جالاقى بەرەشەگى – 34 ملن تەڭگە
ءمينيستردىڭ دەرەگىنە سۇيەنسەك, اتىراۋ وبلىسىندا 9,5 مىڭنان استام كاسىپورىن مەن مەكەمە جۇمىس ىستەيدى. وندا 278 مىڭ جالدامالى قىزمەتكەر ەڭبەك ەتەدى. وڭىردە كومپانيالارداعى 242 مىڭ جۇمىسكەردى قامتي وتىرىپ, جۇمىس ورىندارىن ساقتاۋ بويىنشا 3,7 مىڭ مەموراندۋمعا قول قويىلعان. ءىرى جانە ورتا كاسىپورىنداردىڭ 97,8 پايىزى قىزمەتكەرلەرىمەن ۇجىمدىق شارتتار جاسالعان. ال 109 كاسىپورىن جالاقىسى تومەن 108 مىڭ قىزمەتكەرلەردىڭ ەڭبەكاقىسىن 5-تەن 50%-عا دەيىن كوتەرگەن. الايدا ەڭبەك جانجالى تۋىنداۋ قاۋپى جويىلماعان كاسىپورىندار بار.
– جەرگىلىكتى اتقارۋشى ورگاندار ەڭبەك جانجالىنىڭ الدىن الۋعا جانە جول بەرمەۋگە ءتيىس. جۇمىس بەرۋشىلەردىڭ ۇجىمدىق شارتتار مەن مەموراندۋمدارعا سايكەس جۇمىس ورىندارىن ساقتاۋ جونىندەگى مىندەتتەرىن ورىنداۋىنا تۇراقتى مونيتورينگ جاسالۋى كەرەك. جۇمىسشىلاردىڭ ەڭبەك جاعدايى مەن جالاقى دەڭگەيىنە ۇنەمى ساۋالداما جۇرگىزۋ قاجەت, – دەدى ت.دۇيسەنوۆا.
ءمينيستردىڭ ايتۋىنشا, مۇنايلى وڭىردە جالاقى قارىزى جويىلماعان كاسىپورىندار ءالى دە بار. قازىر 9 كاسىپورىندا جالپى سوماسى 34 ملن تەڭگەنى قۇرايتىن ەڭبەكاقى بەرەشەگى قالىپتاسىپ وتىر.
– اكىمدىك وبلىستىق پروكۋراتۋرا, قارجى جانە ادىلەت ورگاندارىمەن بىرلەسە جالاقى, الەۋمەتتىك اۋدارىمدارعا قاتىستى بەرەشەكتى وتەۋدىڭ ەگجەي-تەگجەي جوسپار-كەستەسىن ازىرلەۋگە ءتيىس. سوعان سايكەس جالاقى جونىندەگى ىقتيمال بەرەشەكتى انىقتاۋ, جۇمىسكەرلەردى جۇمىستان بوساتۋ, الەۋمەتتىك اۋدارىمداردى تولەۋدىڭ تومەندەۋىنە مونيتورينگ جۇرگىزىلگەنى ءجون, – دەدى مينيستر.
ت.دۇيسەنوۆانىڭ پىكىرىنشە, شەتەلدىك جۇمىس كۇشىن تارتاتىن جۇمىس بەرۋشىلەر ءتيىستى زاڭدىلىقتى ساقتاي بەرمەيدى. ماسەلەن, اتىراۋ وبلىسىندا بيىل وندىرىستە 21 قىزمەتكەر زارداپ شەككەن. ونىڭ ۇشەۋى قازا تاپقان. سول سەبەپتەن, زاڭبۇزۋشىلىققا جول بەرگەن جۇمىس بەرۋشىلەرگە پارمەندى شارالار قابىلداپ, وڭىرلىك ۇشجاقتى كوميسسيادا تەكسەرۋ ناتيجەلەرىن قاراۋدى ۇسىنىپ وتىر.
– وبلىس اكىمدىگى ەڭ كوپ جازاتايىم وقيعاعا جول بەرگەن جۇمىس بەرۋشىنىڭ ارقايسىسىمەن قاۋىپسىز ەڭبەك جاعدايىن قامتاماسىز ەتۋ جونىندەگى ءىس-شارالار جوسپارىن ازىرلەپ, ورىندالۋىن مىندەتتى تۇردە باقىلاۋى قاجەت. مەملەكەتتىك ەڭبەك ينسپەكتورلارى وندىرىستىك جاراقات الۋدى ازايتۋ ماقساتىندا كاسىپورىندارعا پروفيلاكتيكالىق باقىلاۋ جۇمىستارىن كۇشەيتۋگە ءتيىس, – دەپ تاپسىرما بەردى ت.دۇيسەنوۆا.
