«راكۋۆ» – «استانا» – 5:0
بيىلعى ەۋروكۋبوك ويىندارىنا قاتىسىپ جاتقان قازاقستاندىق كوماندالاردىڭ اراسىنداعى ەڭ تاجىريبەلىسى, چەمپيوندار ليگاسى مەن ەۋروپا ليگاسىنىڭ توپتىق كەزەڭدەرىندە ويناعان «استانا» ەكى جىلدان بەرى جانكۇيەرلەر سەنىمىن اقتاي الماي كەلەدى. ەلوردالىق كلۋب كەيىنگى ەكى جىلدا ەۋروكۋبوك باسەكەلەرىنىڭ ءۇشىنشى اينالىمىنان ارىگە اسا المايتىن حالگە جەتتى. ءتىپتى بيىل سول مەجەدەن كورىنۋدىڭ ءوزى ۇلكەن جەتىستىك بولايىن دەپ تۇر. سەبەبى قازاقستاننىڭ التى دۇركىن چەمپيوندارى ەكىنشى ىرىكتەۋ كەزەڭنىڭ سىرت الاڭداعى العاشقى ماتچىندا پولشانىڭ «راكۋۆ» كلۋبىنان 5:0 ەسەبىمەن وڭباي جەڭىلدى. ەندى «استانا» كەلەسى كەزەڭگە شىعۋ ءۇشىن الداعى بەيسەنبى كۇنى بولاتىن ماتچتا قارسىلاس كوماندانىڭ قاقپاسىنا جاۋاپسىز التى گول سوعۋى كەرەك. ال ءوز الاڭىندا بەس گول سوققان «راكۋۆ» سىرت الاڭدا التى گول وتكىزە قويماس...
قازىر «استانا» كلۋبىنىڭ ىشىندە قانداي جاعداي بولىپ جاتقانى بىزگە بەلگىسىز, بىراق ەۋرودودا تۋرنيرلەرىنىڭ تۇراقتى قاتىسۋشىسىنا اينالعان كلۋب بيىل العاش رەت سىرت الاڭداعى كەزدەسۋگە ماتچ بولاتىن كۇنى ارەڭ جەتتى. ادەتتە كوماندالار سىرت الاڭداعى ويىندارعا ەكى كۇن بۇرىن بارىپ, كەزدەسۋ بولاتىن ستاديوندا جاتتىعۋ وتكىزىپ, جەرگىلىكتى ۋاقىت بەلدەۋىنە بوي ۇيرەتەتىن. ال كلۋب باسشىلىعىن بيىل نە تۇلەن تۇرتكەنى بەلگىسىز, ايتەۋىر فۋتبولشىلارىن ەكىگە ءبولىپ, جولاۋشىلار ۇشاعىمەن ارەڭ دەگەندە پولشاعا جەتكىزدى. ايتپەسە, ىرىكتەۋ ويىنىنىڭ جەرەبەسى وتكەن ايدىڭ 15-ءى كۇنى تارتىلىپ, قارسىلاس كوماندا 35 كۇن بۇرىن بەلگىلى بولدى. ەگەر «استانا» كلۋبىنىڭ باسشىلىعى چارتەر جالداۋعا قارجى تاپپاعان بولسا, فۋتبولشىلارىن جاياۋ جىبەرسە دە ماتچقا بەلگىلەنگەن مەرزىمنەن بۇرىن جەتكىزۋگە ۋاقىتى بولدى عوي.
ەگەر مۇنداي جاعداي ەۋروكۋبوك جارىستارىنا تۇڭعىش رەت قاتىسىپ جاتقان تاجىريبەسى از كلۋبتاردا بولسا, جانكۇيەرلەر تۇسىنىستىكپەن قارايتىن ەدى. الايدا اتاعى ەۋروپاعا جايىلعان, جىلدىق بيۋدجەتى بەس ميللياردقا جۋىق «استانانىڭ» ءوزى وسىنداي جاعدايعا دۋشار بولىپ جاتسا, باسقا كلۋبتاردىڭ جەڭىلىسىنە رەنجۋدىڭ ءوزى ابەستىك بولار.
