ءۇش كۇنگە جالعاسقان ءداستۇرلى سپارتاكيادانىڭ جالپىكوماندالىق ەسەبىندە 128,5 ۇپاي جيناعان باتىس قازاقستان وبلىسىنىڭ وكىلدەرى ۇزدىك شىقتى. كەيىنگى ورىنعا اقتوبە وبلىسىنىڭ (128 ۇپاي) سپورتشىلارى جايعاسسا, ۇزدىك ۇشتىكتى پاۆلودار وبلىسى (123,5 ۇپاي) تۇيىندەدى.
وبلىس قۇرامالارىنىڭ جەكەلەگەن سپورت تۇرلەرىندەگى كورسەتكىشتەرىنە توقتالار بولساق, ۆولەيبول جارىسى بويىنشا پاۆلودارلىق مەملەكەتتىك قىزمەتكەرلەر سپارتاكيادا جەڭىمپازى اتاندى. ولار اسا تارتىستى وتكەن فينالدا تۇركىستاننان كەلگەن ارىپتەستەرىن 2:1 ەسەبىمەن تىزە بۇكتىردى. ال بقو قولا مەدال ءۇشىن بولعان ويىندا جەتىسۋ وبلىسى كومانداسىن 2:0 ەسەبىمەن جەڭدى.
قازاق كۇرەسىنەن وتكەن بەلدەسۋلەردە اتىراۋلىق بەكبول ءابۋوۆ (74 كگ), ەلوردالىق ولجاس يساحانوۆ (90 كگ) جانە اسا اۋىر سالماقتا (+90 كگ) جەتىسۋ وبلىسىنداعى كەربۇلاق اۋدانى اكىمىنىڭ ورىنباسارى ەرمەك دوسالباەۆ بارلىق قارسىلاستارىن ايقىن باسىمدىقپەن جەڭىپ, جارىس جەڭىمپازدارى اتاندى. وسى تۇستا سولتۇستىك قازاقستان وبلىسىنىڭ تيميريازەۆ اۋدانىنداعى تسەليننوە اۋىلدىق وكرۋگىنىڭ اكىمى, 56 جاستاعى بالۋان ايدار قاليجانوۆتى ەرەكشە اتاپ وتۋگە بولادى. ارداگەرلەر اراسىندا سامبو مەن قازاق كۇرەسىنەن ەل چەمپيونى اتانعان سپورتشى قولا مەدال ءۇشىن كۇرەسكەنىمەن, ەرجان تۇرعانباەۆتان جەڭىلىپ قالدى.
سۋ سپورتى تۇرلەرىنەن 50 مەترگە براسس ادىسىمەن جۇزۋدە ەرلەر اراسىندا باعجان ادىلبەك (جامبىل وبلىسى), ايەلدەر اراسىندا قاراعاندىلىق ريمما كاريموۆاعا تەڭ كەلەر ەشكىم تابىلمادى. ەركىن ستيلدە 50 مەترگە جۇزۋدە نارگيز سۋپالدياروۆا (اتىراۋ وبلىسى) التىن السا, ەرلەر اراسىندا عالىمجان احمەتوۆ (اقمولا وبلىسى) توپ جاردى. شالقالاي جۇزۋدە (50 مەتر) اقمولالىق روزا قۇلباەۆا مەن اردانات قاراتاي ۇزدىك شىقتى.
ەكى كۇنگە جالعاسقان بيليارد باسەكەسىندە تۇركىستاندىق مەملەكەتتىك قىزمەتكەرلەر باس جۇلدەگە يە بولدى. ولار فينالدا شىمكەنت قالاسىنىڭ كومانداسىن قاپى قالدىرسا, اقتوبە ءۇشىنشى ورىن ءۇشىن بولعان ويىندا پەتروپاۆلدان باسىم ءتۇستى.
ۇستەل تەننيسىنەن ەرلەر اراسىندا اقمولا وبلىسىنىڭ استراحان اۋدانىنداعى ەسىل اۋىلدىق وكرۋگىنىڭ اكىمى ەۆگەني وۆچيننيكوۆ جەڭىمپاز اتاندى. ال ايەلدەر اراسىندا وسى سپورتپەن ۇزاق جىلدان بەرى تۇراقتى شۇعىلدانىپ كەلە جاتقان جامبىلدىق ايگۇل نۇرپەيىسوۆا تۇعىردىڭ بيىك ساتىسىنان كورىندى.
شاعىن فۋتبول باسەكەسىندە قوستاناي وبلىسىنىڭ مەملەكەتتىك قىزمەتكەرلەرى فينالدا باتىس قازاقستانداعى ارىپتەستەرىنە ەش مۇمكىندىك بەرمەي, 3:0 ەسەبىمەن جەڭىسكە جەتتى. ال جەرگىلىكتى سقو كومانداسىنان باسىم تۇسكەن نۇر-سۇلتان قالاسىنىڭ فۋتبولشىلارى قولا مەدال يەگەرلەرى اتاندى.
اقىل-ويدىڭ ۇشقىرلىعىن پاش ەتەتىن توعىزقۇمالاق ويىنىنان تارتىس سوڭعى ساتتە مۇلدە قىزا ءتۇستى. بەس تۋر بويى بىردەي ناتيجە كورسەتىپ كەلگەن تۇركىستان مەن پاۆلودار وبلىستارىنىڭ ينتەللەكتۋالدارى سوڭعى 6-تۋردا بارىن سالدى. ۇزاققا سوزىلعان ويىندا پاۆلوداردان كەلگەن ويىنشىلار جەڭىستى ج ۇلىپ اكەتتى. ال جالپىكوماندالىق ەسەپتە تۇركىستان 2-ءشى, اتىراۋ 3-ورىن الدى. اقتوبە مەن بقو بەستىكتى تۇيىندەدى.
سپارتاكيادانى وتكىزۋگە مۇرىندىق بولعان مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتى وكىلدەرىنىڭ ايتۋىنشا, جارىستى ۇيىمداستىرۋداعى باستى ماقسات – وڭىرلەردەگى مەملەكەتتىك قىزمەتكەرلەر اراسىندا سالاماتتى ءومىر سالتىن ناسيحاتتاۋ, ولاردى سپورتقا تارتۋ, سپورتتىڭ بۇقارالىق سيپات الۋىنا جاعداي جاساۋ.
