دامير يسماعۇلوۆ 1991 جىلدىڭ 3 اقپانىندا رەسەيدىڭ ورىنبور وبلىسىنداعى پەرۆوماي اۋدانىنىڭ ۋدارنىي اۋىلىندا تۋىپ-ءوستى. تەك 20 جاستان اسقان شاعىندا ارالاس جەكپە-جەككە دەن قويعان ول ءوزىنىڭ دارا تالانتى, ەڭبەكقورلىعى جانە تاباندىلىعىنىڭ ارقاسىندا قىسقا عانا مەرزىمدە بيىك بەلەستەردى باعىندىردى. ءالى ەسىمىزدە, 2016 جىلدىڭ جەلتوقسان ايىندا ەل تاۋەلسىزدىگىنىڭ 25 جىلدىعىنا وراي الماتىدا ءدۇبىرلى جارىس ۇيىمداستىرىلدى. 70 كەلى سالماقتا سايىسقا تۇسكەن رەسەيلىك قانداسىمىز تەمىرلان ءايسادىلوۆ, ايبەك نۇرسەيىت جانە مۇرات باقتىورازوۆ سەكىلدى سايىپقىرانداردى سان سوقتىرىپ, باس جۇلدەگە تىگىلگەن «تەمىر تۇلپاردى» تىزگىندەدى. ول كەزدە دامير ءالى كوپشىلىككە كەڭىنەن تانىلا قويماعان ەدى. سول جارىستا ءبىز ورىنبوردا وسىنداي مىقتى سپورتشىنىڭ بارىن العاش رەت بىلدىك.
2017 جىلدىڭ اقپان ايىندا سانكت-پەتەربۋرگتەگى «يۋبيلەينىي» سپورت كەشەنىندە ۇيىمداستىرىلعان «م-1 Challenge 74» دەپ اتالاتىن حالىقارالىق تۋرنير دە ەسىمىزدە. نەۆا جاعالاۋىندا دامير يسماعۇلوۆ فرانتسيانىڭ ساقا سپورتشىسى مورگان حەروۋدتى ءۇشىنشى راۋندتا ۇرىپ جىقتى. باسەكە اياقتالعان بەتتە ميكروفوندى العان ول «وسى مۇمكىندىكتى پايدالانا وتىرىپ, «م-1» ۇيىمىنىڭ باسشىلارىنا ءوز ءوتىنىشىمدى بىلدىرگىم كەلەدى. رەيتينگتىك باسەكەلەرمەن مەنى ابدەن «تويدىردىڭىزدار»! راحمەت! ەندى چەمپيوندىق ءتاج ءۇشىن تالاسقىم كەلەدى. ماعان سونداي مۇمكىندىك بەرىڭىزدەر! بۇل ءساتتى بۇكىل ورىنبوردىڭ تۇرعىندارى تاعاتسىزدانا كۇتۋدە! ول از دەسەڭىز, رەسەي مەن قازاقستاندا دا جانكۇيەرلەرىمنىڭ قاتارى مول. ولار دا مەنىڭ جارقىن جەڭىسىمدى كورۋگە قۇشتار!» دەپ باتىل سويلەگەن ەدى. ءسوز كەزەگى قايتا جۇرگىزۋشىگە تيگەندە ول «قولىمنان ميكروفوندى تارتىپ العانىڭىزعا قاراعاندا, كوزدەگەن ماقساتىڭىزعا قول جەتكىزۋ ءۇشىن ەشتەڭەدەن تايسالمايتىن باتىل ادام سەكىلدىسىز...», دەپ ازىلدەگەنى سول ەدى, قازاقتىڭ ۇلى بىردەن: «بۇگىن مەن ءسىزدىڭ قولىڭىزدان ميكروفوندى تارتىپ السام, ەرتەڭ وزگەنىڭ قولىنان التىن بەلبەۋدى ج ۇلىپ اكەتەمىن. وعان ەش كۇماندارىڭىز بولماسىن!» دەپ اڭگىمەنى شورت كەستى.
