الەمدىك تەننيس ءتۋرنيرىنىڭ جەڭىمپازىن نۇر-سۇلتان قالاسىنىڭ حالىقارالىق اۋەجايىنان پرەمەر-ءمينيستردىڭ ورىنباسارى ەرالى توعجانوۆ, مادەنيەت جانە سپورت ۆيتسە-ءمينيسترى سەرىك جاراسباەۆ, نۇر-سۇلتان قالاسى اكىمىنىڭ ورىنباسارى ەرلان بەكمۋرزاەۆ جانە الەمدىك ارەنالاردا ەل نامىسىن قورعاپ جۇرگەن چەمپيوندار دا قۇرمەت-قوشەمەتپەن قارسى الدى.
ال سەيسەنبى كۇنى قازاقستاندىق تەننيسشى پرەمەر-مينيستر ءاليحان سمايىلوۆ پەن ەلوردا اكىمى التاي كولگىنوۆتىڭ قابىلداۋىندا بولدى. تۇستەن كەيىن ەلەنا رىباكينا قازاقستاندىق باق وكىلدەرىمەن كەزدەسىپ, جۋرناليستەردى قىزىقتىرعان سۇراقتارعا جاۋاپ بەردى. ءباسپاسوز ءماسليحاتىندا ەلەنا «ۋيمبلدون» جارىسىنا قالاي دايىندالعانى تۋرالى ايتىپ, جەڭىسىنەن كەيىنگى اسەرىن ورتاعا سالدى. سونداي-اق ول جيىن بارىسىندا قازاقستاندىق جانكۇيەرلەردىڭ ەرەكشە قولداۋىنا ريزاشىلىعىن ءبىلدىرىپ, جۋرناليستەرگە قازاقستاننىڭ ازاماتشاسى ەكەنىن دالەلدەيتىن جەكە كۋالىگىمەن پاسپورتىن دا كورسەتتى. ءباسپاسوز جيىنىندا ايتىلعان بۇدان دا باسقا سۇراق-جاۋاپتى گازەتىمىزدىڭ كەلەسى سانىندا تولىق جاريالايمىز.
جۋرناليستەرمەن كەزدەسۋدەن كەيىن ە.رىباكينا ۇلتتىق تەننيس ورتالىعىنداعى كورتتا ەلىمىزدىڭ جاس تەننيسشىلەرىمەن كەزدەسىپ, ولارعا ارنايى شەبەرلىك-ساباعىن وتكىزدى. سودان كەيىن ەلوردالىق تەننيس جانكۇيەرلەرىمەن دە جۇزدەسىپ, ەستەلىككە سۋرەتكە ءتۇسىپ, قولتاڭبا بەردى.
