تاسقالا اۋدانىنىڭ اۋىل شارۋاشىلىعى سالاسىن دامىتۋ جانە «جاسىل بەلدەۋ» جوباسىن ىسكە اسىرۋ اياسىندا اتقارىلعان جۇمىستار تۋرالى اۋدان اكىمى باۋىرجان ايتماعامبەتوۆ ايتىپ بەردى.
جالپى, تاسقالا اۋدانىنىڭ اۋماعى 806 805 گەكتاردى قۇرايدى. اۋداندا 16,5 مىڭداي حالىق تۇرادى. تۇرعىنداردىڭ ەكونوميكالىق بەلسەندى بولىگى 9 531 ادام بولسا, سونىڭ 10 پايىزى اۋىل شارۋاشىلىعى سالاسىندا ەڭبەك ەتەدى. بۇگىندە اۋداندا 459 اگروقۇرىلىم تىركەلگەن. ونىڭ 403-ءى – شارۋا قوجالىعى. بۇعان قوسا 26 جشس, 1 اق, 26 اۋىل شارۋاشىلىعى وندىرىستىك كووپەراتيۆى بار.
– جىل باسىنان اۋداندا مەملەكەت مەنشىگىنە قايتارىلعان جانە اۋداننىڭ بوسالقى جەرلەر قۇرامىنان شارۋا قوجالىقتارىنا ۋاقىتشا وتەۋلى جەر پايدالانۋ قۇقىعىن بەرۋ بويىنشا 3 كونكۋرس وتكىزىلدى. ءسويتىپ, جالپى كولەمى 223 مىڭ گەكتار قۇرايتىن 30 جەر ۋچاسكەسى شارۋالارعا بەرىلدى. سونىڭ 4 مىڭ گەكتارى – ەگىستىك, 1,3 مىڭ گەكتارى – تىڭايعان جەر, 13,2 مىڭ گەكتارى – جايىلىم, 4,8 مىڭ گەكتارى – شابىندىق. ءدال قازىر جالپى كولەمى 500 گەكتار جايىلىم جەردەن 1 جەر ۋچاسكەسىنىڭ جوباسى كونكۋرسقا دايىندالىپ جاتىر, – دەيدى ب.ايتماعامبەتوۆ.
وسى كونكۋرستار ناتيجەسىندە اۋدانعا 2 ملرد تەڭگە ينۆەستيتسيا كەلىپ, جاڭادان 100-گە جۋىق جۇمىس ورنى اشىلادى دەپ كۇتىلۋدە. ستاتيستيكالىق دەرەكتەرگە قاراعاندا, قازىردىڭ وزىندە اۋدان بويىنشا ەگىس القابىنىڭ كولەمى ۇلعايىپ كەلەدى. مىسالى, 2022 جىلى جالپى ەگىس كولەمى 42,7 مىڭ گەكتار بولدى. بۇل 2021 جىلمەن سالىستىرعاندا 2,5%-عا كوپ.
بيىل وڭىردە جاۋىن كوپ, كوكتىڭ كوتەرىلۋى جاقسى. اۋدان بويىنشا 120,4 مىڭ توننا ءشوپ دايىنداۋ جوسپارلانعان. قازىردىڭ وزىندە شابىندىققا شالعى ءتۇسىپ, 30 مىڭ توننا مال ازىعى دايىندالىپ ۇلگەرگەن.
باتىس قازاقستان وبلىسىنىڭ اكىمى عالي ەسقاليەۆتىڭ تاپسىرماسىمەن بيىل وڭىردە «جاسىل بەلدەۋ» جوباسى قولعا الىنعان ەدى. سونىڭ ىشىندە تاسقالا اۋدانىندا 252 گەكتار باۋ-باقشا ەگىلىپ, بەلگىلەنگەن جوسپار 12 گەكتارعا ارتىق ورىندالعان. سونىڭ ىشىندە 107 گەكتار كارتوپ, 115 گەكتار كوكونىس, 30 گەكتار باقشا ەگىلدى.
بىلتىر باتىس قازاقستان وبلىسىندا «مەنىڭ اۋلام – مەنىڭ باعىم» جوباسى جولعا قويىلعانىن جازعان ەدىك. 2021 جىلى تاسقالالىق 315 تۇرعىن وسى جوباعا قاتىسىپ, 9 مىڭعا جۋىق جەمىس اعاشى ەگىلگەن. بيىل كوكتەمدە تاعى 6 172 تەرەك ەگىلدى, سونىڭ ىشىندە 2 925 ءتۇپ الما اعاشى, 150 ءتۇپ ورىك, 3 235 ءتۇپ تاڭقۋراي, 3 305 ءتۇپ باسقا دا جەمىس-جيدەك بار. وعان قوسا ءساۋىر ايىندا ورال قالاسىنداعى ساياباق كووپەراتيۆتەرىمەن كەلىسسوز جۇرگىزۋ ناتيجەسىندە اۋدان ورتالىعىندا جانە شەجىن اۋىلدىق وكرۋگىندە جەمىس اعاشى كوشەتتەرىن ساتۋ جارمەڭكەسى ءۇش مارتە ۇيىمداستىرىلدى. ءسويتىپ, جالپى 937 ءتۇپ جەمىس-جيدەك كوشەتى ساتىلدى. باعدارلاما جوسپارى بيىلعى كۇزدە تولىق ورىندالادى دەيدى ماماندار.
باقشا ەگۋ سالاسىندا كوكەيكەستى ماسەلەنىڭ ءبىرى – سۋدى ءتيىمدى پايدالانۋ جايى. وسى ماقساتتا اۋداندا شارۋاشىلىقتار اراسىندا ءتۇسىندىرۋ جۇمىسى ۇنەمى جۇرگىزىلىپ كەلەدى. قازىر «شەۆچەنكو», «يشانعاليەۆ» جانە «كيرەەۆ» شارۋا قوجالىقتارى 15,5 گەكتار باۋ-باقشادا تامشىلاتىپ سۋارۋ ءادىسىن قولدانۋدا. مۇنىڭ ءبارى ءار تامشى سۋدى ۇنەمدى پايدالانۋ ءۇشىن كەرەك-اق.
باۋىرجان ەسقايىر ۇلى تاسقالا اۋدانىندا قولعا الىنعان «جاسىل ايماق» باعدارلاماسىنىڭ بولاشاعىنا سەنەدى. بۇل باعدارلاما اياسىندا 1 100 گا جەرگە اعاش كوشەتىن ەگۋ جوسپارلانعان. بيىل كوكتەمدە 1,6 گا جەرگە 5 500 ءتۇپ اعاش كوشەتى ەگىلدى. وسى جۇمىستى جۇيەلى جۇرگىزۋ ماقساتىندا بيىل اۋداندا وبلىستىق ورمان شارۋاشىلىعى مەكەمەسىنىڭ فيليالىن قۇرۋ قولعا الىنباق.
باتىس قازاقستان وبلىسى
