وسىدان ءبىر اپتا بۇرىن قوستانايداعى «ورتالىق» ستاديوندا وتكەن ەكى كوماندا اراسىنداعى ءبىرىنشى ويىندا جەرلەستەرىمىز ءوز جانكۇيەرلەرىنىڭ الدىندا ءتاۋىر ويناعانىمەن, ماجارستاننىڭ 33 دۇركىن چەمپيونىن جەڭە الماعان ەدى – 0:0. بۇل – چەمپيوندار ليگاسىنىڭ ىرىكتەۋىنە نەبارى ەكىنشى رەت قاتىسىپ جاتقان قازاقستاندىق كوماندا ءۇشىن جاقسى ناتيجە بولعانىمەن, قوناقتار ءۇشىن ءساتسىز ويىننىڭ ءبىرى بولدى. سوندىقتان بۋداپەشتتەگى قارىمتا كەزدەسۋدە «توبىلدى» وتە قيىن ويىن كۇتىپ تۇرعانى انىق ەدى.
كوپشىلىك كۇتكەندەي, 22 مىڭ جانكۇيەر سىياتىن «گرۋپاما ارەناداعى» ماتچ «فەرەنتسۆاروشتىڭ» گولدار شوۋىمەن باستالدى. تورەشىنىڭ ىسقىرىعى شالىنا سالىسىمەن العا قاراي ۇمتىلعان الاڭ قوجايىندارى كەزدەسۋدىڭ ءۇشىنشى مينۋتىندا ءوز دەگەندەرىنە جەتىپ, ماتچتىڭ ەسەبىن اشتى. بۇرىشتامادان اسىرىلعان دوپقا ءبىرىنشى جەتكەن شابۋىلشى اداما تراورە «توبىل» قاقپاسىنا باسپەن تاماشا گول سوقتى. بۇل سوققىنىڭ الدىندا «توبىلدىڭ» قورعاۋشىلارى دا, قاقپاشى الەكساندر موكين دە دارمەنسىز قالدى. نەگىزى الاڭ يەلەرىندە ءبىرىنشى مينۋتتا-اق گول سوعاتىن تاماشا مۇمكىندىك بولعان ەدى. الايدا نيگەريالىق توكماك نگۋەننىڭ ايىپ الاڭىنىڭ ىشىنەن تەپكەن دوبى قاقپا ماڭدايشاسىنا ءتيىپ, كەرى سەرپىلدى.
شابۋىلىن ءسات سايىن ۇدەتە تۇسكەن «فەرەنتسۆاروش» فۋتبولشىلارى 17-مينۋتتا ويىنداعى ەكىنشى گولىن سوقتى. بۇل جولى دا مالي ۇلتتىق قۇراماسىنىڭ شابۋىلشىسى اداما تراورە مەرگەندىگىمەن كوزگە ءتۇستى – 2:0. ارادا ءتورت مينۋت وتكەندە ماجارستاننىڭ كومانداسى كەزدەسۋدەگى ءۇشىنشى گولىن سالىپ, ويىن تاعدىرىن ءبىرجولا شەشىپ تاستادى. گولدىڭ اۆتورى – ايسسا لايدۋني. وعان ناتيجەلى پاستى بۇعان دەيىن ەكى مارتە دالدىك تانىتقان اداما تراورە شىعارىپ بەردى. قوستانايلىقتار الاڭ يەلەرىنىڭ تەك ءۇشىنشى گولىنا عانا جىلدام جاۋاپ قايتارا الدى. وڭ قاناتتان شابۋىلداعان «توبىلدىڭ» سەربيالىق جارتىلاي قورعاۋشىسى زوران توشيچ قارسىلاستىڭ بىرنەشە ويىنشىسىن الداپ ءوتىپ, يۆان سەرگەەۆكە تاماشا پاس شىعارىپ بەردى. ءوز كەزەگىندە وزبەكستاندىق شابۋىلشى ۇرىمتال ساتتە ءمۇلت كەتكەن جوق – 3:1. ويىننىڭ ءبىرىنشى تايمى وسى ەسەپپەن اياقتالدى. ۇزىلىسكە دەيىن بۋداپەشتتىك كوماندا بىرنەشە قاۋىپتى شابۋىل ۇيىمداستىرعانىمەن, موكيننىڭ قاقپاسىنا گول سالا العان جوق. العاشقى 45 مينۋتتا الاڭ يەلەرى «توبىل» قاقپاسىنا 13 مارتە ءدال سوققى جاسادى.
