دەنساۋلىق ساقتاۋ مينيسترلىگىنىڭ مالىمەتىنشە, قازىرگى ۋاقىتتا ەلىمىزدە 149 جىلجىمالى مەديتسينالىق كەشەن مامانداردىڭ قىزمەتتەرىن جانە كەڭ بەيىندى دياگنوستيكالىق قىزمەتتەردى ۇسىنادى. 2022 جىلدىڭ جارتى جىلىندا جمك قىزمەتىمەن 1530 ەلدى مەكەن قامتىلدى جانە 822 325 اۋىل تۇرعىنىنا قىزمەت كورسەتىلدى.
«358 181 دياگنوستيكالىق زەرتتەۋ, 222 485 زەرتحانالىق زەرتتەۋ, 787 292 بەيىندى مامانداردىڭ كونسۋلتاتسياسى جۇرگىزىلدى, 50 689 ناۋقاس انىقتالدى, ونىڭ ىشىندە 12 883 ادام ەسەپكە الىندى. سونداي-اق, شالعاي ەلدى مەكەندەردىڭ تۇرعىندارى مەديتسينالىق پويىزداردان مەديتسينالىق تەكسەرۋ مەن دياگنوستيكا الادى», دەپ جازدى ۆەدومستۆودان.
ەستەرىڭىزگە سالا كەتەيىك, مەديتسينالىق پويىزدار جوباسى دەنساۋلىق ساقتاۋ مينيسترلىگىنىڭ قولداۋىمەن «Samruk-Kazyna Trust» الەۋمەتتىك جوبالاردى دامىتۋ قورى «سامۇرىق-قازىنا» اق كومپانيالار توبىنىڭ اتىنان «قازاقستان تەمىرجولى» ۇك اق جانىنداعى «الەۋمەتتىك جوبالار قورى» كورپوراتيۆتىك قورىمەن بىرلەسىپ جۇزەگە اسىرىلۋدا. 23 مامىردان باستاپ «جاردەم» مەديتسينالىق پويىزى جوسپارلانعان 79 ستانتسياعا باردى, 8036 تۇرعىن, 3255 بالا تەكسەرىلدى. دارىگەرلىك قابىلداۋ - 34 911, شاعىن حيرۋرگيالىق وپەراتسيالار - 138. ءوز كەزەگىندە «سالاۋاتتى قازاقستان» مەديتسينالىق پويىزى جوسپارلانعان 68 ستانتسياعا باردى, 1781 تۇرعىن, 246 بالا تەكسەرىلدى.
دارىگەرلىك قابىلداۋ - 1781, شاعىن حيرۋرگيالىق وپەراتسيالار - 195. جالپى, مەديتسينالىق پوەزدار 366 مىڭنان استام ادامدى مەديتسينالىق قىزمەتتەرمەن قامتيدى, ال دارىگەرگە كەلۋشىلەردىڭ سانى 100 000-دى قۇرايدى دەپ جوسپارلانۋدا. سونىمەن قاتار, اۋىل تۇرعىندارى ءۇشىن اۋرۋلاردى انىقتاۋعا ارنالعان كاسىبي تەكسەرۋلەردىڭ تىزبەسى كەڭەيتىلدى. ءتيىستى بۇيرىقتى دەنساۋلىق ساقتاۋ مينيسترلىگى بەكىتتى.
«وسىلايشا, اۋىل تۇرعىندارىن پروفيلاكتيكالىق تەكسەرۋدى جۇرگىزۋ ءۇشىن 18 جاستان 29 جاسقا دەيىنگى جاڭا نىسانالى توپتى انىقتاۋ ەسەبىنەن جۇرەك-قانتامىر جۇيەسى, قانت ديابەتى, اسقازان مەن بۇيرەكتىڭ سوزىلمالى اۋرۋلارىن ەرتە ساتىسىندا انىقتاۋ ماقساتىندا حالىقتى قامتۋدى ۇلعايتۋ كوزدەلگەن. سونداي-اق, اۋىل تۇرعىندارىنا اسقازان-ىشەك جولى, ءزار شىعارۋ جۇيەسى, ەرەسەك جاستاعى توپتاعى تۋبەركۋلەز جانە قۋىقاستى بەزى وبىرىن ەرتە انىقتاۋ قىزمەتتەرى كەڭەيتىلدى», دەلىنگەن مينيسترلىكتىڭ اقپاراتىندا.