اتالعان ۇيىم باسشىلارى ءداميردىڭ بۇل ۋاجىنە قۇلاق استى. سول جىلدىڭ مامىرىندا سانكت-پەتەربۋرگتەن كەلگەن ماكسيم ءديۆنيچتى اۋىر سوققىنىڭ استىنا الىپ, 70 كيلو سالماق دارەجەسى بويىنشا «م-1» ۇيىمىنىڭ چەمپيوندىق بەلبەۋىن يەلەندى. سودان كەيىن برازيليالىق رودجەريۋ ماتياس دە كونسەيسان, گرۋزيالىق راۋل تاتاراۋلي جانە بەلورۋسسيالىق ارتەم دامكوۆسكيدى ۇتىپ, چەمپيوندىق اتاعىن ءۇش مارتە ءساتتى قورعادى.
2018 جىلدىڭ جەلتوقسان ايىندا يسماعۇلوۆ UFC-دەگى تۇساۋكەسەر كەزدەسۋىن وتكىزدى. ول اۋستراليانىڭ ادەلايدا قالاسىندا جەرگىلىكتى سپورتشى الەكس گوردجەستەن باسىم ءتۇستى. ودان كەيىن پراگادا يسپانيالىق حوەل الۆارەس, شەنچجەن مەن لاس-ۆەگاستا برازيليانىڭ قوس مىقتىسى – تياگو مويزەس پەن رافاەل الۆەستەن ايلاسىن اسىردى. بيىلعى 18 ماۋسىمدا وستيندە شۆەتسيانىڭ نامىسىن قورعاعان گرۋزين جىگىتى گۋرام كۋتاتەلادزەنى قاپى قالدىردى. وسى جەڭىستەرىنىڭ ارقاسىندا دامير الەمدەگى ەڭ بەلدى پروموۋشەندەگى توپ-15 سپورتشىنىڭ ساناتىنا قوسىلدى.
جالپى, دامير وكتاگونعا 25 رەت شىعىپ, سول باسەكەلەردىڭ تەك بىرەۋىندە عانا ۇتىلدى. وسىدان جەتى جىل بۇرىن ينگۋشەتيانىڭ نازران قالاسىندا وتكەن جارىستا ول داعىستاندىق رامازان ەسەنباەۆقا ۇپاي سانىمەن ەسە جىبەردى. سودان كەيىن 18 جەكپە-جەكتى ءوز پايداسىنا شەشتى. ەندى تاعى ەكى-ءۇش جەكپە-جەكتە جەڭىسكە جەتسە, دامير يسماعۇلوۆتىڭ UFC-ءدىڭ چەمپيوندىق ءتاجى ءۇشىن تالاسۋىنا مۇمكىندىك تۋىندايدى. سول سەبەپتى دە ءدال قازىر رەيتينگتە ونىڭ الدىندا تۇرعان فايتەرلەر جايىندا دا ءبىراز دەرەككە قانىق بولعانىمىز ءجون.
قازىرگى كەزدە جەڭىل سالماقتىڭ چەمپيونى جوق. ويتكەنى بيىلعى 7 مامىردا فينيكستە امەريكالىق دجاستين گەيدجيگە قارسى جەكپە-جەككە شىققان برازيليالىق چارلز وليۆەيرا ارتىق سالماقتان ارىلا المادى. دەسەك تە ول ايقاس الاڭىنا شىعىپ, قارسىلاسىن ءبىرىنشى راۋندتا قىلقىندىرىپ تاستادى. وليۆەيرا جەڭىسكە جەتكەنىمەن, وعان التىن بەلبەۋ بەرىلمەدى. قالاي دەسەك تە, ازىرگە وسى سالماقتىڭ ۇزدىگى وليۆەيرا ەكەنى داۋسىز. 32 جاستاعى برازيليالىق دجيۋ-دجيتسۋدىڭ حاس شەبەرى, 42 كەزدەسۋدىڭ 33-ىندە جەڭىسكە جەتىپ, 30 قارسىلاسىن ەسىنەن تاندىردى. ءبىر كەرەمەتى, ول سوڭعى 11 باسەكەنىڭ بارلىعىندا باسىمدىق تانىتتى. 10 رەت ايقىن ۇتسا, تەك ءبىر رەت قانا تورەشىلەردىڭ شەشىمىنە جۇگىندى. سوڭعى ءتورت جىل ارالىعىندا وليۆەيرا ءار جىلدارى وسى سالماقتىڭ كوكجالدارى سانالعان دجيم ميللەر, نيك لەنتس, كەۆين لي, توني فەرگيۋسون, مايكل چەندلەر سىندى ساڭلاقتاردىڭ بارلىعىن وڭدىرماي سابادى.
