جاس دارىندار ەل قورجىنىنا 26 التىن, 56 كۇمىس, 122 قولا مەدال اكەلدى. ولار ماتەماتيكادان قاشىقتان وتكەن حالىقارالىق ازيا-تىنىق مۇحيتى وليمپياداسى, ماتەماتيكادان حالىقارالىق «جىبەك جولى» وليمپياداسى, ماتەماتيكادان بالقان وليمپياداسى, حيميادان وقۋشىلار اراسىنداعى حالىقارالىق مەندەلەەۆ وليمپياداسى, فيزيكادان ازيا وليمپياداسى (APhO), مامانداندىرىلعان مەكتەپتەردىڭ وقۋشىلارىنا ارنالعان ماتەماتيكا, فيزيكا جانە ينفورماتيكادان حالىقارالىق جاۋتىكوۆ وليمپياداسى سياقتى بەدەلدى قۇرلىقتىق وليمپيادالاردا قازاقستاننىڭ نامىسىن قورعادى.
«حالىقارالىق پاندىك وليمپيادالارعا بارلىعى 500-دەن استام قازاقستاندىق وقۋشى قاتىستى. ولار 200-دەن استام مەدال جەڭىپ الدى. بۇل ءاربىر ەكىنشى وقۋشىمىزدىڭ مەدال جەڭىپ العانىن بىلدىرەدى. ءبىزدىڭ بالالارىمىز جۇزدەن استام ەلدىڭ جاسوسپىرىمدەرىمەن سىنعا ءتۇسىپ, ۇزدىك ناتيجە كورسەتتى. ولار ۇلتتىق قۇراماعا ەنىپ, IMO, IPhO, IBO, IOL, IchO جانە ت.ب. باسقا دا حالىقارالىق وليمپيادالارعا قاتىسۋعا مۇمكىندىك الادى. قازىر بالالارىمىز ەڭ بەدەلدى پاندىك وليمپيادالارعا قاتىسىپ جاتىر. وقۋشىلارىمىز وسى وليمپيادالاردا جۇلدەلى ورىندارعا يە بولسا, اقشالاي سىيلىقتار مەن قازاقستاندىق ۋنيۆەرسيتەتتەردە وقۋ ءۇشىن گرانتتارعا يە بولادى», دەدى مەكتەپكە دەيىنگى جانە ورتا ءبىلىم كوميتەتىنىڭ ءتورايىمى گۇلميرا كارىموۆا.
مەملەكەت باسشىسىنىڭ تاپسىرماسى بويىنشا دارىندى بالالاردى قولداۋ ماقساتىندا بيىل حالىقارالىق زياتكەرلىك وليمپيادالاردىڭ جەڭىمپازدارى قازاقستاندىق جوو-دا ءبىلىم الۋ ءۇشىن اقشالاي سىيلىقتار مەن گرانتتارعا يە بولادى.
التىن مەدال العان وقۋشىعا 1 500 اەك, كۇمىس مەدالعا 1 000 اەك, قولا مەدالعا 500 اەك كولەمىندە اقشالاي سىيلىق بەرىلەدى.
سونىمەن قاتار وقۋشىلاردى بايقاۋعا دايىنداعان ۇستازدارعا دا بىرجولعى سىياقى تولەنەدى.
