وڭىردە مەكتەپ جانىنداعى 390 لاگەر – 31 940, قالا سىرتىنداعى ساۋىقتىرۋ لاگەرى 7 683 بالامەن قامتىلعان. 402 دەمالىس الاڭىندا 117 798 وقۋشى ءتۇرلى ۇيىرمەلەرگە قاتىسادى. ءبىر قاراعاندا, بالالاردىڭ بارلىعى دا نازاردان تىس قالماعان. سويتە تۇرا ولاردىڭ قاراۋسىز كوشە كەزۋى نەنى مەڭزەيدى؟
«تۇنگى قالاداعى بالالار» رەسپۋبليكالىق جەدەل الدىن الۋ ءىس-شاراسى بارىسىندا وڭىردەگى ىشكى ىستەر ورگاندارىنا تاۋلىك ىشىندە 172 ءجاسوسپىرىمنىڭ جەتكىزىلگەنى ويلاندىرماي قويمايدى. ءىس-شارا بارىسىندا الكوگول ونىمدەرىن ساتۋدىڭ 6 دەرەگى انىقتالعان. سونداي-اق كامەلەتكە تولماعان جاسوسپىرىمدەر تۇنگى ۋاقىتتا داياشى بولىپ جۇمىس ىستەگەن ەكى ويىن-ساۋىق ورنى بەلگىلى بولعان. كامەلەتكە تولماعانداردىڭ تۇنگى ۋاقىتتا زاڭدى وكىلدەرىنىڭ ەرىپ ءجۇرۋىنسىز ويىن-ساۋىق مەكەمەلەرىندە جانە تۇرعىنجايدان تىس جەردە بولعانى ءۇشىن 167 اتا-انا جانە كوڭىل كوتەرۋ ورىندارىنىڭ 7 لاۋازىمدى تۇلعاسى اكىمشىلىك جاۋاپكەرشىلىككە تارتىلعان.
«وبلىستا مەكتەپ ءبىتىرۋ كەشتەرىنە ارنالعان ءىس-شارالاردىڭ وتكىزىلىپ جاتقانىن ەسكەرەمىز, وسىعان بايلانىستى بارلىق ويىن-ساۋىق مەكەمەسى, سونداي-اق جاستار كوپ جينالاتىن ورىندار ەرەكشە نازاردا بولادى. كامەلەتكە تولماعانداردىڭ دەمالۋعا جانە سەرۋەندەۋگە ارنالماعان ورىندارى مەن سۋ ايدىندارى ەرەكشە الاڭداۋشىلىق تۋعىزۋدا. جىل باسىنان بەرى جەكە ۇيلەردىڭ اۋماعىندا جاس بالالاردىڭ سۋعا باتىپ كەتۋىنىڭ 2 دەرەگى تىركەلدى. بۇدان تاعى دا اتا-انالار تاراپىنان كامەلەتكە تولماعان بالالارىنىڭ بوس ۋاقىتىن ءتيىمدى پايدالانۋدا ءتيىستى باقىلاۋدىڭ بولماعانىن كورىپ وتىرمىز», دەيدى وبلىستىق پوليتسيا دەپارتامەنتىنىڭ جەرگىلىكتى پوليتسيا قىزمەتى باسقارماسى يۋۆەنالدىق پوليتسيا توبىنىڭ ەرەكشە تاپسىرمالار جونىندەگى اعا ينسپەكتورى, پوليتسيا پولكوۆنيگى قۋانىشبەك قالجانوۆ.
جامبىل وبلىسى
