلىكتىلىگى بار, ال 2 290 ادامنىڭ بىلىكتىلىگى جوق.
جامبىل وبلىسىندا بوس جۇمىس ورىندارى جەتكىلىكتى ەكەنىن ەلەكتروندى ەڭبەك بيرجاسىنداعى وسى مىسالداردان كورۋگە بولادى. جۇمىسسىز قالىپ جاتقان ازاماتتارعا قولداۋ كورسەتىپ, قاجەتتى جۇمىس ورىندارىنا ورنالاسۋعا بارىنشا قولداۋ كورسەتۋ بارلىعىمىزدىڭ مىندەتىمىز ەكەنىن ۇمىتپاعانىمىز ءجون», دەدى مينيستر.
ءوڭىر اكتيۆىمەن كەزدەسۋدە قازاقستاندىقتاردى زەينەتاقىمەن قامتۋ, الەۋمەتتىك قولداۋ شارالارى, مۇگەدەكتىگى بار ادامداردى قولداۋ شارالارى دا تالقىلاندى.
