ۇلىبريتانيا اشىق چەمپيوناتىنىڭ 17-راكەتكاسى بولىپ تىركەلگەن ەلەنا رىباكينا ءتورتىنشى اينالىمدا دۇنيەجۇزىلىك رەيتينگتە 80-ورىندا تۇرعان حورۆاتيالىق پەترا مارتيچپەن شەبەرلىك بايقاستى. ءبىر جارىم ساعاتقا جالعاسقان باسەكەدە وتانداسىمىز ەكى سەتتە – 7:5, 6:3 ەسەبىمەن جەڭىسكە جەتتى. وسىلايشا, ەلەنا رىباكينا ءوز كارەراسىندا تۇڭعىش رەت «ۋيمبلدون» جارىسىنىڭ شيرەك فينالىنا جولداما الدى. ول بىلتىرعى باسەكەدە ءتورتىنشى كەزەڭدە جەڭىلگەن ەدى. ەندى, مىنە, اراعا جىل سالىپ ءوز ناتيجەسىن جاڭارتىپ قانا قويماي, تاريحي جەتىستىككە قول جەتكىزدى. جەرلەسىمىز جارتىلاي فينالعا شىعۋ ءۇشىن الەمنىڭ 44-راكەتكاسى اۋستراليالىق ايلا تومليانوۆيچپەن كەزدەسەدى. تومليانوۆيچ ءتورتىنشى اينالىمدا فرانتسيالىق اليزە كورنەدەن (37) باسىم تۇسكەن بولاتىن. ال ا.كورنە ەكىنشى كەزەڭدە ءبىزدىڭ يۋ.پۋتينتسەۆانى, ال ءۇشىنشى كەزەڭدە الەمنىڭ ءبىرىنشى راكەتكاسى پولشالىق يگا شۆەنتەكتى جارىس جولىنان شىعارىپ جىبەرگەن ەدى.
ەلەنا رىباكينا «ۇلكەن دۋلىعا» ساناتىنا ەنەتىن جارىستاردا ءبىرىنشى رەت شيرەك فينالعا شىعىپ تۇرعان جوق. ول بۇعان دەيىن بىلتىرعى «رولان گارروس» ءتۋرنيرىنىڭ دە شيرەك فينالىندا ويناعان بولاتىن.
ەلەنا رىباكينا مەن ايلا تومليانوۆيچ اراسىنداعى كەزدەسۋ بۇگىن وتەدى.