جالپى, چارلزدىڭ ءجۇرىپ وتكەن جولى كەيىنگى جاستارعا ۇلگى. ولاي دەۋگە نەگىز برازيليالىق سپورتشى العاشقى 21 كەزدەسۋىنىڭ سەگىزىندە جەڭىلىستىڭ كەرمەك ءدامىن تاتتى. سول كەزدە كوپشىلىك ونىڭ كەلەشەگىنە كۇمانمەن قارادى. الايدا بۇل جاعداي وليۆەيرانىڭ جىگەرىن جاسىتا العان جوق. بيىك بەلەستەردى باعىندىرۋ ءۇشىن جانكەشتى جىگىت كوپ ەڭبەكتەندى, تىرىستى, تالپىندى. UFC-ءدىڭ التىن بەلبەۋىنە تالاسۋ ءۇشىن 31 رەت وكتاگونعا شىعۋىنا تۋرا كەلدى. ونىڭ 27-ءسىن ول الەمدەگى ەڭ بەلدى پروموۋشەندە وتكىزدى. سول بيىككە جەتۋ ءۇشىن 11 جىلىن سارپ ەتتى. بۇرىنعى جانە قازىرگى چەمپيونداردىڭ بىردە-بىرەۋى ءدال وسىنداي سۇزگىدەن, اۋىر سىناقتان وتكەن ەمەس. ەسەسىنە 2021 جىلدىڭ مامىر ايىندا مايكل چەندلەردىڭ تاس-تالقانىن شىعارىپ, كوزدەگەن ماقساتىنا قول جەتكىزگەن ەدى.
وڭتۇستىك امەريكانىڭ وعلانىنا كوپتەگەن رەكورد تيەسىلى. ول UFC-دە 19 رەت ايقىن جەڭىسكە قول جەتكىزىپ, 16 رەت سامبميشن ادىستەرىن ءساتتى قولداندى. تورتتاعاندا دا, تىك تۇرعان كەزدە دە چارلز ءۇشىن قارسىلاسىن قىلقىندىرىپ تاستاۋ ەش قيىندىق تۋعىزبايدى. سونداي-اق ول
اۋىرتۋ ءادىسىن دە جەتىك مەڭگەرگەن. كەي كەزدەرى تىزە جانە شىنتاقپەن ۇرىپ تا قۇلاتادى. ءبىر سوزبەن ايتساق, وليۆەيرا – ناعىز امبەباپ سپورتشى. ول 12 رەت «جارىستىڭ ەڭ ۇزدىك جەكپە-جەگى» اتالىمى بويىنشا ارنايى بونۋسقا يە بولدى. وسى ورايدا ءار بونۋس رەتىندە 50 مىڭ اقش دوللارى تولەنەتىنىن دە ەسكەرتە كەتەيىك. UFC-دەگى بىردە-ءبىر سپورتشى وسىنداي كورسەتكىشىمەن ماقتانا المايدى. مىنە, قاراپايىم وتباسىنان شىققان ارالاس جەكپە-جەكتىڭ جارقىن جۇلدىزىنىڭ ءجۇرىپ وتكەن جولى وسىنداي.
اقش-تىڭ قوس ارلانى – داستين پورە مەن دجاستين گەيدجي ەكىنشى جانە ءۇشىنشى ورىنداردى ءوزارا بولىسۋدە. داستين 36 كەزدەسۋىنىڭ 28-ىندە جەڭىسكە جەتتى. 21 قارسىلاسىن ەسىنەن تاندىردى. دجاستين 27 باسەكەنىڭ 23-ىندە باسىمدىق تانىتتى. 22 باسەكەنى مەرزىمىنەن بۇرىن اياقتادى. ءتورتىنشى ورىندا تۇرعان يسلام ماحاچەۆتىڭ الەۋەتى اسا جوعارى باعالانۋدا. 30 جاستاعى داعىستاننىڭ دارابوزى 23 كەزدەسۋدىڭ تەك بىرەۋىندە عانا ۇتىلدى. 14 باسەكەدە نوكاۋت تىركەلدى. سونداي-اق ۇزدىك وندىقتىڭ قاتارىندا مايكل چەندلەر (اقش. 30 كەزدەسۋ, 23 جەڭىس, 18 نوكاۋت), بەنەيل داريۋش (يران. 26 كەزدەسۋ, 21 جەڭىس, 13 نوكاۋت, 4 جەڭىلىس, 1 باسەكە تەڭ اياقتالدى), رافاەل دوس انوس (44 كەزدەسۋ, 31 جەڭىس, 15 نوكاۋت), ماتەۋش گامروت (پولشا. 32 كەزدەسۋ, 21 جەڭىس, 12 نوكاۋت), توني فەرگيۋسون (اقش. 33 كەزدەسۋ, 26 جەڭىس, 21 نوكاۋت) جانە رافاەل فيزيەۆ (ازەربايجان. 12 كەزدەسۋ, 11 جەڭىس, 8 نوكاۋت) سىندى ارلاندار بار. وسىلاردىڭ اراسىنان بىزگە جاقىنى فيزيەۆ ەكەنى ءسوزسىز. ويتكەنى ول قازاقستانعا بوتەن ەمەس. رافاەل 1993 جىلى جامبىل وبلىسىنىڭ قورداي اۋدانىندا دۇنيەگە كەلدى. بوزبالا شاعىندا اتا-اتاسىمەن بىرگە الاتاۋدىڭ ارعى بەتىنە ءوتىپ, ۇزاق جىلدار قىرعىزستاندا تۇردى. كەيىننەن فيزيەۆ ازەربايجانعا قونىس اۋداردى.
