قىزىلوردا وبلىسى بويىنشا قاج دەپارتامەنتىنىڭ اۋداندىق, قالالىق پروباتسيا قىزمەتىنىڭ ەسەبىندەگى سوتتالعاندارعا ەلەكتروندى بىلەزىكتەر تاعىلدى. ەلەكتروندى باقىلاۋ قۇرالى ەڭ الدىمەن جازا وتەۋ ءتارتىبىن ۇنەمى بۇزىپ, قايتا قىلمىس جاساعان 32 سوتتالعانعا تاعىلدى.
«قارماقشى اۋداندىق پروباتسيا ەسەبىندەگى ا. ەسىمدى ازاماتقا ەلەكتروندى بىلەزىك تاعىلدى. ول اكىمشىلىك اۋماقتىق بىرلىك شەگىنەن تىس جەرگە كەتىپ, بىرنەشە رەت جازا وتەۋ شارتتارىن بۇزعان. ەندىگى جەردە سوتتالعاندى جازا وتەۋ مەرزىمى اياقتالعانعا دەيىن ەلەكتروندى باقىلاۋ قۇرالى ارقىلى باقىلاپ, كۇندىزگى جانە تۇنگى مەزگىلدە قاداعالاۋ جۇمىستارى جەڭىلدەي تۇسپەك. كەلەسى سوتتالعان دا جالاعاش اۋداندىق پروباتسيا قىزمەتىنىڭ ەسەبىندەگى ازامات قر قك-ءنىڭ 120-بابىنىڭ 1-بولىگىمەن سوت ۇكىمىمەن كىنالى دەپ تانىلىپ ءۇش جىل شارتتى جازاعا سوتتى بولىپ, پروباتسيا ەسەبىندە ءجۇرىپ, ءتارتىپ بۇزعانى ءۇشىن جازا مەرزىمى ءۇش ايعا ۇزارتىلعان. بۇل ازاماتقا دا ەلەكتروندى بىلەزىك تاعىلدى», دەدى پروباتسيا قىزمەتىنە باسشىلىق جاساۋ توبىنىڭ اعا ينسپەكتورى سابيگۇل تلەۋوۆا.
ونىڭ ايتۋىنشا, بۇل ەلەكتروندى بىلەزىك سوتتالعانداردى باقىلاۋ جاساۋعا, تۇرعىلىقتى مەكەنجايىن تاستاپ كەتپەۋگە, قايتا جاساۋى مۇمكىن قىلمىستىڭ الدىن الۋعا سەپتىگى مول. بىلەزىك تاعىلعان سوتتالعانداردى پروباتسيا ينسپەكتورلارى ارنايى پلانشەتتەر ارقىلى باقىلايدى. ەگەر سوتتالعان جازا وتەۋ ءتارتىبىن بۇزسا, نەمەسە بىلەزىكتى وزدىگىنەن شەشۋگە تىرىسسا دابىل سيگنالى ءتارىزدى بەلگى تۇسەدى.
