«بارىستان» قانداي ويىن كۇتەمىز؟
ىرگەتاسى 1999 جىلى قالانعان «بارىس» حوككەي كلۋبى 2004 جىلى رەسەي چەمپيوناتىنىڭ ءبىرىنشى ليگاسىندا ونەر كورسەتىپ, 2007 جىلى جوعارى ليگاسىندا جولداما جەڭىپ الدى. ءبىر ماۋسىمنان كەيىن قۇرلىقتىق حوككەي ليگاسىنىڭ تۇراقتى قاتىسۋشىسىنا اينالدى. 2008 جىلى قحل-دا العاشقى ماۋسىمىن وتكىزگەن «بارىس» انە-مىنە دەگەنشە بيىل تۇراقتى بىرىنشىلىكتىڭ 15-ءشى ماۋسىمىنا دايىندىعىن باستاعالى جاتىر. وسى ۋاقىت ارالىعىندا ەلوردالىق ۇجىم گاگارين كۋبوگى جولىندا جەتى مارتە 1/8 فينالعا, ءۇش رەت شيرەك فينالعا دەيىن جەتتى. قحل-دا ءار جىلدارى ۇزدىك ناتيجە كورسەتىپ, چەرنىشەۆ ديۆيزيونىندا توپ باستاعانى جانكۇيەرلەردىڭ ەسىندە بولسا كەرەك.
ەلوردالىق كلۋب جاڭا ماۋسىمعا دايىندىعىنا رەسمي تۇردە 14 شىلدەدە كىرىسسە دە, كومانداداعى ىشكى اۋىس-ءتۇيىس مامىر ايىندا باستالىپ كەتتى. قحل-دىڭ كەيىنگى ەكى ماۋسىمىندا «بارىستى» ورگە سۇيرەپ, ەكى مارتە گاگارين كۋبوگىنىڭ پلەي-وفف كەزەڭىنە شىعارعان يۋري ميحايليس وتكەن ايدا قىزمەتىنەن كەتىپ, ورنىنا ەسىمى «بارىس» جانكۇيەرلەرىنە جاقسى تانىس بەلارۋس مامانى اندرەي سكابەلكا كەلدى. يۋ.ميحايليس شاعىن بيۋدجەتپەن جانە قازاقستاندىق حوككەيشىلەرمەن قحل-دا ناشار ونەر كورسەتتى دەپ ايتا المايمىز. ال 2018-2020 جىلدارى «بارىستى» باپتاپ, قحل-دا ايتارلىقتاي ناتيجەگە قول جەتكىزگەن سكابەلكا اراعا ەكى جىل سالىپ ەلوردالىق كلۋبقا قايتا ورالدى. سول ارالىقتا ول ءياروسلاۆلتىڭ «لوكوموتيۆ» كلۋبىن جاتتىقتىرعانىمەن, «بارىستاعىداي» جوعارى ناتيجە كورسەتە المادى.
«بارىسقا» كىم كەلىپ, كىم كەتپەگەن
جاسىراتىنى جوق, قحل-دىڭ وزگە كوماندالارىمەن سالىستىرعاندا, «بارىستىڭ» ترانسفەرگە جاۋاپتى ماماندارى وتە ناشار جۇمىس ىستەيدى. سوزىمىزگە ەكى ايدىڭ ىشىندە كوماندادان 15-كە جۋىق حوككەيشىنىڭ كەتكەنى جانە وسى ۋاقىتتا كلۋبقا نەبارى ءبىر عانا ويىنشىنىڭ كەلگەنى دالەل بولا الادى. ال قحل-دىڭ وزگە كوماندالارى قازىردىڭ وزىندە قۇرامىن جاساقتاپ بولدى. ەندى الاڭسىز جاڭا ماۋسىم الدىنداعى جاتتىعۋ جۇمىسىنا كىرىسەدى. ال «بارىستا» ءبارى كەرىسىنشە. الدىمەن كلۋبتا قالعان ساناۋلى
ويىنشىمەن جاتتىعۋدى باستايدى دا, كەيىننەن ەشبىر كلۋبقا قاجەتى بولماي قالعان شەبەرلىگى ناشار, ويىن تاجىريبەسى جوق حوككەيشىلەردى الىپ, ويىنشىلار ءبىر-بىرىنە ۇيرەنىسكەنگە دەيىن قحل-دىڭ العاشقى 10-15 ماتچىندا جەڭىلىپ, جانكۇيەرلەر الدىندا ۇياتتى بوپ جاتادى.
وكىنىشكە قاراي, بىلتىرعى ماۋسىم اياقتالا سالىسىمەن «بارىسپەن» كەلىسىمشارتى اياقتالعان شەتەلدىك لەگيونەرلەر مەن قازاقستاندىق حوككەيشىلەر كەتىپ قالدى. اتاپ ايتار بولساق, قاقپاشى يوني ورتيو, قورعاۋشىلار وللە السينگ, ەريك مارتينسسون, دجو مورروۋ, ۆالەري ورەحوۆ, رومان ساۆچەنكو, شابۋىلشىلار ياكوب بەرگلۋند, ليندەن ۆەي, كودي كۋنيك, ياكوب ليليا, رومان ستارچەنكو, توماش يۋرچو ەركىن اگەنت رەتىندە باسقا كوماندالارعا اۋىستى.
