كاسكو: كولىگىڭىز كولدەنەڭ قاۋىپتەن ساقتاندىرىلعان با؟

Amanat ساقتاندىرۋ كومپانياسى سايتىنداعى مالىمەتكە سۇيەنسەك, كولىكتى مىندەتتى ساق­تاندىرۋ نەمەسە اقجم – اۆتوكولىك يەسىنىڭ ازاماتتىق-قۇقىقتىق جاۋاپكەرشىلىگىن مىندەتتى ساقتاندىرۋ. بۇل ساقتاندىرۋ ءتۇرى ءسىزدىڭ كىناڭىزدەن بولعان جول-كولىك وقيعاسىنان زارداپ شەككەن ءۇشىنشى تۇلعاعا ماتەريالدىق شىعىندى وتەۋگە كەپىلدىك بەرەدى. ناقتىراق ايتقاندا, ەگەر ءسىز بىرەۋدىڭ كولىگىنە زاقىم كەلتىرسەڭىز, وندا ءوزىڭىز تاڭداعان ساقتاندىرۋ كومپانياسى مىندەتتى پوليس بويىنشا الگى كولىكتى جوندەۋگە قارجى بولەدى.

قازاقستان زاڭى بويىنشا, ءار كولىك جۇرگىزۋشى اقجم ءپولي­سىن رەسىمدەۋگە مىندەتتى. ەگەر جۇر­گىزۋشىدە مۇنداي ساقتاندىرۋ ءپوليسى بولماسا نەمەسە ونىڭ جارامدىلىق مەرزىمى ءوتىپ كەتكەن بولسا, وندا اۆتوكولىك يەسىنە 10 اەك (31 800 تەڭگە) كولەمىندە ايىپپۇل سالىنادى.  ساقتاندىرۋ ءپوليسىنىڭ قۇنى كولىك جۇرگىزۋشىنىڭ وتىلىنە, كولىكتىڭ جىلىنا بايلانىستى.

ال ەرىكتى ساقتاندىرۋ – كاسكو-نىڭ ءجونى بولەك. ساق­تان­دىرۋدىڭ بۇل ءتۇرى اۆتوكولىكتى وقىس وقيعالاردان, اتاپ ايتقاندا, ءورت, جارىلىس, جول اپاتىنان, ۇساق بۇزاقىلىقتان, ۆانداليزمنەن ساقتاندىرادى. مىسالى, اۋلادا تۇرعان كولىكتى  سىزىپ كەتۋ, تەرەزەسىن سىندىرۋ سەكىلدى وقيعالار ءجيى كەزدەسەدى. ەگەر كولىگىڭىزدى مۇنداي ۇساق بۇزاقىلىقتان, باسقا دا قاۋىپ-قاتەردەن ساقتاندىرعان بولساڭىز, ونىڭ بارلىق شىعىنىن كاسكو-نى مىندەتىنە العان ساقتاندىرۋ كومپانياسى تولەيدى.

مامانداردىڭ ايتۋىنشا, ساقتاندىرۋدىڭ وسى ءتۇرى ارقىلى اۆتوكولىكتى باس-اياعى 17 قاۋىپتەن ساقتاندىرۋعا بولادى. قاۋىپ-قاتەر تاۋەكەلىنىڭ كەڭ اۋقىمىن قامتيتىن بولعاندىقتان, البەتتە, بۇل ساقتاندىرۋدىڭ قۇنى قىمباتىراق. مىسالى, كولىگىڭىزدى جول-كولىك وقيعاسىنان, ۇرلىقتان, زاقىمدانۋدان ساقتاندىرعىڭىز كەلسە, ونىڭ قۇنى ورتا ەسەپپەن – 150 مىڭ تەڭگەگە جۋىقتايدى. جالپى العاندا, كاسكو سوماسى جەڭىل اۆتوكولىك ءۇشىن – جىلىنا اۆتو قۇنىنىڭ 3,5%-ى كولەمىندە, كوممەرتسياعا ارنالعان اۆتوكولىك ءۇشىن – جىلىنا اۆتو قۇنىنىڭ 4%-ى مولشەرىندە ەسەپتەلەدى.

كاسكو-نىڭ ساقتاندىرۋ سوما­سى ەرىكتى ساقتاندىرۋ كەلىسىم­شار­تىندا جانە «ساقتاندىرۋ» گرافاسىنداعى تولەم كەستەسىندە كورسەتىلەدى.

سوڭعى جىلدارى مىندەتتى اۆتو­ساقتاندىرۋ پوليسىنە قوسا, اۆتوكاس­كو ەرىكتى ساقتاندىرۋ پوليستەرىن الۋشى اۆتوجۇرگىزۋشىلەردىڭ سانى ايتارلىقتاي ءوسىپتى. ۇلتتىق بانكتىڭ مالىمەتتەرىنە سۇيەنسەك, 2022 جىلدىڭ بەس ايى ىشىندە كاسكو ەرىكتى ساقتاندىرۋ بويىنشا ساقتاندىرۋ سىيلىقاقىسىنىڭ جالپى كولەمى 16,3 ملرد تەڭگەنى قۇراعان. بۇل – وتكەن جىلدىڭ وسى كەزەڭىمەن سالىستىرعاندا 26,4%-عا ارتىق كورسەتكىش.

كاسكو ءپوليسىن رەسىمدەگەن قازاقستاندىقتاردىڭ 85%-ى – ەر ازاماتتار بولسا, 15%-ى – ايەلدەر. كوبىنە 29-35 جاس ارالىعىنداعى ازاماتتار كولىگىن كەشەندى ساقتاندىرۋدى قۇپ كورەدى ەكەن.

Freedom Insurance ساقتاندىرۋ كومپانياسى ماماندارىنىڭ زەرتتەۋى بويىنشا, كاسكو ءپوليسىن الماتىلىق جۇرگىزۋشىلەرى ءجيى رەسىمدەيدى. ودان كەيىنگى ورىندا – الماتى وبلىسى بولسا, ءۇشىنشىسى – ەلوردا تۇرعىندارى. ال سولتۇستىك قا­زاقستان جانە قوستاناي وبلىس­تا­رىنىڭ اۆتوجۇرگىزۋشىلەرى بۇل ساقتاندىرۋ ءتۇرىن سيرەك پايدالانادى.

مامانداردىڭ سوزىنە قارا­عاندا, كاسكو رەسىمدەگەن جۇر­گى­زۋشىلەردىڭ دەنى جازاتايىم وقيعالار مەن ءۇشىنشى تۇلعانىڭ بۇزاقىلىق ارەكەتىنەن قورعاۋ ءپو­ليسىن تاڭدايدى (39%-ى). ال «تە­مىر تۇلپارىن» جول-كولىك وقيعاسىنان ساقتاندىرىپ قويعان ازاماتتاردىڭ قاتارى – جالپى, كاسكو رەسىمدەگەن جۇرگىزۋشىلەردىڭ 27%-ىن قۇرايدى.

جالپى, كاسكو ەرىكتى ساق­تان­دىرۋ 12 ايعا رەسىمدەلەدى جانە ساقتاندىرۋ سوماسى بىتكەنشە قولدانۋعا بولادى.