باتىس قازاقستان وبلىسى ورتالىعىنداعى كۇرەتامىر كوشەلەردىڭ بىرىندە ورتا جوندەۋ جۇمىسى ەكى اي بۇرىن باستالعان. مەردىگەر التى اي ىشىندە ءۇش شاقىرىمدىق جول قۇرىلىسىن تولىق بىتىرۋگە ۋادە بەرىپ وتىر.
مەردىگەر كومپانيا ديرەكتورى, ورال قالالىق ءماسليحاتىنىڭ دەپۋتاتى جاننا كەنجينانىڭ ايتۋىنشا, قازىر جۇمىسشىلار كونە اسفالت جابىنىنىڭ جوعارعى قاباتىن فرەزامەن كەسىپ الىپ جاتىر. بۇل كونە اسفالت قالا شەتىندەگى مۇلدەم جولسىز كوشەلەرگە توسەلمەك. وسى جول قۇرىلىسىن 30 ادام, 25 تەحنيكا جۇمىلدىرىلعان. قازىردىڭ وزىندە 1,6 كم جول جوندەۋ جۇمىسى اياقتالىپتى. كەپىلدىك مەرزىمى – 5 جىل.
– قالا تۇرعىندارىنىڭ, اسىرەسە قوعامدىق كولىكتەردىڭ قوزعالىسىنا كەدەرگى كەلمەس ءۇشىن كوشەنى تولىق جاپپادىق. بۇل جۇمىستى ءبىرشاما قيىنداتتى. ايتسە دە بەلگىلەنگەن مەرزىمنەن كەشىكپەيمىز. قۇرىلىسقا قاجەت قيىرشىق تاستى اقتوبەدەن تاسىمالدايمىز. ۆاگون ماسەلەسىندە قيىندىق بار. شىڭعىرلاۋدان وزينكىگە دەيىنگى تەمىر جولدىڭ بارلىق بولىمشەسىندە جالعىز تەپلوۆوز ءجۇر. بۇل تۋرالى جاۋاپتى ورگاندارعا ۇنەمى ايتىپ وتىرامىز, – دەيدى جاننا كەنجينا.
قازاقستان رەسپۋبليكاسى پارلامەنتى ءماجىلىسىنىڭ دەپۋتاتى سنەجاننا يماشەۆا قالا تۇرعىندارى تاراپىنان كوشە جولدارىن جوندەۋ جونىندە ءوتىنىش كوپ تۇسەتىنىن ايتادى.
سونداي-اق سنەجاننا يماشەۆا بىرنەشە كۇننەن بەرى وبلىستىڭ بىرقاتار اۋدانىندا حالىقپەن جۇزدەسىپ, الەۋمەتتىك نىساندار مەن ينجەنەرلىك كوممۋنيكاتسيالار قۇرىلىسىمەن تانىستى. دەپۋتات كەيبىر تۇرعىنداردىڭ ءوتىنىشى مەن ۇسىنىسىن جەرگىلىكتى جانە رەسپۋبليكالىق دەڭگەيدەگى ۋاكىلەتتى ورگاندار الدىندا كوتەرمەك.
باتىس قازاقستان وبلىسى
