«ۇكىمەتكە ىشكى ەكونوميكالىق رەسۋرستاردى جۇمىلدىراتىن جاڭا تاسىلدەر ازىرلەۋدى تاپسىرامىن. بۇل رەتتە, حالىقتى وزگە ايماقتارعا كوشىرۋ باعدارلاماسىن تۇبەگەيلى قايتا قاراۋ كەرەك», دەدى پرەزيدەنت ۇكىمەتتىڭ كەڭەيتىلگەن وتىرىسىندا.
مەملەكەت باسشىسى ەلگە قايتىپ كەلۋگە نيەتتەنگەن قانداستارعا تولىق كولەمدە قولداۋ كورسەتىلەتىنىن اتاپ ءوتتى.
ء«بىز تاريحي وتانىنا ورالعان قانداستاردى تولىق قولدايمىز. بىراق, تەك ماڭعىستاۋ وڭىرىمەن شەكتەلۋگە بولمايدى. باسقا وبلىستارعا, سونىڭ ىشىندە ءوندىرىسى دامىعان ايماقتارعا قونىستانۋعا بولادى. ءبىز قاجەتتى جاعدايدى جاساۋعا دايىنبىز», دەدى قاسىم-جومارت توقاەۆ.
سونداي-اق پرەزيدەنت الەمدە جۇمىس كۇشىنىڭ كوشى-قونى ەتەك الىپ بارا جاتقانىنا توقتالا كەتتى.
«قازىرگى زاماندا وڭىرلەردە, ەلدەردە, ءتىپتى, قۇرلىقتاردا جۇمىس كۇشىنىڭ كوشى-قونى ءجۇرىپ جاتىر. بۇل زاڭدى قۇبىلىسقا اينالدى. وسى ۇردىسكە ءبىزدىڭ ازاماتتار دا ۇيرەنۋى كەرەك. كورشى ەلدەردىڭ ازاماتتارى بۇل جاعدايعا جاقسى بەيىمدەلدى. ءبىز قانداستارىمىزدىڭ بارلىق سالادا, سونىڭ ىشىندە مەملەكەتتىك قىزمەتتە جۇمىس ىستەگەنىن قالايمىز. ولار جاڭا قازاقستاندى قۇرۋعا ءوز ۇلەسىن قوسادى دەپ سەنەمىن», دەدى پرەزيدەنت ءوز سوزىندە.
