ازاماتتىق حال اكتىلەرىندەگى مۇنداي مالىمەتتەردى وزگەرتۋ ءۇشىن ءتيىستى مەكەمەلەرگە بارۋدىڭ قاجەتى جوق. بارلىق مالىمەتتى ونلاين اۋىستىرۋعا بولادى. ول ءۇشىن تەلەفوندا eGov mobile موبيلدىك قوسىمشاسى بولۋى قاجەت. ال وتباسى تۋرالى جاڭا دەرەكتەر احاج اقپاراتتىق جۇيەسىنە كەلىپ ءتۇسۋى ءۇشىن قۇجاتتاردىڭ سكانەرلەنگەن كوشىرمەلەرىن وسى قوسىمشاعا جۇكتەسە جەتكىلىكتى. مىسالى, بالانىڭ تۋ تۋرالى اكتىلىك جازباسىندا بالا تۋرالى دەرەكتەر (تەگى, اتى, اكەسىنىڭ اتى, ۇلتى, تۋعان كۇنى, اناسى مەن اكەسى تۋرالى دەرەكتەر) دۇرىس ەنگىزىلمەگەن دەلىك. اتا-اناسى مالىمەتتەردى ءوز بەتىنشە تۇزەتە الادى. ول ءۇشىن دۇرىس مالىمەت جازىلعان قۇجاتتىڭ سكانەرلەنگەن كوشىرمەلەرىن جۇكتەپ, مالىمەتتەردى جاڭارتادى.
بۇل سەرۆيس eGov.kz پورتالىندا دا قولجەتىمدى. وسى قىزمەت ىسكە قوسىلعان ساتتەن باستاپ 83 مىڭنان استام ادام ءوز دەرەكتەرىن وزگەرتكەن ەكەن.
«مەملەكەتتىك قىزمەتتەردى الۋ كەزىندە كەيدە وتباسى تۋرالى مالىمەتتەر دۇرىس ەنگىزىلمەيدى. جەكە دەرەكتەردەن دە قاتە كەتىپ جاتاتىنىن ەشكىم جوققا شىعارمايدى. ماسەلەن, بالانىڭ اتى-جونىندە قاتەلىكتەر كەتەدى نەمەسە كەرىسىنشە دەرەكتى ەنگىزگەن كەزدە باسقا بالا تۋرالى اقپارات پايدا بولادى. بۇرىن قاتە مالىمەتتەردى تۇزەتۋ ءۇشىن قازاقستاندىقتار ءتيىستى مەكەمەلەرگە بارىپ, ۋاقىتىن جوعالتاتىن. ەندى وسى ولقىلىقتىڭ ورنى تولدى. جۇرتشىلىق ۇيدەن شىقپاي-اق دەرەكتەردى جاڭارتا الادى. ول ءۇشىن احاج اقپاراتتىق جۇيەسىندەگى دەرەكتەردى وزەكتەندىرۋ قاجەت. وزگەرتۋلەردى مەكەمەگە بارماي-اق eGov.kz ارقىلى ەنگىزۋگە بولادى», دەيدى «ۇلتتىق اقپاراتتىق تەحنولوگيالار» اق باسقارما توراعاسى روستيسلاۆ كونياشكين.
بۇل فۋنكتسيانى پايدالانۋ ءۇشىن eGov mobile قوسىمشاسىن اشۋ قاجەت. ءارى قاراي قىزمەتتەر مازىرىنە كىرىپ, ونداعى «تۋ, نەكە جانە ءولىم» قىزمەتىن تاڭداپ, احاج اج «مالىمەتتەردى وزەكتەندىرۋدى» باسۋ قاجەت. ءسويتىپ, اكت جازباسىنىڭ ءتۇرىن تاڭداپ, «ىزدەۋ» تۇيمەسى ارقىلى دەرەكتەردى تابۋ كەرەك. ەگەر دەرەكتەر كورسەتىلمەسە, «مالىمەتتەردى وزەكتەندىرۋ» باتىرماسىن قايتا باسىپ, (ال ەگەر دەرەكتەر كورسەتىلسە, «وزەكتى مالىمەتتەر» باتىرماسىن باسۋ قاجەت), ءارى قاراي قىزمەتكە قول قويۋ قاجەت.
ايتا كەتەيىك, بۇل جاڭارتۋلار مەملەكەت باسشىسىنىڭ قۇجاتتاردى تسيفرلاندىرۋ, نەعۇرلىم بيۋروكراتيادان ارىلۋ جونىندەگى تاپسىرماسىنا سايكەس جۇزەگە اسىرىلىپ وتىر. ونىڭ نەگىزگى ءمانى – تسيفرلى ترانسفورماتسيا جانە مەملەكەتتىك باسقارۋدىڭ بارلىق سالاسىنا جۇيەلى رەينجينيرينگ جاساۋ, دەيدى ماماندار.