توپ-10 سپورتشىدان بولەك, تاعى ءتورت ءدۇلدۇلدىڭ دامير يسماعۇلوۆتان كوشى ىلگەرى. ولاردىڭ بارلىعىنىڭ دا ەسىمى جانكۇيەرلەرگە جاقسى تانىس. ماسەلەن, 11 ورىندا ەنشىلەگەن ارمان تسارۋكياننىڭ (21 كەزدەسۋ, 18 جەڭىس, 12 نوكاۋت) مەنەدجەرى – سايات ابدراحمانوۆ. ودان بولەك, پەتر يان, رافاەل فيزيەۆ, شاۆقات راحمونوۆ, موۆسار ەۆلوەۆ جانە دامير يسماعۇلوۆ سىندى دۇلدۇلدەر ءدال وسى قازاق جىگىتىنىڭ قامقورلىعىن كورۋدە. ارمان – گرۋزيادا تۋعان ارميان جىگىتى. بۇل كۇندەرى ول رەسەيدىڭ تۋى استىندا ونەر كورسەتىپ ءجۇر.
12-ورىنداعى كونور ماكگرەگور (28 كەزدەسۋ, 22 جەڭىس, 20 نوكاۋت) جايىندا ۇزاق اڭگىمەلەۋگە بولادى. 14 شىلدەدە 34 جاسقا تولعالى وتىرعان يرلانديالىقتىڭ سپورتتىڭ بۇل تۇرىندە باعىندىرماعان بەلەسى جوق. ول – جەڭىل جانە جارتىلاي جەڭىل سالماقتاعى الەمنىڭ ەكس-چەمپيونى. ول ءار جەكپە-جەگىن شوۋعا اينالدىرىپ, سان ميلليون كورەرمەننىڭ قوشەمەتىنە بولەندى. ارا-اراسىندا جانجال شىعارىپ, ونىڭ ارتى توبەلەسكە ۇلاسىپ جاتادى. سونىڭ ارقاسىندا ماكگرەگور بايلىققا بەلشەسىنەن باتتى. 2017 جىلى كاسىپقوي بوكستىڭ ەرەجەسى بويىنشا ول داڭقى جەر جارعان فلويد مەيۆەزەرمەن جۇدىرىقتاستى. بۇل باسەكەدە جەڭىلسە دە, 30 ميلليون اقش دوللارىن يەمدەندى. ارالاس جەكپە-جەكتى سەرىك ەتكەن سپورتشىلار اراسىنداعى ەڭ اۋقاتتىسى دا ءدال وسى يرلانديانىڭ وكىلى. Forbes جۋرنالىنىڭ مالىمەتىنە سەنسەك, قازىرگى ۋاقىتتا ماكگرەگوردىڭ ەسەپشوتىندا 200 ميلليون دوللار شاماسىندا قارجى بار. سونداي-اق جاڭازەلانديالىق دەن حۋكەر (33 كەزدەسۋ, 21 جەڭىس, 17 نوكاۋت) مەن امەريكالىق دجالين تيورنەر (18 كەزدەسۋ, 13 جەڭىس, 9 نوكاۋت) توپ-15 فايتەردىڭ قاتارىندا.
