وسىنىڭ الدىندا ۇكىمەت وتىرىسىندا ءسوز سويلەگەن اتالعان ۆەدومستۆونىڭ باسشىسى باعدات مۋسين كەيبىر سالالاردىڭ تسيفرلاندىرۋ ماسەلەسىندە كەم-كەتىكتەرى بارىن, جىلدىڭ اياعىنا دەيىن اقپاراتتىق جۇيەلەردى قۇرۋ ۋاقىتىن 6 ايعا دەيىن قىسقارتۋدى جوسپارلاپ وتىرعانىن جەتكىزدى. سونداي-اق ءاربىر سالا بويىنشا تسيفرلى ستراتەگيا ازىرلەنەتىنىن, ال مەملەكەتتىك ورگاندارعا قوسىمشا رەسۋرس بەرەتىن ۇلتتىق ينفراقۇرىلىم 2023 جىلدىڭ ورتاسىندا ىسكە قوسىلاتىنى بەلگىلى بولدى.
جالپى, قازاقستاندا اقپاراتتىق تەحنولوگيانىڭ وركەندەۋىنە, تسيفرلى دامۋعا ەرەكشە دەن قويىلىپ وتىر. سونىڭ ءبىر كورىنىسى – جاقىندا پرەزيدەنت «قازاقستان رەسپۋبليكاسىنىڭ كەيبىر زاڭنامالىق اكتىلەرىنە يننوۆاتسيالاردى ىنتالاندىرۋ, تسيفرلاندىرۋ, اقپاراتتىق قاۋىپسىزدىكتى دامىتۋ جانە ءبىلىم بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى. بۇل قۇجاتتا تسيفرلاندىرۋدى, يننوۆاتسيالاردى دامىتۋدى ىنتالاندىراتىن جاڭا نورمالار قاراستىرىلىپ وتىر. جاۋاپتى مينيسترلىكتىڭ حابارلاۋىنشا, زاڭنىڭ باستى ەرەكشەلىگىنىڭ ءبىرى – قازاقستان رەسپۋبليكاسى پرەزيدەنتىنىڭ «مەملەكەتتىك اپپاراتتىڭ قىزمەتىن بيۋروكراتيادان ارىلتۋ بويىنشا ءىس-شارالار تۋرالى» جارلىعىن جۇزەگە اسىرۋ ءۇشىن زاڭعا تسيفرلى ترانسفورماتسيا ەنگىزىلگەن. وندا نەعۇرلىم ءتيىمدى ۇدەرىستەردى ارتىق شىعىنسىز ەنگىزۋ, اۋىر جانە بيۋروكراتياعا تولى بيزنەس-پروتسەستەردى جاي عانا اۆتوماتتاندىرماي, ولاردى قايتا جوبالاپ, بارىنشا ساپالى ەتۋ قاراستىرىلعان. «تسيفرلى ترانسفورماتسيا ازاماتتار مەن بيزنەستىڭ, ولاردىڭ مەملەكەتتىك قىزمەتتەردى الۋ كەزىندەگى شىعىندارىن جانە مەملەكەتتىك اپپارات جۇمىسىن قامتاماسىز ەتۋگە جۇمسالاتىن شىعىنداردى قىسقارتۋعا مۇمكىندىك بەرەدى. زاڭ اياسىندا مەملەكەتتىك باسقارۋدى تسيفرلاندىرۋ كەزىندە بىرىڭعاي پلاتفورمالىق ءتاسىلدى قامتيتىن جۇيە ەنگىزۋ ۇسىنىلدى», دەلىنگەن مينيسترلىك تاراتقان حابارلامادا.
