حانس-ديتەر 1965 جىلدىڭ 24 اقپانىندا نەمىستىڭ گايدەلبەرگ قالاسىندا دۇنيەگە كەلدى. ءاۋ باستا ءتۇرلى كلۋبتاردىڭ ساپىندا ونەر كورسەتكەن ول 20 جاسىندا ميۋنحەننىڭ «باۆارياسىنىڭ» جەيدەسىن كيدى. ءبىراز ۋاقىت لوتار ماتتەۋس پەن ميحاەل رۋممەنيگەنىڭ كولەڭكەسىندە جۇرگەن جارتىلاي قورعاۋشى كەيىننەن نەگىزگى قۇرامعا قابىلداندى. «باۆاريامەن» بىرگە فليك گەرمانيا چەمپيوناتىندا ءتورت رەت توپ جارىپ, ەل كۋبوگىن يەلەندى. توقسانىنشى جىلداردىڭ باسىندا ول «كەلننىڭ» ساپىندا وينادى.
ەسكى جاراقاتى ءجيى مازالاعاننان كەيىن حانس-ديتەر ۇلكەن سپورتپەن قوشتاسىپ, جاتتىقتىرۋشىلىقتىڭ قامىتىن كيدى. ءتۇرلى كوماندالاردى جاتتىقتىرىپ, 2019 جىلى ايگىلى ميۋنحەندىك كلۋبتىڭ تىزگىنىن ۇستادى. اتالعان ماماننىڭ جەتەكشىلىگىمەن «باۆاريا» ەكى رەت ەل چەمپيونى اتانىپ, كۋبوك پەن سۋپەركۋبوكتى يەلەندى. 2020 جىلى ۋەفا چەمپيوندار لياگاسى, ۋەفا سۋپەركۋبوگى جانە كلۋبتىق الەم چەمپيوناتىندا باس جۇلدەنى ولجالادى. بۇل كۇندەرى ۇلتتىق قۇرامانى جاتتىقتىرىپ جۇرگەن 57 جاستاعى حانس-ديتەر فليك جىلىنا 6,5 ميلليون ەۋرو كولەمىندە جالاقى الادى.
ەكىنشى ورىندا – 51 جاستاعى گارەت ساۋتگەيت. كەزىندە ول اپل-داعى «كريستال-پەلاس», «استون ۆيللا», «ميدلسبرونىڭ» جانە 1995-2004 جىلدار ارالىعىندا انگليانىڭ ۇلتتىق قۇراماسىنىڭ تاس-قامال قورعاۋشىسى بولدى. 2016 جىلدان بەرى ءوز ەلىنىڭ باس كومانداسىن جاتتىقتىرىپ جۇرگەن 51 جاستاعى ساۋتگەيت ءار جىل سايىن 5,8 ميلليون ەۋرونى قالتاسىنا باسۋدا.
ءۇشىنشى ورىندى داڭقتى ديدە دەشام يەلەنۋدە. جالىنداپ تۇرعان شاعىندا ول فرانتسيانىڭ «نانت», «مارسەل», «بوردو», يتاليانىڭ «يۋۆەنتۋس», انگليانىڭ «چەلسي» جانە يسپانيانىڭ «ۆالەنسياسىندا» جاسىنداي جارقىلدادى. امپلۋاسى – جارتىلاي قورعاۋشى. ءوز ەلىنىڭ ۇلتتىق قۇراماسى ساپىندا 1998 جىلى الەم چەمپيونى جانە 2000 جىلى ەۋروپا چەمپيونى اتاندى. قارت قۇرلىقتىڭ بىرقاتار بەلدى كلۋبتارىن جاتتىقتىرعان ول كوپتەگەن بيىك بەلەستى باعىندىردى. دەشامنىڭ جەتەكشىلىگىمەن فرانتسيالىق فۋتبولشىلار 2016 جىلى ەۋروپا بىرىنشىلىگىنىڭ كۇمىس جۇلدەگەرى, 2018 جىلى الەم چەمپيونى 2021 جىلى ۇلتتار ليگاسىنىڭ جەڭىمپازى دەگەن اسا مارتەبەلى اتاقتارعا قول جەتكىزدى. 53 جاستاعى ديدەنىڭ جالاقىسى 3,8 ميللون ەۋرو شاماسىندا.
سونداي-اق توپ-10 اۋقاتتى باس جاتتىقتىرۋشىلار قاتارىندا تيتە (برازيليا. 3,6 ملن ەۋرو), لۋي ۆان گال (نيدەرلاند. 2,9 ملن ەۋرو), حەراردو مارتينو (مەكسيكا. 2,9 ملن ەۋرو), ليونەل سكالوني (ارگەنتينا 2,6 ملن ەۋرو), فەليكس سانچەس باس (قاتار. 2,4 ملن ەۋرو), فەرناندو سانتۋش (پورتۋگاليا. 2,25 ملن ەۋرو) جانە مۋرات ياكين (شۆەيتساريا. 1,6 ملن ەۋرو) سىندى مايتالمان ماماندار بار. ال الەم چەمپيوناتىنا قاتىسۋشىلار اراسىندا ەڭ از جالاقى الاتىن جالەل قادري ەكەن. 50 جاستاعى تۋنيس قۇراماسىنىڭ باس جاتتىقتىرۋشىسى جىلىنا بار بولعانى 130 مىڭ ەۋرو الادى.
