قونىس اۋدارۋشىلاردىڭ ەڭبەككە جارامدىلارى دارىگەر, مەدبيكە, مۇعالىم, ەلەكتر مامانى, اسپاز, كەن ورىندارىنداعى ماشينيست كومەكشىسى, مەنەدجەر, ينجەنەر, ەسەپشى, سلەسار, ەلەكتر دانەكەرلەۋشىسى, تەاتر ءارتىسى سياقتى ماماندىقتار بويىنشا جۇمىسقا ورنالاساتىن بولادى.
– ەڭ باستى مىندەت – وڭتۇستىك وڭىرلەردەن جانە شەتەلدەن قونىس اۋدارعان ادامداردى لايىقتى جۇمىسپەن قامتۋ ماسەلەسىن رەتتەۋ. ارنايى ءبىلىمى جوق نەمەسە ماماندىعى سۇرانىسقا ساي ەمەس ازاماتتار كاسىبي دايارلىق كۋرستارىنان وتەدى. سونداي-اق بوس نەمەسە سۋبسيديالانعان جۇمىس ورىندارىنا ورنالاستىرۋ ماسەلەسى قاراستىرىلىپ وتىر. ونىڭ ۇستىنە, بىزدە «ۇرپاقتار كەلىسىمشارتى», «كۇمىس جاس» سەكىلدى جاڭا جوبالار بار. ماسەلەن, وڭىرگە وتكەن جىلى كوشىپ كەلگەن ەڭبەككە قابىلەتتى ازاماتتاردىڭ 96%-ى جۇمىسپەن قامتىلدى, – دەيدى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ ورىنباسارى ايدا قۇسايىنوۆا.
باسقارما باسشىسى ورىنباسارىنىڭ ايتۋىنشا, توبىل-تورعاي وڭىرىنە قونىس اۋداراتىن قانداستاردىڭ 98%-ى وزبەكستاننان كوشىپ كەلەدى ەكەن. ال ەلىمىزدىڭ وزگە وڭىرلەرىنەن قونىس اۋداراتىنداردىڭ ىشىندە الماتى, ماڭعىستاۋ, تۇركىستان وبلىستارى مەن شىمكەنت, استانا قالالارىنىڭ تۇرعىندارى بار. ولاردى جۇمىس ورىندارىمەن عانا قامتىپ قويماي, باسپانا ماسەلەسىنىڭ شەشىلۋىندە دە قولداۋ كورسەتۋ كوزدەلىپ وتىر. ماسەلەن, جاڭا قونىس اۋدارعان وتباسىنداعى ءار ادامعا 70 اەك مولشەرىندە سۋبسيديا بەرىلەدى. سونداي-اق جاڭا كوشىپ كەلگەن وتباسىلارعا تۇرعىن ءۇي جالداپ تۇرعانى ءۇشىن تولەم جاسالادى. تولەم كولەمى باسپانا جالىنا تولەنەتىن ايلىق اقىنىڭ قالالىق نەمەسە اۋىلدىق ەلدى مەكەندەگى مولشەرىنە, سونىمەن قاتار وتباسىنداعى جان باسىنا قاراي بەلگىلەنەدى.
– بۇل الەۋمەتتىك كومەكتىڭ مولشەرى ورتا ەسەپپەن, ايىنا 15-30 اەك شاماسىندا بولادى. ءبىر سوزبەن ايتقاندا, وڭىرگە كوش باسىن بۇرعان اعايىن قولداۋسىز قالمايدى. بارىنشا كومەك كورسەتىپ, قۇشاق جايا قارسى الامىز. توبىل وڭىرىندە بوس جۇمىس ورىندارى دا جەتكىلىكتى. سوندىقتان قونىس اۋدارۋشىلاردىڭ جۇمىسسىز قالمايتىنىنا سەنىمدىمىز, – دەيدى ا.قۇسايىنوۆا.
جالپى, سوڭعى بەس جىل ىشىندە وڭىرگە «ەڭبەك» باعدارلاماسى بويىنشا بەس مىڭعا جۋىق ادام قونىستانعان. ونىڭ ءۇش مىڭنان استامى – ەلىمىزدىڭ جۇمىس ورىندارى تاپشى وڭىرلەرىنەن كەلگەن ەڭبەككە جارامدى ازاماتتار. مۇنىڭ سىرتىندا, اتاجۇرتقا ورالعان
1 300 قانداس بار.
قوستاناي وبلىسى
