«قازىرگى ۋاقىتتا رەسپۋبليكا بويىنشا ۆاكتسينالاۋ جانە رەۆاكتسينالاۋ جۇمىسى جالعاسىپ جاتىر. قازاقستاندا ۆاكتسينانىڭ ءۇش ءتۇرى قولجەتىمدى, ولار – QazVac, Sinopharm جانە Pfizer. رەۆاكتسينالاۋ ءۇشىن – QazVac جانە Sinopharm بار», دەدى روزا قوجاپوۆا ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.
ونىڭ ايتۋىنشا, ەكپە ەگۋ پۋنكتىلەرىندە 1 ملن 600 مىڭ ۆاكتسينا دوزاسى بار.
«بۇگىنگى تاڭدا كوروناۆيرۋس ينفەكتسياسىنا قارسى ۆاكتسينامەن ەرەسەك تۇرعىنداردىڭ 80%-دان استامى نەمەسە بارلىق حالىقتىڭ 56%-دان استامى قامتىلعان. رەسپۋبليكا بويىنشا كوروناۆيرۋس ينفەكتسياسىنا قارسى باستاپقى رەۆاكتسينالاۋمەن قامتۋ ءتيىستى حالىقتىڭ 68%-دان استامىن (4,9 ملن ادام) قۇرادى. ورتا ەسەپپەن تاۋلىگىنە 10 مىڭنان استام ادام ەكپە سالدىرادى», دەدى روزا قوجاپوۆا.
باسقارما باسشىسى مامىر ايىنىڭ سوڭىنان باستاپ ەلدە رەۆاكتسينالاۋ ەنگىزىلگەنىن ەسكە سالدى. بۇگىندە ءتيىستى حالىقتىڭ 55%-ى رەۆاكتسينا جاساتقان.
