تاياۋدا عانا لوندوندا وتكەن «ۋيمبلدون» تۋرنيرىندە ايدى اسپانعا شىعارىپ, باس جۇلدەنى ولجالاعان 23 جاستاعى جەرلەسىمىز الەمدىك رەيتينگتە جوعارىلاماسا دا, ماتەريالدىق تۇرعىدان ءبىراز ولجاعا كەنەلدى. ودان بولەك, ول تاعى بىرقاتار ءدۇبىرلى دودادا باق سىنادى. كەيدە ءساتتى ونەر كورسەتسە, كەيدە جەڭىلىستىڭ كەرمەك ءدامىن تاتتى دەگەندەي. جىل باسىنان بەرى ەلەنا رىباكينا 3,3 ميلليون اقش دوللارى كولەمىندە تابىس تاپتى. بۇل – جوعارىدا اتالعان رەيتينگتەگى جەتىنشى ناتيجە.
ال ۇلدە مەن بۇلدەگە ورانعانداردىڭ ءتىزىمىن يگا سۆەنتەك باستاپ تۇر. 21 جاستاعى پولشانىڭ اسا دارىندى ويىنشىسى بيىل «رولان گارروستا» توپ جارىپ, اۋستراليانىڭ اشىق بىرىنشىلىگىنىڭ جارتىلاي فينالىنا دەيىن جەتتى. سونىمەن قاتار دوحا, ينديان-ۋەللس, مايامي جانە شتۋتگارتتاعى جارىستاردا باس جۇلدەنى ولجالادى. وسىنداي جارقىن جەڭىستەرىنىڭ ارقاسىندا سۆەنتەك وسى جىلدىڭ وزىندە-اق 6,6 ميلليون دوللارعا بايىدى. قازىرگى كەزدە پولياك قىزى الەمدىك رەيتينگتە كوش باستاپ تۇر.
ەكىنشى ورىندا – رافاەل نادال. 36 جاستاعى يسپانيانىڭ داڭقتى تەننيسشىسىنىڭ باعىندىرماعان بەلەسى جوق. قازىرگى كەزدە اتر رەيتينگىندە ءتورتىنشى ورىنعا تۇراقتاعان نادال بيىل «ۇلكەن دۋلىعا» ساناتىنداعى ەكى بىردەي ءتۋرنيردىڭ جەڭىمپازى اتاندى. العاشىندا ول اۋستراليانىڭ اشىق بىرىنشىلىگىندە الدىنا جان سالماسا, كوپ كەشىكپەي رولان گارروستا دارا شىقتى. ءۇشىنشى ساتىعا كارلوس الكاراس جايعاستى. ول دا يسپانيانىڭ تۋماسى. وسىدان ەكى جىل بۇرىن عانا قالىڭ توپتىڭ اراسىندا جۇرگەن 19 جاستاعى سايىپقىران بىلتىرعى ماۋسىمدى 32-ورىنمەن قورىتىندىلاسا, قازىرگى كەزدە ۇزدىكتەر تىزىمىندە التىنشى ساتىعا تۇراقتادى. الكاراستىڭ تابىسى – 4,3 ميلليون.
سونداي-اق بيىل مول ولجاعا كەنەلگەندەر قاتارىندا نوۆاك دجوكوۆيچ (4,2 ملن), ستەفانوس تسيتسيپاس (3,6 ملن), ونس جابەر (3,4 ملن), كاسپەر رۋد (2,9 ملن), تەيلور فريتس (2,6 ملن), الەكساندر زۆەرەۆ (2,6 ملن), دانيل مەدۆەدەۆ (2,5 ملن), ەشلي بارتي (2,3 ملن), حۋبەرت حۋركاچ (2,1 ملن), فەليكس وجە-الياسسيم (2,1 ملن), اندرەي رۋبلەۆ (2 ملن) جانە ياننيك سيننەر ( 2 ملن) سىندى ساڭلاقتار بار.