جاڭا زاڭ مەملەكەتتىك قىزمەتتەردى الۋ كەزىندە ازاماتتار مەن بيزنەستىڭ شىعىندارىن تومەندەتۋگە, اۋىل مەن قالا تۇرعىندارىنىڭ تسيفرلى تەڭسىزدىگىن ازايتۋعا, باسقارۋشىلىق شەشىمدەردىڭ تيىمدىلىگىن ارتتىرۋعا, اقپاراتتىق قاۋىپسىزدىكتى كۇشەيتۋگە, مەملەكەتتىك ورگانداردىڭ قايتالاناتىن فۋنكتسيالارىن قىسقارتۋعا مۇمكىندىك بەرمەك.
قازىرگىدەي اقپاراتتىق تەحنولوگيانىڭ دامىعان زامانىندا ەشكىم دە سابىلىپ, ءبىر قاعاز ءۇشىن بىرنەشە مەكەمەنىڭ تابالدىرىعىن توزدىرىپ جۇرگىسى كەلمەيدى. نەگىزى جاھاندى دۇرلىكتىرگەن پاندەميا ەل ازاماتتارىنىڭ تسيفرلى ساۋاتىن ەداۋىر ارتتىرعانى بەلگىلى. ويتكەنى ينتەرنەت پەن ەلەكتروندى مەملەكەتتىك قىزمەتتەر ءبىرىنشى قاجەتتىلىككە اينالدى. وسىعان ساي مەملەكەتتىك قۇرىلىمدار دا جۇمىس باعىتىن تسيفرلاندىرۋعا قاراي بۇرا باستادى.
مينيستر باعدات مۋسين بۇعان دەيىن eGov Mobile موبيلدىك قوسىمشاسىنداعى تسيفرلى قىزمەتتەرگە سۇرانىس ەكى ەسەگە وسكەنىن ايتادى. ازاماتتاردىڭ باسىم بولىگى مەملەكەتتىك قىزمەتتەردى ونلاين الۋدى ءجون كورەتىنىن ەسكەرە كەلە, مينيسترلىك ەندى EGov mobile تسيفرلى قۇجاتتار سەرۆيسىنىڭ قولدانىلۋ اياسىن كەڭەيتە ءتۇستى. ەندى ءار ازامات eGov mobile باعدارلاماسىن ءوز سمارتفوندارىنا جۇكتەي الادى, بۇل قاعاز قۇجاتتاردى الىپ جۇرمەۋگە مۇمكىندىك بەرەدى. جاڭا زاڭدا دا قاعاز قۇجاتتاردىڭ تۇپنۇسقاسى ەلەكتروندى نۇسقامەن بىردەي قابىلداۋعا مىندەتتەلدى. بۇگىنگى تاڭدا Egov mobile-دان جەكە كۋالىك, جۇرگىزۋشى كۋالىگى, تۋ تۋرالى كۋالىك, نەكە تۋرالى كۋالىك, تەگىن, اتىن, اكەسىنىڭ اتىن وزگەرتۋ تۋرالى كۋالىك, نەكەنى بۇزۋ تۋرالى كۋالىك, تەحنيكالىق پاسپورت, COVID-19 ءۇشىن پتر تەستىلەۋ ناتيجەسى, ستۋدەنتتىك بيلەت, ديپلوم, زەينەتكەر كۋالىگى, قانداس كۋالىگى, كولىك قۇرالىن تىركەۋ تۋرالى كۋالىك, الەۋمەتتىك ID, ۆاكتسينالاۋ پاسپورتى, كوپبالالى وتباسىنىڭ جاردەماقىسىن الۋ, مۇگەدەكتىك كۋالىگى, اتاۋلى الەۋمەتتىك كومەك الۋشىنىڭ كۋالىگى سياقتى قۇجاتتاردى جۇكتەپ الۋعا بولادى. ءبىر ەسكەرەتىن جايت, اقپاراتتىق جۇيەلەر بازاسىندا بار قۇجاتتاردى مەملەكەتتىك ورگانداردىڭ تالاپ ەتۋگە قۇقى جوق. بۇل زاڭمەن بەكىتىلگەنىن ەرەكشە اتاپ وتكەن ءجون. مۇنداي وزگەرىستەر مەكەمەلەرگە قۇجاتتاردىڭ قاعاز بالامالارىن, كوشىرمە جاساۋعا كەتەتىن ۋاقىت پەن اقشا شىعىندارىن ۇنەمدەۋگە باعىتتالعان.