ەڭ وكىنىشتىسى, پولشاداعى ماتچتىڭ اياقتالعانىنا باقانداي ءتورت كۇن وتسە دە, ءالى كۇنگە دەيىن «استانا» كلۋبىنىڭ باسشىلىعى جانكۇيەرلەردىڭ الدىنا شىعىپ, جەڭىلىستىڭ سەبەبىن تۇسىندىرگەن جوق. جارايدى, اقتالۋعا وتىرىك تاپپاي جاتسا, ەڭ قۇرىعىندا, الەۋمەتتىك جەلىدەگى رەسمي پاراقشالارى ارقىلى فۋتبول جانكۇيەرلەرىنەن كەشىرىم سۇراۋىنا بولار ەدى عوي. «اش قۇلاقتان, تىنىش قۇلاق جاقسى» دەدى مە ەكەن, كلۋب باسشىلىعى سول بويى جۇمعان اۋزىن اشقان جوق.
«توبىل» – «لينكولن رەد يمپس» – 2:0
وزگە كوماندالاردىڭ ويىندارىنا توقتالار بولساق, كونفەرەنتسيا ليگاسىنىڭ بيىلعى ىرىكتەۋ كەزەڭىنە قاتىسىپ جاتقان ءتورت كوماندانىڭ ىشىنەن قوستانايدىڭ «توبىلى» عانا ەكىنشى اينالىمداعى العاشقى كەزدەسۋىن جەڭىسپەن باستادى. گيبرالتاردىڭ 26 دۇركىن چەمپيونى – «لينكولن رەد يمپس» كلۋبىن قابىلداعان ەل چەمپيوندارى قوستانايداعى «ورتالىق» ستاديوندا وتكەن ماتچتا 2:0 ەسەبىمەن باسىم ءتۇستى.
گيبرالتار قۇراماسىنىڭ, ىشكى چەمپيوناتىنىڭ دەڭگەيى قازاقستانمەن سالىستىرعاندا الدەقايدا تومەن بولعانىمەن, «لينكولن» ەۋروكۋبوكتا تاجىريبەلى كوماندانىڭ ءبىرى سانالادى. سوندىقتان فۋتبول ماماندارى بۇل ويىندا «توبىلدى» تاعى ءبىر قيىن ماتچ كۇتىپ تۇر دەپ بولجاعان ەدى. قوستانايداعى كەزدەسۋدىڭ العاشقى بولىگىندە الاڭ يەلەرى قارسىلاس كوماندانىڭ قاقپاسىنا تولاسسىز شابۋىل ۇيىمداستىرعانىمەن, «لينكولن» قورعاۋشىلارى مەن قاقپاشىسى وتە ساۋاتتى ويىن كورسەتتى. ءبىرىنشى تايمدا ەسەپ اشىلعان جوق.
«توبىل» ۇزىلىستەن كەيىن دە ءبىرىنشى تايمداعى قارقىنىن ءبىر ساتكە دە باسەڭدەتكەن جوق. ناتيجەسىندە, ماتچتىڭ 65-مينۋتىندا الاڭعا قوسالقى قۇرامنان شىققان ايبار جاقسىلىقوۆ بۇرىشتامادان گول سوعىپ, «توبىلدى» ەسەپتە العا شىعاردى. «لينكولن» دا قاراپ الماي, گولدىڭ قارىمتاسىن قايتارۋدىڭ امالىن قاراستىردى. الايدا جاساعان سوققىلارى بىردە موكين قورعاعان قاقپانىڭ باعانىنا تيسە, كەلەسىدە ماڭدايشاعا ءتيىپ, كەرى سەرپىلدى. كەزدەسۋدىڭ 90-مينۋتىنا دەيىن تابلودا 1:0 ەسەبى تىركەلىپ تۇرعان ەدى. تورەشى قوسقان قوسىمشا مينۋتتىڭ العاشقىسىندا «توبىلدىڭ» قورعاۋشىسى جاركو توماشەۆيچ باسپەن گول سوعىپ, ويىننىڭ ەسەبىن 2:0-گە جەتكىزىپ, ماتچتىڭ نۇكتەسىن قويدى. العاشقى كەزدەسۋدەن كەيىن ەكى دوپ باسىمدىعىنا يە بولعان «توبىل» سىرت الاڭداعى قارىمتا ماتچتا دا ايانىپ قالمايدى دەپ ۇمىتتەنەمىز.
