تاتارستاننان كەلگەن قوناقتاردىڭ ىشىندە «قوستاناي جانە قوستاناي وبلىسى تاتارلارىنىڭ تاريحى» كىتابىن جازىپ شىققان قالامگەر زۋفار ماحمۇتوۆ اقساقال دا بار. مەرەكە بارىسىندا اۆتور تاتار تاريحىنا قاتىستى قىزىقتى مالىمەتتەرمەن ءبولىسىپ, وبلىستىق ەتنوبىرلەستىكتەردىڭ باسشىلارىنا ءبىر-ءبىر كىتاپ تارتۋ ەتتى.
– سابانتوي – تۇركى تىلدەس حالىقتاردىڭ ەگىس ناۋقانىنان كەيىن باس قوسىپ, توي-دۋمان قۇراتىن ەڭبەك مەرەكەسى. بۇل مەرەكە استىقتى ايماق – قوستاناي وبلىسى ءۇشىن دە ماڭىزدى. ەلىمىزدە دوستىق پەن بىرلىكتى ايعاقتايتىن اتاۋلى كۇندەر از ەمەس. سونىڭ ءبىرى وسى – سابانتوي. قوستاناي وبلىسىنداعى ەتنوبىرلەستىككە مۇشە تاتار-باشقۇرت ۇلتى وكىلدەرىنىڭ ىشىندە ايماقتىڭ الەۋمەتتىك-ەكونوميكالىق دامۋىنا بارىنشا ۇلەس قوسىپ جۇرگەن ديقان شارۋالار دا بارشىلىق, – دەيدى وبلىستىق اسسامبلەيا جانىنداعى «دۋسلىق» تاتار-باشقۇرت ەتنومادەني بىرلەستىگىنىڭ باسشىسى رينات بەكتەمىروۆ.
مەرەكەلىك باعدارلاما اياسىندا كوپشىلىك قول كۇرەسى, گىر كوتەرۋ, ايراننىڭ ىشىنەن تەڭگە الىپ شىعۋ, كوز جۇمعان قالپى تاياق لاقتىرىپ, نىساناداعى قۇتىنى قۇلاتۋ سياقتى حالىق ويىندارىن تاماشالادى. اسىرەسە, تاتار حالقىنىڭ بەلبەۋ كۇرەسىن قىزىقتاۋشىلار كوپ جينالدى. تارتىستى باسەكەدە اۋىر سالماقتاعى قوستانايلىق پالۋان تالعات جيەنتاەۆ پەن مىلتىقباي ءابدۋايتوۆتىڭ باعى جاندى. جارىستى ۇيىمداستىرۋشىلار جەڭىمپازداردىڭ يىعىنا ءبىر-ءبىر قويدان وڭگەرىپ بەردى.
سابانتويدىڭ ءسانىن كىرگىزىپ, ءمانىن اشا تۇسكەن ۇلتتىق ويىنداردان كەيىن مەرەكەگە جينالعان جۇرت «دۋسلىق» ۇلتتىق ورتالىعىنىڭ وكىلدەرى پىسىرگەن سالماعى 25 كيلو بولاتىن ءتاتتى چاك-چاكتان اۋىز ءتيدى.
قوستاناي وبلىسى
