بۇدان بىلاي تەلەفون, ينتەرنەت بايلانىسىنىڭ ساپاسى جاقسارادى دەگەن ءۇمىت بار. ويتكەنى جاقىندا مەملەكەت باسشىسى «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى. ەندى بايلانىس جۇيەسىنە بايلانىستى كەم-كەتىكتەر, بۇزۋشىلىقتار انىقتالعان جاعدايدا بايلانىس وپەراتورلارىنا بۇرىنعىداي 100 اەك ەمەس, ونىڭ ورنىنا 1000 اەك كورسەتكىش كولەمىندە ايىپپۇل سالىنادى. بيىلعى ايلىق ەسەپتىك كورسەتكىش – 3063 تەڭگە. دەمەك زاڭدى قونىشىنان باسقاندار 3 ملن 63 مىڭ تەڭگەگە دەيىن ايىپپۇل ارقالايدى. ال ول قۇقىق بۇزۋشىلىق ءبىر جىلدىڭ ىشىندە قايتالانسا, وندا ايىپپۇل كولەمى 200-دەن 1500 اەك-كە دەيىن كوبەيەدى, دەيدى مينيسترلىك وكىلدەرى.
بۇعان دەيىن پرەزيدەنت بايلانىس سالاسىنداعى تۇتىنۋشىلاردىڭ قۇقىقتارىن قورعاۋدى كۇشەيتۋدى, ينتەرنەت-بايلانىستىڭ ناقتى پارامەترلەرى وپەراتورلار ۋادە ەتكەن دەڭگەيدەن الدەقايدا الشاقتىعى ءۇشىن جاۋاپكەرشىلىكتى ەنگىزۋدى جانە قاتاڭداتۋدى تاپسىرعان بولاتىن. «بۇل تاپسىرمانى ىسكە اسىرۋ ءۇشىن تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى دەپۋتاتتىق كورپۋسپەن بىرلەسىپ, وپەراتورلاردىڭ تۇتىنۋشىلارعا ستاندارتتار مەن تەحنيكالىق نورمالارعا جانە ساپا كورسەتكىشتەرىنە سايكەس كەلمەيتىن بايلانىس قىزمەتتەرىن كورسەتكەنى ءۇشىن جاۋاپكەرشىلىكتى كۇشەيتۋگە باعىتتالعان شارالاردى ازىرلەدى. سونىڭ ءبىرى – ايىپپۇلدى كوبەيتۋ», دەپ حابارلايدى ۆەدومستۆونىڭ ءباسپاسوز قىزمەتى.
تۇتىنۋشىلار دا بايلانىس وپەراتورىنىڭ قىزمەتىنە شاعىم جاساپ, ينتەرنەتتىڭ ناشار ساپاسىنا تەكسەرۋ جۇرگىزۋ ءۇشىن ءوتىنىش بەرۋگە بولادى. ول ءۇشىن ارىز-شاعىمدى مينيسترلىككە قاراستى تەلەكوممۋنيكاتسيالار كوميتەتىنىڭ ء(تسدياوم) نە ءتيىستى وبلىس مينيسترلىگىنىڭ اۋماقتىق بايلانىس ينسپەكتسياسىنىڭ مەكەنجايىنا «ەلەكتروندى ۇكىمەت» پورتالى, «ە-وtinish» وتىنىشتەر بەرۋ جۇيەسى ارقىلى نە قاعاز تۇرىندە جولداۋى قاجەت. وتىنىشتە شاعىمنىڭ ءمانىن, بايلانىس وپەراتورىنىڭ اتاۋىن جانە تەكسەرۋ جۇرگىزۋ ءۇشىن ءوتىنىش بەرۋشىنىڭ ناقتى مەكەنجايىن كورسەتۋ مىندەتتى.
ء«وتىنىش كەلىپ تۇسكەننەن كەيىن پروكۋراتۋرا ورگاندارىندا تەكسەرۋدى تاعايىنداۋ تۋرالى اكت تىركەلەدى. تەكسەرۋ بارىسىندا كورسەتىلەتىن بايلانىس قىزمەتتەرىنىڭ ساپاسى بويىنشا ولشەمدەر جۇرگىزىلەدى. وپەراتورعا قاتىستى بۇزۋشىلىقتار انىقتالعان جاعدايدا «اكىمشىلىك قۇقىق بۇزۋشىلىق تۋرالى» كودەكستىڭ 637-بابىنا سايكەس ايىپپۇل تۇرىندە اكىمشىلىك حاتتاما تولتىرىلادى جانە لاۋازىمدى تۇلعا بەلگىلەگەن مەرزىمگە بۇزۋشىلىقتاردى جويۋ تۋرالى نۇسقاما ەنگىزىلەدى», دەلىنگەن مينيسترلىكتىڭ حابارلاماسىندا.
