مۇنىڭ سالدارى ءوزىنىڭ كەرى اسەرىن ەكىقابات انالارعا دا تيگىزىپ جاتىر. ولاردىڭ ءبىرازى اشقۇرساق, اۋرۋشاڭ, تويىپ تاماق جەمەگەن سوڭ كەز كەلگەنىنىڭ انەمياعا (قان ازدىققا) شالدىعۋ قاۋپى دە اسا جوعارى. ونداي انالاردان قايبىر دەنى ساۋ نارەستە دۇنيەگە كەلسىن. سوندىقتان دۇنيەگە ۇرپاق اكەلەتىن انانىڭ دەنساۋلىعى دا جاقسى بولۋى كەرەك جانە ول قۇرساعىنداعى شاراناسىن دا قاجەتتى قورەكتىك زاتتارمەن قامتاماسىز ەتۋى قاجەت. ول ءۇشىن تاماعى توق, ۋايىمى جوق بولۋى كەرەك. شىن مانىسىندە ەكىقابات ايەل دە ەمىزەتىن ايەل سياقتى دۇرىس تاماقتانعاندا جانە كوڭىل كۇيى جاقسى بولعاندا عانا دۇنيەگە دەنساۋلىعى دۇرىس بالانى اكەلە الادى.
«ۇلت بولامىن دەسەڭ, ۇرپاعىڭدى ويلا!» دەيدى دانا حالقىمىز. ۇرپاق تاربيەسى – قاي زاماننىڭ, قاي قوعامنىڭ بولسىن ەڭ وزەكتى ماسەلەلەرىنىڭ ءبىرى. بالا تاربيەسىنە ەنجار قاراعان اتا-انا ەرتەڭ سان سوعارى ءسوزسىز. دەمەك الدىڭعى بۋىن وكىلدەرى الدىن الا جوسپارلى تۇردە بالانىڭ دەنساۋلىعىنا كوڭىل ءبولىپ, ونىڭ تاربيەسىن دە نازاردا ۇستاسا, بۇل ءىستىڭ ءوز ناتيجەسىن بەرەتىنى ەش كۇمان تۋعىزبايدى.
تولە بي بابامىزدان اينالاسىنداعى جاقىن جۇرگەن ادامدارى «كەيىنگى ۇرپاقتارىڭىزعا قانداي وسيەت قالدىراسىز؟» دەپ سۇراپتى. سوندا ايتقان بابامىزدىڭ «جۇزگە بولىنگەندەردىڭ ءجۇزى قارا, رۋعا بولىنگەندەردىڭ قۇرۋعا اسىققانى. اتاعا بولىنگەندەر, ادىرا قالادى. كوپتى قورلاعان, كومۋسىز قالادى. حان ازسا, حالقىن ساتادى, حالىق ازسا, حاندىققا تالاسادى» دەگەن وسيەتتى سوزدەرى ءاربىر قازاقتىڭ جۇرەگىنىڭ تورىنەن ورىن الىپ, ۇرپاقتان-ۇرپاققا بەرىلەتىن اسىل قازىنا بولىپ قالۋعا ءتيىس.
ءابدىسابىر ومەش ۇلى,
بالالار حيرۋرگى, پروفەسسور
تاراز
