ەۋروپا فۋتبول قاۋىمداستىقتارى وداعىنىڭ (ۋەفا) ەرەجەسى بويىنشا, كارى قۇرلىقتاعى الەم چەمپيوناتىنىڭ ىرىكتەۋ باسەكەلەرى بەس ساتىدان تۇرادى. بۇل – ەكىنشى ىرىكتەۋ كەزەڭى. العاشقى الدىن الا ىرىكتەۋ تۋرنيرىندە ۋەفا رەيتينگىندە ەڭ تومەنگى ورىنداردا تۇرعان قۇرامالار ءبىر-بىرىمەن شاعىن تۋرنير وتكىزىپ, وندا جەڭىسكە جەتكەن گەرمانيا, چەرنوگوريا, دانيا, كيپر, ارمەنيا, كوسوۆو, ليتۆا, يزرايل, شۆەتسيا, اۋستريا, مولدوۆا جانە گرەكيا نەگىزگى كەزەڭگە جولداما الدى.
اتالعان 12 قۇراما رەيتينگتە جوعارى ورىنداردا تۇرعان 24 كومانداعا قوسىلىپ, نەگىزگى كەزەڭدە باق سىناۋ قۇرمەتىنە يە بولدى. سونداي-اق ىرىكتەۋدىڭ بارلىق كەزەڭىنەن شەتتەتىلگەن رەسەي قۇراماسىنىڭ ورنىنا شاعىن تۋرنيردە ءۇشىنشى ورىن العان كوماندالار ىشىندە ەڭ ۇزدىك ناتيجە كورسەتكەن نورۆەگيا قۇراماسى شاقىرتۋ الدى. ءسويتىپ, جەرەبە قورىتىندىسى بويىنشا 36 قۇراما ءۇش-ۇشتەن 12 توپقا ءبولىنىپ, نەگىزگى كەزەڭدە ونەر كورسەتپەك. توپتىق كەزەڭنىڭ ويىندارى 2022 جىلدىڭ 12-21 قىركۇيەگى, 3-12 قازانى, 6-9 قاراشاسى جانە 2023 جىلدىڭ 27 اقپانى مەن 8 ناۋرىزى ارالىعىنا جوسپارلانعان.
توپتىق كەزەڭدە باق سىنايتىن قۇرامالار ءبىر-بىرىمەن ۇيدە جانە سىرت الاڭدا ءبىر-ءبىر ويىن وتكىزەدى. ناتيجەسىندە, ءار توپتىڭ جەڭىمپازدارى مەن ەكىنشى ورىن العان ءتورت ۇزدىك كوماندا ەليتالى كەزەڭگە تىكەلەي جولداما الادى. ال ەكىنشى ورىن يەلەنگەن قالعان سەگىز كوماندا 2023 جىلدىڭ 10-19 ءساۋىر ارالىعىندا وتپەلى ويىندار ارقىلى تاعى ءتورت جولدامانى ساراپقا سالادى. ءسويتىپ, ىرىكتەۋدىڭ ەليتالى كەزەڭىنە 20 قۇراما قاتىسىپ, ولار ءتورت-تورتتەن بەس توپقا ءبولىنىپ وينايدى. ءار توپتا جەڭىمپاز اتانعان قۇراما الەم چەمپيوناتىنا جولداما السا, ەكىنشى ورىن العان قۇرامالار ءبىر-بىرىمەن ويناپ, قوسىمشا ەكى جولداماعا تالاساتىن بولادى.
نون قالاسىندا وتكەن جەرەبە تارتۋ راسىمىنەن كەيىن فۋتزالدان قازاقستان قۇراماسىنىڭ باس باپكەرى ريكاردو كاكا قازاقستان فۋتبول فەدەراتسياسىنىڭ ءباسپاسوز قىزمەتىنە سۇحبات بەرىپ, 2024 جىلعى الەم چەمپيوناتىنىڭ نەگىزگى ىرىكتەۋ كەزەڭىنىڭ جەرەبەسى تۋرالى ويىن ورتاعا سالدى.
– ءبىزدىڭ توپقا قيىن قارسىلاستار ءتۇستى. قازاقستان قۇراماسىن جاتتىقتىرعان ساتتەن باستاپ سلوۆەنيا قۇراماسىمەن وسىمەن ءۇشىنشى رەت جولىققالى تۇرمىز. العاشقى ەكى ويىن ءبىز ءۇشىن اۋىر بولدى. سەبەبى ەكى كەزدەسۋدە دە تاڭداۋلى قۇراممەن شىعا المادىق. وسى جولى ءبارى ءبىز ويلاعانداي بولادى دەپ ۇمىتتەنەمىن.
