كوز جۇمعان جاس جىگىت بىرنەشە كۇن بويى الماتىداعى اۋرۋحانالاردىڭ بىرىندە كومادا بولدى. ەسكە سالساق, ماۋسىم ايىنىڭ ورتاسىندا الەۋمەتتىك جەلىدە 2 جىگىت جانجالىنىڭ ۆيدەوسى تارادى. كادردا جاس جىگىتتىڭ بەلگىسىز جاننىڭ جاعاسىنان الىپ, ۇرلانعان تەلەفوندى قايتارۋدى سۇراعان ءساتى كورىنىس تاپقان. سول كۇنى كۇدىكتى قارسىلاسىن 2 رەت ۇرىپ, وقيعا ورنىنان قاشىپ كەتكەن.
وبلىستىق دەنساۋلىق ساقتاۋ باسقارماسىنىڭ حابارلاۋىنشا, 20 ماۋسىم كۇنى ناۋقاس الماتى كوپسالالى كلينيكالىق اۋرۋحاناسىنا ءتۇسىپ, 8 شىلدە كۇنى تاڭەرتەڭ قايتىس بولدى.
«جەدەل-ىزدەستىرۋ شاراسى بارىسىندا پوليتسيا قىزمەتكەرلەرى جامبىل وبلىسىنىڭ تۋماسى 28 جاستاعى كۇدىكتىنى انىقتادى. قازىرگى ۋاقىتتا كۇدىكتى قاراساي اۋداندىق پوليتسيا باسقارماسىنىڭ ۋاقىتشا ۇستاۋ يزولياتورىندا قاماۋدا. وعان قاتىستى قر قك 192-بابى 3-بولىگى 1-تارماعى بويىنشا تەرگەۋ ءجۇرىپ جاتىر», دەپ حابارلادى الماتى وبلىسى پوليتسيا دەپارتامەنتى باسشىسىنىڭ ورىنباسارى, پوليتسيا پودپولكوۆنيگى ەلدار ابدىكەنوۆ.
ءتارتىپ ساقشىلارىنىڭ ايتۋىنشا, كۇدىكتى قالاعا جاقىن ماڭدا جاسىرىنعان. قازىرگى ۋاقىتتا ءتيىستى تەرگەۋ ءجۇرىپ جاتىر. ونىڭ ناتيجەسى بويىنشا قىسقا مەرزىمدە ءىس جۇرگىزۋ شەشىمى قابىلدانادى.