تۋرنير ەرەجەسىنە سايكەس, ەكى كوماندا اراسىنداعى جاۋاپتى ماتچ بەيسەنبى, ياعني 28 شىلدەدە گيبرالتاردا وتۋگە ءتيىس بولاتىن. كەيىنىرەك بۇل كەزدەسۋدىڭ ۋاقىتى سەيسەنبىگە اۋىستىرىلعانى بەلگىلى بولدى. ەندى «لينكولن» مەن «توبىل» اراسىنداعى قارىمتا ماتچ 26 شىلدەدە وتەدى.
«قايرات» – «كيشۆاردا» – 0:1
قازاقستاندىق كوماندالاردان ءبىرىنشى بولىپ كونفەرەنتسيا ليگاسىنىڭ توپتىق كەزەڭىندە ويناعان الماتىنىڭ «قايراتى» كۇتپەگەن جەردە ءوز الاڭىندا ماجارستاننىڭ ورتاڭقول كومانداسى سانالاتىن «كيشۆاردادان» جەڭىلىپ قالدى. الماتىداعى ورتالىق ستاديوندا وتكەن ويىن 0:1 ەسەبىمەن ماجارستاندىق كلۋبتىڭ پايداسىنا شەشىلدى.
90 مينۋت بويى ويىن تىزگىنىن ءوز قولدارىنا العان الماتىلىق كلۋبتىڭ ويىنشىلارىنا بۇل كەزدەسۋدە ساتتىلىك جەتىسپەدى. شەبەرلىك بويىنشا قارسىلاستارىنان ءبىر باس جوعارى تۇرعان «قايرات» فۋتبولشىلارى گول سوعۋعا قانشا تىرىسقانىمەن, وعان قارسىلاس كوماندانىڭ وكىلدەرى مۇمكىندىك بەرمەدى. ال قارسى شابۋىلعا يەك ارتقان «كيشۆاردا» فۋتبولشىلارى وزدەرىنە بەرىلگەن ءبىر عانا مۇمكىندىكتى ءساتتى پايدالانىپ, «قايرات» قاقپاسىنا گول سوعىپ كەتتى. كەزدەسۋدىڭ 82-مينۋتىندا الاڭعا قوسالقى قۇرامنان شىققان ياسير اساني كومانداسىنىڭ جەڭىس گولىن سالدى. ەكى كوماندا اراسىنداعى جاۋاپتى كەزدەسۋ 28 شىلدەدە ماجارستاندا وتەدى.
«قىزىلجار» – «وسيەك» – 1:2
ەۋروكۋبوك باسەكەلەرىنە بيىل تۇڭعىش رەت قاتىسقان پەتروپاۆلدىڭ «قىزىلجارى» دا حورۆاتيالىق «وسيەكتىڭ» وسال تۇسىن تابا المادى. ەلورداداعى «استانا ارەنا» ستاديونىندا وتكەن كەزدەسۋدە قوناقتار 1:2 ەسەبىمەن جەڭىسكە جەتتى. ءبىر قىزىعى, ەكىنشى تايمدا «قىزىلجار» قاقپاسىنا سوعىلعان ەكى گولدى دا بۇرىن قازاقستان چەمپيوناتىندا دوپ تەپكەن فۋتبولشىلار ءوز ەنشىلەرىنە جازدى. اتاپ ايتار بولساق, ءبىرىنشى گولدى كەزدەسۋدىڭ 58-مينۋتىندا 2014-2015 جىلدارى قاراعاندىنىڭ «شاحتەرىندە» ويناعان اۋستريالىق شابۋىلشى ميحرەت توپچاگيچ سالسا, جەتى مينۋتتان كەيىن ماجارستاندىق جارتىلاي قورعاۋشى لاسلو كلياينحايسلەر مەرگەندىگىمەن كوزگە ءتۇستى. قازاقستاندىق فۋتبول جانكۇيەرلەرىنىڭ ەسىندە بولسا, لاسلو 2018 جىلى «استانا» ساپىندا ونەر كورسەتىپ, ەل چەمپيونى اتانعان بولاتىن. ال ماتچتىڭ اياقتالۋىنا التى مينۋت قالعاندا, ياعني 84-مينۋتتا حورۆاتيالىق جارتىلاي قورعاۋشى داركو نەياشميچ ابايسىزدا ءوز قاقپاسىنا گول سوعىپ الىپ, تارازى باسىن قىسقارتتى – 2:1. ەندى قارىمتا ماتچ 28 شىلدە كۇنى حورۆاتيادا وتەدى.