چەرنوگوريا تۋرالى ايتار بولساق, بۇگىنگى فۋتزالدا كەز كەلگەن قارسىلاستى باعالاۋ قاجەت. ولارمەن العاش رەت وينايمىز. سىرت الاڭدا قازاقستان قۇراماسىنىڭ ويىنىنا باسا نازار اۋدارىلادى دەپ ويلايمىن. قازىر فۋتزال ويناۋدى ءبارى ۇيرەندى. سپورتتىڭ بۇل ءتۇرى ءبىر ورىندا تۇرعان جوق. وسى ويىنداردىڭ بارلىعىنا جوعارى دەڭگەيدە دايىندالىپ, قارسىلاستى تولىق زەرتتەيمىز, – دەيدى باپكەر.
سونداي-اق ۇلتتىق قۇرامانىڭ كاپيتانى يگيتا دا جەرەبە تۋرالى ءوز پىكىرىن ءبىلدىرىپ, قازاقستان قيىن توپقا تاپ بولعانىن ايتتى. «وتە قيىن توپقا تۇستىك. سلوۆەنيا ارقاشان مىقتى قۇراما سانالدى. ونى 2016 جانە 2021 جىلدارعى الەم چەمپيوناتىنىڭ ىرىكتەۋ ويىندارىندا بايقادىق. كەيىن نيدەرلاندتا وتكەن ەۋروپا چەمپيوناتىندا دا جولىقتىق. ولاردان ەشقاشان ۇتىلعان جوقپىز, دەيتۇرعانىمەن, بارلىق ويىندا دا جەڭىسكە جەتپەدىك. ءبىر رەت ۇتىپ, ەكى ويىندا تەڭ تۇستىك. وتە ىڭعايسىز قارسىلاس, مۇقيات بولۋ قاجەت. جاڭا ويىنشىلار كەلىپ جاتقانىن دا ەسكەرگەن ابزال. چەرنوگوريامەن بۇرىن-سوڭدى كەزدەسكەن جوقپىز. ولاردىڭ ويىنى سەربيا مەن بوسنيا قۇرامالارىنا ۇقساس كەلەدى. بۇل ەلدە دە جاقسى ويىنشىلار بار. قارسىلاستىڭ ويىنىن كورمەگەن سوڭ ناقتى ەشتەڭە ايتا المايمىن. قاتەلىك جىبەرمەۋ كەرەك. مۇنداي قارسىلاستاردان توسىنسىي كۇتۋگە بولادى. ءار ويىنعا تىڭعىلىقتى دايىندالامىز», دەيدى يگيتا.
2021 جىلى ليتۆانىڭ ءۇش قالاسىندا – ۆيلنيۋس, كاۋناس, كلايپەدادا وتكەن الەم چەمپيوناتىندا قازاقستان قۇراماسى تابىستى ونەر كورسەتىپ, فينالعا ءبىر قادام قالعاندا سۇرىنگەن ەدى. جەرلەستەرىمىز توپتىق كەزەڭدە كوستا-ريكا (6:1) مەن ليتۆادان (3:0) باسىم ءتۇسىپ, سوڭعى تۋردا ۆەنەسۋەلامەن تەڭ (1:1) ويناعان-دى. 1/8 فينالعا ءوز توبىندا ءبىرىنشى ورىنمەن شىققان قازاقستان قۇراماسى العاش تايلاند فۋتزالشىلارىن جارىس جولىنان ىعىستىرسا (7:0), شيرەك فينالدا يراندى تىزە بۇكتىردى – 3:2. ال جارتىلاي فينالدا بولاشاق الەم چەمپيونى پورتۋگاليامەن تەڭ ويناپ (2:2), ماتچ سوڭىنداعى پەنالتي سەرياسىندا عانا ەسە جىبەردى. ءۇشىنشى ورىن ءۇشىن وتكەن كەزدەسۋدە الەمنىڭ بەس دۇركىن چەمپيونى برازيليادان 4:2 ەسەبىمەن جەڭىلىپ, الەم بىرىنشىلىگىن ءتورتىنشى ورىنمەن تۇيىندەدى. فينالدا پورتۋگاليا قۇراماسى 2016 جىلعى الەم چەمپيونى – ارگەنتينانى جەڭىپ, جاھاندىق دودانىڭ باس جۇلدەسىن جەڭىپ الدى.