ازىرشە «بارىس» 13 ويىنشىنىڭ ورنىنا ءبىر عانا جاڭا حوككەيشى الدى. وتكەن ماۋسىمدا ماگنيتوگورسكىنىڭ «مەتاللۋرگىمەن» بىرگە گاگارين كۋبوگىنىڭ فينالىنا دەيىن جەتكەن قورعاۋشى ميحايل گريگورەۆ ەندى الداعى ماۋسىم «بارىس» ساپىندا ونەر كورسەتەدى. م.گريگورەۆ 2012/13 جىلدارى «بارىس» كلۋبىندا ويناعانى بولماسا, جارقىراپ كوزگە تۇسكەن ەمەس.
سونداي-اق ەلوردالىق كلۋب وتكەن اپتادا شابۋىلشى ۆلاديمير ميحاسەنوكپەن 31 تامىزعا دەيىن سىناما كەلىسىمشارت جاساسقانىن حابارلادى. ياعني حوككەيشى جاتتىعۋ جيىنىندا جانە جولداستىق ويىنداردا باپكەرلەردىڭ كوڭىلىنەن شىعاتىنداي ويىن كورسەتسە, كەلىسىمشارتىن ءارى قاراي ۇزارتا الادى. بىلتىرعى ماۋسىمدى ول حاباروۆسكىنىڭ «امۋر» كلۋبىندا باستاپ, كەيىن چەحيانىڭ «بەراني زلين» كلۋبىنا اۋىسقان بولاتىن.
جالاقىدان تۋعان داۋ
كەيىنگى ءبىر-ەكى اپتادا قازاق كوعامىندا «بارىس» كلۋبىندا ونەر كورسەتەتىن قازاقستاندىق شابۋىلشى نيكيتا ميحايليس پەن كانادالىق ليندەن ۆەيدىڭ جالاقىلارى كوپ تالقىلاندى. رەسمي مالىمەت بويىنشا وتكەن ماۋسىمدا ميحايليس «بارىستان» اي سايىن 32 ميلليون تەڭگە, ال ۆەي 40 ميلليون تەڭگە جالاقى الىپ وتىرعان. ولاردىڭ بۇل جالاقىعا لايىق, لايىق ەمەستىگىن ايتپاس بۇرىن, حوككەيشىلەردىڭ بىلتىرعى ماۋسىمداعى ستاتيستيكاسىنا زەر سالىپ كورەيىك.
ماسەلەن, نيكيتا ميحايليس بىلتىر «بارىس» ساپىندا وتكىزگەن 52 ويىندا 19 مارتە مەرگەندىگىمەن كوزگە ءتۇسىپ, 27 رەت ارىپتەستەرىنىڭ گول سوعۋىنا جاعداي جاساعان. ال وتكەن ماۋسىمدى سكا ساپىندا باستاپ, «بارىستا» اياقتاعان ليندەن ۆەي بارلىعى 46 ماتچتا مۇزايدىنعا شىعىپ, قارسىلاستار قاقپاسىنا نەبارى 11 شايبا سوققان. سونداي-اق 9 مارتە ارىپتەستەرىنە ءدال پاس بەرگەن.
ال قحل-ءدىڭ بىلتىرعى ماۋسىمداعى ۇزدىك سۇرمەرگەنى فيليپپ مايە («مەتاللۋرگ») 70 ماتچتا 23 مارتە مەرگەندىك تانىتىپ, 37 شايباعا اسسيستەنتتىك جاساعان. ونىڭ ايلىق جالاقىسى – 30 ميلليون تەڭگەنىڭ شاماسىندا بولعان. وسى سانداردان كەيىن-اق قاي حوككەيشىنىڭ ءوز نانىن ادال تاۋىپ جۇرگەنىن باعامداي بەرۋگە دە بولادى.
جاڭا ماۋسىمنىڭ جوسپارى
جوعارىدا ايتىپ وتكەنىمىزدەي, «بارىس» حوككەيشىلەرى دايىندىقتى 14 شىلدەدە باستايدى. باستاپقى ەكى كۇن مەديتسينالىق تەكسەرۋدەن ءوتىپ, 17 شىلدەدەن 15 تامىزعا دەيىن «بارىس ارەنادا» وقۋ-جاتتىعۋ جيىندارىنىڭ ءبىرىنشى كەزەڭىن وتكىزەدى. ال 16-20 تامىز ارالىعىندا كلۋب ءداستۇرلى «پرەزيدەنت كۋبوگى» جارىسىنا قاتىسادى. بۇل تۋرنيردە «بارىستان» بولەك, ماگنيتوگورسكىنىڭ «مەتاللۋرگ», ەكاتەرينبۋرگتىڭ «اۆتوموبيليست», نيجنەكامسكىنىڭ «نەفتەحيميك» جانە بەيجىڭنىڭ «كۋنلۋن رەد ستار» كلۋبتارى ونەر كورسەتەدى. سودان كەيىن رەسەيدىڭ چەليابى قالاسىنا ساپار شەگەدى. بۇل جەردە جەرلەستەرىمىز «مەتاللۋرگ», «اۆتوموبيليست» جانە جەرگىلىكتى «تراكتورمەن» بىرگە گۋبەرناتور كۋبوگىن ساراپقا سالادى. قحل-دىڭ جاڭا ماۋسىمى 1 قىركۇيەكتە باستالادى.