مەملەكەت باسشىسى 2025 جىلعا قاراي كەمىندە 100 مىڭ جوعارى بىلىكتى IT-مامان دايارلاۋ مىندەتىن قويعانى بەلگىلى. مينيسترلىكتىڭ حابارلاۋىنشا, بۇگىندە قازاقستاندا ەڭبەك نارىعىندا بىلىكتى IT-كادرلاردىڭ تاپشىلىعى بايقالىپ وتىر. وسىعان بايلانىستى IT-مامانداردى دايارلاۋ ءۇشىن جاس جانە تالانتتى ستۋدەنتتەردىڭ IT-مەكتەپتەردە وقۋىن سۋبسيديالاۋ ءۇشىن گرانتتار (ۆاۋچەرلەر) بەرۋ جوباسى ىسكە قوسىلادى. وسى جوبا شەڭبەرىندە 2025 جىلدىڭ سوڭىنا دەيىن كەمىندە 20 مىڭ بىلىكتى IT-مامان دايارلاۋ جوسپارلانۋدا, دەيدى مينيسترلىك وكىلدەرى.
مينيسترلىك سونداي-اق اۋىلدىق ەلدى مەكەندەردە تۇراتىن قازاقستاندىقتار ءۇشىن «قازپوشتا» اق ينفراقۇرىلىمى بازاسىندا تسيفرلى نۇكتەلەر اشىلاتىنىن حابارلادى. سونىڭ ناتيجەسىندە كومپيۋتەرى نەمەسە ينتەرنەتى جوق اۋىل تۇرعىندارى تسيفرلى نۇكتەلەردىڭ كومەگىمەن وزدەرى قالاعان مەملەكەتتىك قىزمەتتەردى الا الادى, سونداي-اق اۋدان ورتالىقتارىنا نەمەسە قالالارعا بارماي-اق, مەملەكەتتىك ورگاندارعا ەلەكتروندى وتىنىشتەر جىبەرە الادى.
پرەزيدەنت دەنساۋلىق ساقتاۋدى تسيفرلاندىرۋ ماسەلەسىن دە قوزعادى. وسىعان بايلانىستى مينيستر ب.مۋسين دەنساۋلىق ساقتاۋدىڭ جاڭا ەلەكتروندى ارحيتەكتۋراسىن قۇرۋ بويىنشا جۇمىستار باستالعانىن, بۇل ازاماتتاردىڭ تسيفرلى ۇلتتىق دەنساۋلىق پاسپورتىن جاساۋعا مۇمكىندىك بەرەتىنىن اتاپ ءوتتى.
ۇكىمەتتىڭ كەڭەيتىلگەن وتىرىسىندا «زەردە» حولدينگىن رەفورمالاۋ جايى دا ءسوز بولدى. حولدينگكە قاتىستى وزگەرىستەر جىلدىڭ باسىندا باستالعان ەكەن. ونىڭ ءبىر قىزمەتى «تسيفرلىق ۇكىمەتتى قولداۋ ورتالىعىنا» بەرىلگەن. سونىمەن قاتار QazInnovations اگەنتتىگى مەن استانا حاب تەحنوپاركىن ءبىر ۇيىمعا, ياعني يننوۆاتسيالىق تەحنولوگيالار پاركىنىڭ قۇرامىنا بىرىكتىرۋ ارقىلى وڭتايلاندىرۋ ۇسىنىلىپ وتىر. «ال «ۇلتتىق اقپاراتتىق تەحنولوگيالار» اكتسيونەرلىك قوعامىن تىكەلەي تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ قول استىنا بەرىپ, «زەردە» حولدينگىن تاراتىپ جىبەرۋدى ۇسىندىق», دەيدى ب.مۋسين.
