زاماناۋي جوبانىڭ جەتەكشىسى داۋرەن عابدۋللاەۆتىڭ ايتۋىنشا, جاڭا قۇرىلعىنىڭ ءبىرىنشىسى – ەكسپوزيتسيالىق-گولوگرافيالىق كەشەنى. مۇندا مۋزەي قورىنداعى جادىگەرلەردىڭ ءار تۇستان تۇسىرىلگەن 3D سۋرەتتەرى كورىنىس بەرەدى. وعان مۋزەي قورىنداعى 100 جادىگەر ەنگىزىلدى. بۇل زاماناۋي قۇرىلعى ءۇش بولىكتەن تۇرادى. ونىڭ جوعارعى بولىگىندە جادىگەرلەر ۆيرتۋالدى تۇردە 23 ديۋيمدىق كەڭ فورماتتى ديسپلەي ارقىلى ۇسىنىلادى. ورتاڭعى بولىگى گولوگرافيالىق ەلەمەنت ەكسپوناتتارى انيماتسيالىق 3D ەففەكتىمەن كورسەتۋگە ارنالعان. ال تومەنگى بولىگىندە ناقتى ەكسپونات ءار قىرىنان بۇرۋ ەلەمەنتتەرى ارقىلى كورسەتىلەدى.
ەكىنشى جاڭا قۇرىلعى – «مۋزەيتانۋ» باعدارلامالىق-ينتەراكتيۆتى كەشەنى. بۇل قۇرىلعىدا مۋزەيدىڭ تاريحى مەن جادىگەرلىك قورى, بولىمشەلەرى مەن بولىمدەرى تۋرالى دەرەكتەر, زالدار بويىنشا ۆيرتۋالدى تۋرلار, مۋزەيدى باسقارعان باسشىلاردىڭ ءومىرباياندارى, مۋزەيدىڭ تاريحي وقيعالارىنىڭ مۋلتيمەديالىق ماتەريالدارى, فوتوگالەرەيا, 3D جادىگەرلەر بار.
– جاڭا قۇرىلعىلارعا ولكە تاريحى مەن قوردا ساقتاۋلى تۇرعان قۇندى جادىگەرلەر ەنگىزىلىپ جاتىر. ەندى مۋزەيگە كەلۋشىلەر جاڭا تەحنولوگيا ارقىلى جادىگەرلەر تۋرالى ماعلۇماتپەن تانىسۋعا مۇمكىندىك الدى, – دەيدى مۋزەي ديرەكتورىنىڭ مىندەتىن اتقارۋشى دينارا بيسەمباەۆا.
اتىراۋ وبلىسى
