سۋرەتشى مارات تۇرعامباي بوياۋ جاعىسىندا ەرەكشە تاسىلدەردى پايدالانادى. باقساڭىز, كەيبىر كارتينالارىندا كارناتسيا تەحنيكاسىنىڭ اسەرى بايقالادى. كەسكىندەمەلەرى شىنايى ءارى جاندى دەتالدارعا تولى. بەينە ءبىر فوتوسۋرەت سياقتى كوڭىلىڭىزدى بىردەن باۋراپ الادى. شىنىندا, ولار گيپەررەاليزمدىك باعىتتاعى شىعارمالار بولىپ سانالادى. ماسەلەن, «ارمان» اتتى كارتيناسىن الىپ قاراڭىزشى.
كەزەكتى جۇمىسىندا سۋرەتشى پەيزاج بەن كەيىپكەردى ءوزارا بايلانىستىرادى. بۇل سيمۆوليزمگە جاقىن كارتينالاردىڭ ءبىرى دەسەك تە بولادى. سەبەبى تابيعات پەن كەيىپكەر ءبىر-بىرىمەن ۇيلەسىم تاۋىپ, تىلدەسىپ تۇر. تۋىندىنىڭ الدىڭعى پلانىندا قيالعا بەرىلگەن قىز بەينەسى كورىنسە, ارتقى پلاندا تابيعات اياسى بەينەلەنگەن. قىزدىڭ دەنە ءبىتىمى كوركەم ورىندالعان.
جالپى, كارتينادا تۇرلاۋسىز تىرشىلىكتەن مەزى بولىپ, ءبىر كۇندىك دەمالىسىن وزىنە ارناعان ارۋ كورىنىس تاپقان. ياعني تاۋ بوكتەرىنە سەيىلگە شىعىپ, قيالىنا ەرىك بەرگەن قىز وبرازى سۋرەتتەلگەن. ول سول قولىن اسپانعا سوزىپ, سامال جەلدىڭ سالقىن لەبىن سەزىنۋدە. ارمانىنا قول سوزعان بەيكۇنا جاننىڭ بەينەسىندە. قيال الەمىنە شومىپ, كەنەت ومىرىندە ءبىر ۇلى وزگەرىس بولاتىنىنا ۇمىتتەنەدى.
سۋرەتشى كەيىپكەرىن شىنايى ومىردەن العانىن, تاعدىرلى قىز ەكەنىن ايتادى. ول مەيىرىم مەن سۇلۋلىقتىڭ حانشايىمى, ايتسە دە, سويلەۋ مەن ەستۋ قابىلەتىنەن ايىرىلعان. سودان دا بولار ارۋدىڭ ارپالىسقا تولى تاعدىرى سۋرەتشىنى بەي-جاي قالدىرماعان. ونىڭ عازال عۇمىرى قىلقالام يەسىن ەلەڭدەتىپ, كوركەم شىعارما جازۋعا يتەرمەلەيدى. تالايلى تاعدىرلى ارۋدىڭ سۇلۋلىعىن وقىرمانعا جەتكىزۋ ءۇشىن وسىنداي قادامعا بارعان.
«ارمان» تۋىندىسىنداعى ارۋ ءبىر عاجايىپ ءساتتى كۇتۋ ۇستىندە. تارامىس تاعدىردىڭ تاۋقىمەتى ءبىر ساتتە توقتاپ, جاڭا ءبىر سەزىمدەردى باستان وتكىزەتىنىنە سەنەدى.