ەكىنشى تايمدا «فەرەنتسۆاروش» فۋتبولشىلارى قارقىنىن باسەڭدەتكەنىمەن, كەزدەسۋ سوڭىنا دەيىن تاعى ەكى گول سوعىپ كەتتى. 74-مينۋتتا فورچۋن بەسسي, 90-مينۋتتا ەنري ۋينگو تابلوداعى كورسەتكىشتى 5:1-گە جەتكىزدى. قوستانايلىقتار ەسەپ ايىرماسىن قىسقارتامىز دەپ جۇرگەندە ماتچتى اۋپىرىمدەپ ءجۇرىپ 10 ويىنشىمەن زورعا اياقتادى. ەكىنشى تايمدا الاڭعا شىققان جارتىلاي قورعاۋشى سەرىكجان مۇجىقوۆ اينالدىرعان ەكى مينۋتتىڭ ىشىندە ەكى سارى قاعاز الىپ, 81-مينۋتتا الاڭنان قۋىلدى. وسىلايشا, قوستانايدىڭ «توبىلى» سىرت الاڭدا ماجارستاننىڭ «فەرەنتسۆاروشىنان» ءىرى ەسەپپەن جەڭىلىپ, چەمپيوندار ليگاسىنىڭ ىرىكتەۋ كەزەڭىنەن شىعىپ قالدى.
ەندى قازاقستاندىق كوماندا ەۋروكۋبوكتاعى ويىندارىن كونفەرەنتسيا ليگاسىنىڭ ەكىنشى ىرىكتەۋ كەزەڭىنەن جالعاستىراتىن بولدى. بۇل سىندا قوستانايلىق كلۋب گيبرالتاردىڭ «لينكولن رەد يمپس» ۇجىمىمەن كەزدەسەدى. «لينكولن» دا «توبىل» سياقتى بيىلعى ەۋرودودا ويىندارىن چەمپيوندار ليگاسىنىڭ ىرىكتەۋ كەزەڭىنەن باستاپ, العاشقى اينالىمدا ماكەدونيانىڭ «شكۋپي» كومانداسىنان جەڭىلىپ قالدى. ءبىرىنشى ويىندا گيبرالتار كومانداسى 2:0 ەسەبىمەن باسىم تۇسكەنىمەن, قارىمتا كەزدەسۋدە 3:0 ەسەبىمەن قارسىلاستارىنا جول بەردى. ءسويتىپ «لينكولن رەد يمپس» كلۋبى دا كونفەرەنتسيا ليگاسىنا ءتۇسىپ قالدى.
46 جىلدىق تاريحى بار كوماندا وسى ۋاقىت ارالىعىندا گيبرالتار چەمپيوناتىندا 26 مارتە, ەل كۋبوگىندا 16 رەت توپ جارعان. 2014/15 جىلعى فۋتبول ماۋسىمىنان بەرى ەۋروكۋبوك ويىندارىنا تۇراقتى قاتىسىپ كەلەدى. بىلتىرعى ماۋسىمدا ولار كونفەرەنتسيا ليگاسىنىڭ توپتىق كەزەڭىنە دەيىن جەتىپ, «كوپەنگاگەن», پاوك جانە «سلوۆان» كلۋبتارىمەن F توبىندا ونەر كورسەتتى.
ەكى كلۋب اراسىنداعى العاشقى ويىن 21 شىلدەدە قوستانايدا, قارىمتا ماتچ 28 شىلدەدە گيبرالتاردا وتەدى.