جول كارتاسىنىڭ ىقپالى تيە مە؟
جىلىوي اۋدانىنداعى «تەڭىز» كەن ورنىندا كەلەشەك كەڭەيتۋ جانە ۇڭعىما ەرنەۋىنىڭ قىسىمىن باسقارۋ جوبالارىن ىسكە اسىرۋ اياقتالۋعا جاقىندادى. قازىر اتالعان ەكى جوبانىڭ 93%-ى ورىندالىپ, جۇمىسشىلاردى بوساتۋ باستالدى. وسىعان بايلانىستى ەڭبەك جانە حالىقتى الەۋمەتتىك قورعاۋ مينيسترلىگى جوبادان بوساتىلاتىنداردى جۇمىسقا ورنالاستىرۋ جونىندە جول كارتاسىن ازىرلەدى. جول كارتاسىنا ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا, اتىراۋ وبلىسىنىڭ اكىمى سەرىك شاپكەنوۆ پەن «تەڭىزشەۆرويل» جشس باس ديرەكتورى كەۆين لايون قول قويدى.
– وسى كەزگە دەيىن اتالعان جوبالاردان 7,6 مىڭنان استام قىزمەتكەر بوساتىلدى. ونىڭ ىشىندە 1,1 مىڭ جۇمىسشى «تەڭىزشەۆرويل» جشس-ءنىڭ وزگە جوبالارىنا, 449 ادام باسقا كومپانيالارعا جۇمىسقا ورنالاستىرىلدى. الايدا جەرگىلىكتى اتقارۋشى ورگانداردىڭ جوبادان بوساتىلعان قىزمەتكەرلەردى جۇمىسقا ورنالاستىرۋ دەڭگەيى تومەن. قازىر ەلەكتروندى ەڭبەك بيرجاسىندا 108 مىڭ بوس جۇمىس ورنى بار. ونىڭ ىشىندە ىسكە اسىرىلىپ جاتقان ۇلتتىق جوبالار شەڭبەرىندە 10,4 مىڭ بوس جۇمىس ورنى تۇر. جۇمىس ورىندارىنىڭ 12 جانە 25%-ى – تەحنيكالىق ماماندىقتار. اكىمدىكتەر جوبادان بوساتىلعانداردى جۇمىسقا ورنالاستىرۋدى جانداندىرۋى قاجەت, – دەدى ت.دۇيسەنوۆا.
ونىڭ ايتۋىنشا, مينيسترلىك ازىرلەگەن جول كارتاسى «تەڭىزدەگى» جوبادان بوساتىلعانداردى جۇمىسپەن قامتۋدى كوزدەيدى. وندا مينيسترلىكتىڭ, وڭىرلەر اكىمدىكتەرىنىڭ «تەڭىزشەۆرويل» جشس-مەن, قوسالقى مەردىگەر مەكەمەلەرمەن ءوزارا ءىس-قيمىلىنىڭ ناقتى الگوريتمى ناقتىلانعان.
– جۇمىستان بوساتىلعان كوپتەگەن قىزمەتكەر اتىراۋ وبلىسىنا باسقا وڭىرلەردەن كەلگەنىن ۇمىتپاعان ءجون. سوندىقتان جەرگىلىكتى اكىمدىكتەر ولاردى جۇمىسپەن قامتۋعا جاردەمدەسۋ شارالارىنا تارتۋى قاجەت, – دەپ اتاپ ءوتتى ت.دۇيسەنوۆا.
اتىراۋ وبلىسىنىڭ اكىمى س.شاپكەنوۆتىڭ ءمالىم ەتۋىنشە, «تەڭىزشەۆرويل» مەن مەردىگەر كومپانيالاردان جوسپارلى تۇردە بوساتىلعان ازاماتتاردى جاڭا جۇمىسپەن قامتۋ باعىتىنداعى جوسپار جۇزەگە اسىرىلادى. قازىر اتىراۋ وبلىسىندا جاڭا جۇمىس ورىندارىن اشۋ بويىنشا ءتيىستى جۇمىستار ءجۇرىپ جاتىر. اسىرەسە ءوڭىردىڭ كەشەندى دامۋ جوسپارى اياسىندا ناقتى جوبالار قولعا الىنعالى وتىر.
