قازىر جاساندى ۇشىپ-قونۋ جولاعىنا اسفالتبەتون جابىنىن توسەپ, 2 100 مەترگە دەيىن ۇزارتۋ ارقىلى ەكى اۋە كەمەسىنە شاقتالعان جولدار مەن پەرروندى ورناتۋعا بايلانىستى جۇمىستار اياقتالدى. سول سەكىلدى پاترۋلدىك جولدى جايلاستىرۋ مەن قويما, جاعارماي ماتەريالدارىنىڭ زەرتحاناسىن سالۋعا ارنالعان جەر ۋچاسكەلەرىن دايىنداۋ جۇمىستارى ورىندالىپ ءبىتتى.
اۋەجايدى ەلەكتر ەنەرگياسىمەن قامتاماسىز ەتۋ ءۇشىن كابەلدى ورناتۋ جۇمىستارى دا اياقتالۋعا جاقىن.
بۇعان دەيىن يندۋستريا مينيسترلىگى ءۇرجار اۋەجايىنداعى قۇرىلىس-مونتاج جۇمىستارىن دەرەۋ اياقتاۋدى تاپسىرعان ەدى. جەرگىلىكتى اتقارۋشى ورگاندار جاڭعىرتۋعا قاتىستى بارلىق جۇمىستى تۋريستىك ماۋسىمنىڭ باستالۋىنا قاراي اياقتاۋدى كوزدەگەن بولاتىن. الايدا مەردىگەرلەر تاراپىنان ءتيىستى جۇمىستاردىڭ كەش ورىندالۋىنا بايلانىستى ىسكە قوسۋ مەرزىمى كەيىنگە اۋىستىرىلدى.
وتكىزىلگەن كونكۋرس قورىتىندىسىنا سايكەس ءۇرجار – الماتى جانە ءۇرجار – نۇر-سۇلتان اۋە باعىتىنداعى تاسىمالداۋ قىزمەتىن اتقارۋعا «يۋجنوە نەبو» اۆياكومپانياسى بەلگىلەندى.
رەيستەر «ان-24» اۋە كەمەلەرىمەن جازعى ماۋسىمدا ءار باعىت بويىنشا, اپتاسىنا 10 رەيس جيىلىگىمەن, قالعان ۋاقىتتا 5 رەيستەن ورىندالادى. بيلەت قۇنى 14-16 مىڭ تەڭگەنىڭ ارالىعىن قۇرايدى.
جاڭا جوندەۋ كەستەلەرىن ەسكەرە وتىرىپ, ءۇرجار اۋەجايىنداعى جوندەۋ جۇمىستارى تامىزدىڭ باسىندا اياقتالادى دەپ جوسپارلانىپ وتىر.
اباي وبلىسى,
ءۇرجار اۋدانى
