شۆەيتساريانىڭ نون قالاسىندا تارتىلعان چەمپيوندار ليگاسىنىڭ جەرەبەسىندە قوستانايدىڭ «توبىلى» ءبىرىنشى اينالىمدا «فەرەنتسۆاروشقا» تاپ بولعاننان كەيىن, ماماندار بۇل جۇپتىڭ ءفاۆوريتى رەتىندە بىردەن ماجارستان چەمپيونىن اتادى. ويتكەنى «فەرەنتسۆاروش» «توبىلعا» قاراعاندا جىل سايىن ەۋروكۋبوك باسەكەلەرىنىڭ توپتىق كەزەڭىندە ونەر كورسەتىپ, ەۋروپانىڭ ازۋلى كوماندالارىمەن ويناپ جۇرگەن تاجىريبەلى كوماندا رەتىندە تانىمال. ال «توبىلدىڭ» جاعدايى بارىنە بەلگىلى. كەيىنگى ەكى جىلدا «جەنەسس» (ليۋكسەمبۋرگ), «جيلينا» (سلوۆاكيا) سەكىلدى بيۋدجەتى از, جارتىلاي كاسىپقوي كوماندالاردان جەڭىلىپ, ۇياتتى بولعان ەدى.
ءسويتىپ, «توبىل» مەن «فەرەنتسۆاروش» اراسىنداعى ەكى ويىننىڭ نەگىزگى ءفاۆوريتى سانالعان ماجاراستاندىق كلۋب العاشقى ماتچتى سىرت الاڭدا وتكىزىپ, تەڭ ناتيجەگە قول جەتكىزگەنىنە قاتتى قۋاندى. ەڭ كەيىنگى رەسمي كەزدەسۋىن وسىدان ەكى اي بۇرىن وتكىزىپ, ماۋسىم ايىندا 4-5 مارتە جولداستىق كەزدەسۋدە الاڭعا شىققان فۋتبولشىلاردىڭ دەمالىستان كەيىن جاسىل الاڭدى جاتىرقاپ قالعانى بىردەن بايقالدى. سوندىقتان دا ولار ءۇشىن تەڭ ناتيجەنىڭ ءوزى ۇلكەن ولجا بولدى.
«توبىل» ءۇشىن مۇنداي ويىندا تەڭ ناتيجە كورسەتۋ – جەڭىلىسپەن پارا-پار ەكەنى ايتپاساق تا تۇسىنىكتى. ويتكەنى ماجارستاندا وتەتىن قارىمتا كەزدەسۋدە «فەرەنتسۆاروش» ءوز جانكۇيەرلەرىنىڭ الدىندا بۇدان دا جاقسى ويناۋعا تىرىسادى. كەشەگى ماتچتا «توبىل» فۋتبولشىلارى قارىمتا كەزدەسۋدىڭ الدىندا-اق بار ماسەلەنى شەشىپ تاستايتىنداي جاعدايدا بولعان ەدى. الايدا قوستانايلىق فۋتبولشىلار گول سوعاتىن بىرنەشە مۇمكىندىكتىڭ بىردە-ءبىرىن ءتيىمدى پايدالانا المادى. اتاپ ايتار بولساق, كەزدەسۋدىڭ 14-مينۋتىندا «توبىلدىڭ» سەربيالىق لەگيونەرى زوران ءتوشيچتىڭ ايىپ الاڭىنان تەپكەن دوبىن قارسىلاستىڭ ويىنشىسى قاقپا سىزىعىنان قايتارىپ, كومانداسىن گولدان قۇتقارىپ قالدى.
سونداي-اق ماتچتىڭ 26-مينۋتىندا اسحات تاعىبەرگەندە دە ەسەپتى اشاتىن مۇمكىندىك بولدى. بىراق ونىڭ تەپكەن دوبى قاقپا ماڭدايشاسىنان ءسال بيىك كەتتى. كەيىننەن ءدال سونداي ۇرىمتال ساتتە پورتۋگاليالىق لەگيونەر رۋبەن بريجيدۋ دە گول سوعا المادى. ءبىر ايتا كەتەرلىگى, كەشەگى ماتچتا «توبىل» ساپىنان الاڭدا بەس لەگيونەر جانە قازاقستاندىق التى فۋتبولشى ونەر كورسەتسە, «فەرەنتسۆاروش» كلۋبىندا ماجارستاندىق ءۇش فۋتبولشىدان باسقاسىنىڭ ءبارى شەتەلدىك ويىنشىلار بولدى.
ەكىنشى تايمدا دا «توبىل» فۋتبولشىلارى قارسىلاس كوماندانىڭ ويىنشىلارىنا قاراعاندا بەلسەندى قيمىلداپ, گول سوعۋدىڭ ءتۇرلى ايلا-ءتاسىلىن قاراستىردى. بىراق «فەرەنتسۆاروشتىڭ» تاجىريبەلى قورعاۋشىلارى مەن قاقپاشىسى 90 مينۋت بويى ساۋاتتى قورعانىپ, ءبىزدىڭ جىگىتتەرگە گول سوقتىرعان جوق. ەكىنشى تايمدا ءبىر عانا اسحات تاعىبەرگەندە ءوز اتىن تابلوعا جازدىرتاتىن ءبىر ەمەس, ءۇش مۇمكىندىگى بولدى. بىراق بۇل كەزدەسۋدە جارتىلاي قورعاۋشىعا گول سوعۋ باقىتى بۇيىرماعان ەكەن.
قارسىلاس كوماندانىڭ ويىنشىلارى كوبىنە قارسى شابۋىلعا يەك ارتىپ, الەكساندر موكين قورعاعان قاقپادان ساڭىلاۋ تابۋعا تىرىسىپ كوردى. بىراق جۋىردا عانا 41 جاسقا تولعان تاجىريبەلى قاقپاقشى ويىن بارىسىندا بىرنەشە سەيۆ جاساپ, قاقپاسىنا گول وتكىزگەن جوق. وسىلايشا, قوستانايدا وتكەن ەكى كوماندا اراسىنداعى العاشقى ويىندا ەسەپ اشىلمادى – 0:0. ەندى بارلىق ماسەلە ءبىر اپتادان سوڭ ماجارستان استاناسىندا وتەتىن قارىمتا كەزدەسۋدە شەشىلەدى. ماتچ 14-ىنەن 15-ىنە قاراعان ءتۇنى بۋداپەشتتەگى 22 مىڭ جانكۇيەر سىياتىن «گروۋپاما ارەنا» ستاديونىندا وتەدى.
