ۆەدومستۆونىڭ ءساۋىر ايىندا تاراتقان دەرەكتەرىنە سەنسەك, 1,2 ميلليوننان استام جول قوزعالىسى ەرەجەسىنىڭ بۇزىلۋ دەرەگى تىركەلىپتى. ولاردىڭ قاتارىندا ىشىمدىك ءىشىپ رۋلگە جارماساتىنداردىڭ دا قاراسى باسىم بولعان. ستاتيستيكالىق دەرەكتەرگە زەر سالساق, ماس كۇيىندە كولىك باسقارعان ازاماتتاردىڭ سانى 5,7 مىڭعا جەتكەن. وكىنىشتىسى دە وسى بولىپ تۇر. ال جامبىل وبلىسىندا جاعداي قالاي؟
وڭىردە ۇيىمداستىرىلعان «قاۋىپسىز جول» جەدەل الدىن الۋ ءىس-شاراسى بارىسىندا پاترۋلدىك پوليتسيا باتالونىنىڭ قىزمەتكەرلەرى شەتەلدەردە ەسەپتە تۇرعان اۆتوكولىكتەردىڭ جالعان قۇجاتتارىن پايدالانۋدىڭ 20 دەرەگىن انىقتادى. پوليتسيا قىزمەتكەرلەرى رەسپۋبليكالىق ماڭىزى بار «باتىس ەۋروپا –باتىس قىتاي» اۆتوجولىندا جول قوزعالىسى ەرەجەلەرىن بۇزعانى ءۇشىن شەتەلدىك ەسەپتە تۇرعان Toyota Estima ماركالى اۆتوكولىگىن توقتاتتى. قۇجاتتاردى تەكسەرۋ كەزىندە ەر ادام پوليتسيا قىزمەتكەرلەرىنە كولىك قۇرالىن تىركەۋ تۋرالى جالعان كۋالىك بەرگەنى جانە اتالعان اۆتوكولىك قۇجاتتا كورسەتىلگەن ەلدىڭ تىركەۋ ەسەبىندە تۇرمايتىنى انىقتالدى.
ءىس-شارا بارىسىندا تىركەلگەن بارلىق 20 دەرەككە قاتىستى قازاقستان رەسپۋبليكاسى قىلمىستىق كودەكسىنىڭ 385-بابى 3-بولىگى «جالعان قۇجاتتاردى, ءمورتابانداردى, مورلەردى, بلانكىلەردى, پوشتا تولەمىنىڭ مەملەكەتتىك بەلگىلەرىن, مەملەكەتتىك ناگرادالاردى قولدان جاساۋ, دايىنداۋ نەمەسە وتكىزۋ» بويىنشا سوتقا دەيىنگى تەرگەۋ امالدارى باستالدى جانە ساراپتاما تاعايىندالدى.
«وڭىردە ۇيىمداستىرىلعان «قاۋىپسىز جول» جەدەل-الدىن الۋ ءىس-شاراسىنىڭ العاشقى كۇنىنەن باستاپ, جەرگىلىكتى پوليتسيا قىزمەتىنىڭ قىزمەتكەرلەرى 4 200-دەن استام جول قوزعالىسى ەرەجەسىن بۇزۋدى تىركەدى جانە ماس كۇيىندە اۆتوكولىكتى باسقارعان 23 جۇرگىزۋشىنى ۇستادى. سونىمەن قاتار ايىپپۇل تۇراعىنا 118 كولىك قويىلدى», دەيدى جامبىل وبلىسىنىڭ پوليتسيا دەپارتامەنتى جەرگىلىكتى پوليتسيا قىزمەتى باسقارماسىنىڭ باستىعى, پوليتسيا پولكوۆنيگى راحىمبەردى اشكەەۆ.
