زاگرەبتەگى دودا – 2024 جىلى پاريجدە ۇيىمداستىرىلاتىن وليمپيا ويىندارىنا رەيتينگتىك ۇپاي بەرەتىن ءۇشىنشى Grand Slam جارىسى. وتكەن ايدىڭ سوڭىندا موڭعوليانىڭ ۇلان-باتىر قالاسىندا ۇيىمداستىرىلعان العاشقى «ۇلكەن دۋلىعا» ساناتىنداعى جارىستا قازاقستاندىق دزيۋدوشىلار ءتورت قولا مەدال ولجالاعان بولسا, بۋداپەشتەگى ەكىنشى تۋرنيردە ۇزدىكتەر قاتارىنان كورىنە الماعانىن جوعارىدا ايتتىق. ەندى, مىنە, ەر كەزەگى ۇشكە دەيىن دەگەندەي, وليمپياداعا ۇپاي ۇلەستىرىلەتىن ءۇشىنشى Grand Slam جارىسىندا قازاقستاندىق بالۋاندار العاشقى التىن مەدالىنە قول جەتكىزدى.
جاستار اراسىنداعى 2015 جىلعى الەم چەمپيونى, بيىلعى اقپاندا ءيزرايلدىڭ تەل-اۆيۆ قالاسىندا وتكەن جارىستا قولا جۇلدە العان ماعجان شامشادين (60 كگ) حورۆاتياداعى باسەكەدە بارلىق قارسىلاسىن قاپى قالدىرىپ, زاگرەب تورىندە قازاقستاننىڭ ءانۇرانىن شىرقاتتى.
حورۆاتيا تاتاميىندەگى جارىستىڭ العاشقى اينالىمدارىندا وتانداسىمىز 22 جاستاعى كۋبالىق دانني پورتە ۆالديۆيەزو, 28 جاستاعى امەريكالىق داۆيد تەراو مەن 20 جاستاعى يسپانيالىق دجاۋمە ريكو بەرنابەۋدى جارىس جولىنان ىعىستىرسا, شيرەك فينالدا تۇرىكمەنستاندىق حاكبەردى جۋماەۆتى جەڭدى. جارتىلاي فينالدا ونىڭ جولى جاستار جانە ەرەسەكتەر اراسىنداعى ەۋروپا ويىندارىنىڭ جەڭىمپازى فرانتسيالىق تاجىريبەلى بالۋان ماكسيم مەرلينمەن قيىستى. ەۋروپالىق جارىستاردا جۇلدە الىپ جۇرگەن 24 جاستاعى فرانتسيالىق بالۋان ماعجان شامشادينمەن بەس جارىم مينۋت بويى كۇرەسىپ, وتانداسىمىزدىڭ وسال تۇسىن تابا المادى. ال باس جۇلدە ءۇشىن وتكەن تارتىستا قانداسىمىز الەم جانە ازيا چەمپيوناتىنىڭ, ازيا ويىندارىنىڭ جۇلدەگەرى اتانىپ جۇرگەن وڭتۇستىككورەيالىق كيم ۆون دجۋننان ايلاسىن اسىرىپ, التىن جۇلدەگە يە بولدى.
60 كيلو سالماقتىڭ قولا جۇلدەسىنە بىلتىر اقتاۋدا وتكەن جاستار اراسىنداعى الەم چەمپيوناتىندا التىن العان 19 جاستاعى گرۋزيالىق گيورگي ساردالاشۆيلي مەن جاستار اراسىنداعى الەم جانە ازيا چەمپيوناتتارىنىڭ جەڭىمپازى جاپونيالىق گەنكي كوگا (جاپونيا) يە بولدى. جاپونيالىق بالۋان قاتارىنان ەكىنشى Grand Slam جارىسىندا قولا جۇلدە جەڭىپ الىپ وتىر.
توكيو وليمپياداسىنان كەيىن 66 كيلوعا اۋىسقان ەلدوس سمەتوۆتىڭ ازىرشە جاڭا سالماقتا جولى بولار ەمەس. 60 كيلودا ەكى مارتە وليمپيا ويىندارىنىڭ جۇلدەگەرى, الەم چەمپيوناتىنىڭ التىن جۇلدەسىن جەڭىپ العان وتانداسىمىز زاگرەبتە نەبارى جەتىنشى ورىنعا تابان تىرەدى. العاشقى اينالىمداردا ول بىلتىرعى ەۋروپا ويىندارىنىڭ جەڭىمپازى تۇركيالىق ەيدەر توكتايدى, جاستار اراسىنداعى ەۋروپا كۋبوگىنىڭ جەڭىمپازى يزرايلدىك رونالد كوكولاەۆ جانە سەربيالىق ستراحينيا ءبۋنچيچتى جەڭگەنىمەن, شيرەك فينالدا وسى جارىستىڭ بولاشاق چەمپيونى ازەربايجاندىق ياشار نادجافوۆتىڭ وسال تۇسىن تابا المادى. سونداي-اق 100 كيلودا بەلدەسكەن نۇرلىحان شارحان دا شيرەك فينالدا ءسۇرىندى.
وزگە سپورتشىلارىمىزدىڭ ناتيجەسىنە توقتالار بولساق, بەكادىل شايمەردەنوۆ (81 كگ), ەرماحان انۋاربەكوۆ پەن ەرسۇلتان مۇزاپپاروۆ (90 كگ), ءبىرىنشى اينالىمدا سۇرىنسە, ەرلان سەرىكجانوۆ (73 كگ) پەن ەلامان ەرعاليەۆ ەكىنشى اينالىمنان ارىگە اسا المادى. ال نۇرداۋلەت امانقوسوۆ (60 كگ), الماس عالىموۆ (66 كگ), ابىلايحان جۇبانازار (81 كگ), ءادىل ورازباەۆ (+100 كگ) جارىستى ءۇشىنشى كەزەڭمەن اياقتادى.
ايەلدەر اراسىنداعى بەلدەسۋدە ەل نامىسىن عاليا تىڭباەۆا (48 كگ), سالتانات سۇلتانبەكوۆا (52 كگ), باقىت قۇساقباەۆا (57 كگ) جانە ارۋنا جانگەلدينا (78 كگ) قورعاپ, تورتەۋى دە ەكىنشى اينالىمدا ءسۇرىندى.
الەمنىڭ 69 ەلىنەن 500-دەن اسا بالۋان قاتىسقان Grand Slam جارىسىندا جالپىكوماندالىق ەسەپتە جاپونيا مەن نيدەرلاند قۇرامالارى توپ جاردى. ەكى ەلدىڭ سپورتشىلارى زاگرەبتە ەكى التىن, ەكى قولا مەدال ولجالادى. ەكىنشى ورىنعا ەكى التىن مەدالى بار كانادا قۇراماسى يە بولسا, ءبىر التىن, ەكى كۇمىس جانە ەكى قولا جۇلدە العان گرۋزيا سپورتشىلارى ءۇشىنشى ورىنعا تابان تىرەدى. ءبىر التىنى بار قازاقستان قۇراماسى 10-ورىنعا تۇراقتادى.
