«بۇگىندە بۇرىن ىسكە قوسىلعان جەتى قانت زاۋىتىنىڭ تورتەۋى عانا جۇمىس ىستەپ تۇر – الماتى جانە جامبىل وبلىستارىندا. ولاردىڭ ءوزى تەك ۇشتەن ءبىر قۋاتىمەن عانا جۇمىس ىستەيدى. جۇكتەلىمى – 31% عانا. اۋىل شارۋاشىلىعى مينيسترلىگى قىزىلشا قانتىنىڭ ۇلەسىن 2026 جىلعا قاراي 6 ەسە 7%-دان 43%-عا دەيىن كوبەيتۋدى جوسپارلاپ وتىر. الايدا, كەيىنگى ءتورت جىلدا قانت قىزىلشاسىنىڭ القابى ۇشتەن بىرگە قىسقارىپ كەتكەن», دەدى مەملەكەت باسشىسى.
سونداي-اق ول قازاقستاننىڭ سىرتتان كەلەتىن قانتقا 90% تاۋەلدى ەكەنىن ايتتى.
«بۇل جەردە ەۋرازيالىق ەكونوميكالىق وداق اياسىنداعى شەشىمدەرگە سىلتەۋگە بولادى. بىراق, بۇل – ءبارىبىر ۇكىمەتتىڭ زور كەمشىلىگى, ياعني مەملەكەتتىڭ ۇستانىمىن قورعاي المادى. سوندىقتان, مەن مينيسترلەر باقىت سۇلتانوۆ پەن ەربول قاراشوكەەۆكە سوگىس جاريالايمىن. ۇكىمەتكە شۇعىل تارتىپتە قانت سالاسىن دامىتۋدىڭ جەكە سالالىق جوباسىن ازىرلەۋ كەرەك», دەدى ق. توقاەۆ.
سونىمەن قاتار پرەزيدەنت كيىكتەرگە بايلانىستى ەكولوگيا, گەولوگيا جانە تابيعي رەسۋرستار ءمينيسترى سەرىكقالي برەكەشەۆكە سوگىس جاريالادى.
«سالالىق مينيسترلىككە قاتىستى ايتساق, مينيسترگە سوگىس جاريالايمىن. كيىكتەردىڭ كەلەشەك تاعدىرى تۋرالى تۇسىنىكسىز اۋرە-سارساڭ مەن پىكىرتالاس قالىپتاستىرعانى ءۇشىن سوگىس جاريالانادى. مۇنىڭ ءبارىن قوعامدىق تالقىلاۋدىڭ وسىنشالىق دەڭگەيىنە شىعارۋدىڭ قاجەتى نە؟ بۇل ماسەلەگە ۇلتىمىزدىڭ مەنتاليتەتىن ەسكەرە وتىرىپ, كاسىبي تۇرعىدا كەلۋ كەرەك. شىنىمەن دە, كيىك – قازاق حالقى ءۇشىن كيەلى جانۋار بولىپ ەسەپتەلەدى», دەدى قاسىم-جومارت توقاەۆ.
وتىرىس بارىسىندا مەملەكەت باسشىسى 80 مىڭ كيىكتى اتۋ ماسەلەسىنە قاتىستى پىكىر ءبىلدىردى.
«تابيعي لاندشافتان 80 مىڭ باس كيىكتى الىپ قويۋ, ياعني ءولتىرۋ تۋرالى ۇسىنىس ەنگىزىلىپ وتىر. بىراق, باسقا دا تاسىلدەرى بار شىعار. ماماندارمەن اقىلداسىڭىزدار. ال بۇل – ەڭ شەتىن شارا عوي. مەن بۇل شاراعا دا جۇگىنۋىمىز مۇمكىن ەكەنىن جوققا شىعارمايمىن. بىراق, بۇل – شەتىن شارا, قايتالاپ ايتامىن. بۇل ماسەلەگە كاسىبي تۇرعىدا كەلۋ كەرەك», دەدى مەملەكەت باسشىسى.