«تەڭىزشەۆرويل» جشس باس ديرەكتورى ك.لايوننىڭ پىكىرىنشە, كومپانيا جول كارتاسى اياسىندا مەملەكەتتىك ورگاندارمەن بىرلەسىپ جۇمىس ىستەۋگە دايىن. ويتكەنى وتاندىق ەكونوميكاعا كەلەشەك كەڭەيتۋ جانە ۇڭعىما ەرنەۋىنىڭ قىسىمىن باسقارۋ جوباسىنىڭ مۋلتيپليكاتيۆتى ىقپالى تيگەن.
– ءبىز اتىراۋ وبلىسىنىڭ اكىمدىگىمەن, ەنەرگەتيكا, ەڭبەك جانە حالىقتى الەۋمەتتىك قورعاۋ مينيسترلىكتەرىمەن بىرلەسكەن جۇمىستى وڭ باعالايمىز. ءتۇرلى جۇمىستاردىڭ اياقتالۋىنا وراي كەلەشەك كەڭەيتۋ جوباسى مەن ۇڭعىما ەرنەۋىنىڭ قىسىمىن باسقارۋ جوباسىنىڭ جۇزەگە اسىرىلۋىنا بىرلەسە مونيتورينگ جۇرگىزەمىز. قازىر جوبانىڭ 93%-ى ورىندالدى. جوبا باستالعالى بەرى «تەڭىزشەۆرويل» جەرگىلىكتى مامانداردى وقىتىپ, بىلىكتىلىگىن ارتتىردى. بۇل – بولاشاقتا ەلدەگى جانە شەتەلدەگى ونەركاسىپ جوبالارىندا تاجىريبەسى مەن ءبىلىمىن قولدانا الاتىن قازاقستاندىق 25 مىڭنان استام مامان. سونداي-اق جوبا حالىقارالىق كومپانيالارمەن سەرىكتەستىك ارقىلى تەحنولوگيالاردى تارتۋعا, وڭىردە جاڭعىرتىلعان ينفراقۇرىلىمداردى قالىپتاستىرۋعا ىقپال ەتتى, – دەيدى ك.لايون.
جول كارتاسىندا كوزدەلگەن ءوزارا ءىس-قيمىل الگوريتمىنە سايكەس, «تەڭىزشەۆرويل» جشس توقسان سايىن اتالعان مينيسترلىككە, وڭىرلەردىڭ اكىمدىكتەرىنە كاسىپتەر مەن وڭىرلەر بولىنىسىندە مەردىگەر جانە قوسالقى مەردىگەر كاسىپورىندار قىزمەتكەرلەرىنىڭ جۇمىستان بوساتىلۋى تۋرالى اقپاراتتى ۇسىنادى. ونى ەلەكتروندى ەڭبەك بيرجاسىنا ورنالاستىرادى.
جەرگىلىكتى اتقارۋشى ورگاندار جۇمىستان بوساتىلعان قىزمەتكەرلەردى جۇمىسپەن قامتۋعا جاردەمدەسۋدىڭ بەلسەندى شارالارىنا تارتۋ بويىنشا مىندەتتەمەلەردى ورىنداۋعا ءتيىس. ونىڭ ىشىندە قىسقا مەرزىمدى وقۋعا جىبەرۋ, سۋبسيديالاناتىن جۇمىس ورىندارىنا جانە ۇلتتىق جوبالار شەڭبەرىندە ىسكە اسىرىلاتىن جوبالارعا جۇمىسقا ورنالاستىرۋ, گرانتتار مەن ميكروكرەديتتەر بەرۋ بار.
ەڭبەك جانە حالىقتى الەۋمەتتىك قورعاۋ مينيسترلىگى «تەڭىزشەۆرويل» قىزمەتكەرلەرىن جۇمىستان بوساتۋ جانە ناقتى جۇمىسقا ورنالاستىرۋ مونيتورينگىن جۇزەگە اسىرادى. جۇمىستان بوساتىلاتىن قىزمەتكەرلەر ءۇشىن بوس جۇمىس ورىندارىنىڭ ونلاين-جارمەڭكەسىن ۇيىمداستىرادى. جۇمىسىنان ايىرىلعان ادامدارعا مەملەكەتتىك الەۋمەتتىك ساقتاندىرۋ قورىنان الەۋمەتتىك تولەم تاعايىنداۋدى قامتاماسىز ەتەدى.
اتىراۋ وبلىسى
